لاہور: ہائی کورٹ میں رینجرز کو سندھ طرز کے اختیارات نہ ملنے کے حوالے سے درخواست میں درخواست گزار کا کہنا ہے کہ پنجاب میں تعیناتی کے باوجود رینجرز کو اختیارات نہیں دیئے گئے ہیں۔
تفصیلات کے مطابق لاہور ہائی کورٹ میں رینجرزکواختیارات نہ دینے خلاف درخواست کی سماعت ہوئی، درخواست گزار کا کہنا ہے کہ نیپ کے تحت دیگر صوبوں میں کارروائیاں ہورہی ہیں جبکہ پنجاب میں تعیناتی کے باوجود رینجرز کو اختیارات نہیں دیئے گئے ہیں، اختیارات نہ ہونے سے رینجرز نے اب تک بڑی کارروائی نہیں کی۔
درخواست گزار نے مطالبہ کیا کہ پنجاب میں رینجرز کو سندھ کی طرز کے اختیارات دیئے جائیں اور عدالت نیب کے تحت پنجاب میں رینجرز کو مکمل اختیارات دینے کا حکم دے۔
جس کے بعد عدالت نے وفاق کو جواب داخل کرانے کے لئے19 اپریل تک مہلت دیدی ۔
یاد رہے کہ گزشتہ ماہ وفاقی حکومت نے رینجرز کو صوبہ پنجاب میں 60 روز کے لئے اختیارات دینے کی منظوری دی تھی، پنجاب حکومت نے آپریشن کیلئے رینجرز کے پانچ ونگ مانگے تھے، صوبائی محکمہ داخلہ نے رینجرز کو انسداد دہشت گردی ایکٹ کے سیکشن چار اور پانچ کے تحت بلایا ہے جبکہ آپریشن کے علاقوں کا تعین ایپکس کمیٹی کرے گی۔
دوسری جانب وزیر قانون پنجاب رانا ثناء اللہ کا کہنا تھا کہ پنجاب میں دہشت گردوں کے خلاف آپریشن جاری ہے اوار اس میں رینجرز سمیت دیگر قانون نافذ کرنے والے ادارے حصہ لے رہے ہیں، پنجاب میں آپریشن پوری طاقت کے ساتھ انٹیلی جنس بنیادوں پر کیا جارہا ہے، جس جگہ پر بھی دہشت گردوں کی موجودگی کی اطلاع ملے گی وہاں بلا امتیاز کارروائی کی جارہی ہیں۔
یاد رہے کہ 14 فروری کو آرمی چیف جنرل قمر جاوید باجوہ کی زیر قیادت کور ہیڈ کوارٹرز میں اعلیٰ عسکریت اجلاس میں آرمی چیف نے پاک فوج کو جنوبی پنجاب میں جرائم پیشہ عناصر کے خلاف گرینڈ آپریشن کرنے کی ہدایت جاری کی تھیں۔.
