لاہور: صوبہ پنجاب میں بلدیاتی انتخابات میں میئرز اور یو سی سطح پر الیکشنز ایک ہی دن یا الگ الگ ہوں گے؟ اس سلسلے میں پنجاب حکومت اور اور پی ٹی آئی کے چند رہنماؤں کے درمیان اختلاف پیدا ہوا ہے۔
ذرائع کے مطابق پنجاب حکومت میئرز اور یوسی انتخابات ایک ہی دن کرانے کے حق میں ہیں، تاہم تحریک انصاف کے چند رہنماؤں نے انتخابات اکٹھے کرانے پر اعتراض کیا ہے۔
اس سلسلے میں 3 روز قبل وفاقی وزیر خسرو بختیار نے یو سی اور میئرز الیکشن علیحدہ کرانے کی تجویز دی تھی، ان کا کہنا تھا کہ اکٹھے انتخابات کرانے سے مسائل ہو سکتے ہیں۔
دوسری طرف ذرائع پنجاب حکومت کا کہنا ہے کہ پنجاب اسمبلی قائمہ کمیٹی اور الیکشن کمیشن اکٹھے انتخابات کے حق میں ہیں، جب کہ وزیر اعظم عمران خان نے کہا تھا کہ اس سلسلے میں آپ فیصلہ کر لیں مگر الیکشن ہر صورت کرانے ہیں۔
اب یہ مسئلہ حل کرنے کے لیے اور کسی حتمی نتیجے پر پہنچنے کے لیے قائمہ کمیٹی کا اجلاس دوبارہ طلب کر لیا گیا ہے۔
