لاہور : تحریک انصاف نے پنجاب کے ضمنی انتخابات میں دھاندلی روکنے کیلئے جامع حکمتِ عملی کو حتمی شکل دیتے ہوئے قائدین کو ذمہ داریاں سونپ دیں۔
تفصیلات کے مطابق پنجاب میں ضمنی انتخاب میں مبینہ دھاندلی کی کوششیں ناکام بنانے کے معاملے پر تحریک انصاف کی دھاندلی کیخلاف جامع حکمتِ عملی کو حتمی شکل دے دی گئی۔
عمران خان کی منظوری سے سیکرٹری جنرل اسد عمر نے قائدین کوذمہ داریاں سونپ دیں ، حکمران اتحاد کی جانب سے انتخاب پر ڈاکہ ڈالنے کی کوششوں کیخلاف مزاحمت کی جائے گی۔
مرکزی قائدین ہر صوبائی نشست پر پورے انتخابی عمل پر کڑی نگاہ رکھیں گے ، پولیس،انتظامیہ اورپولنگ اسٹاف کی سرگرمیوں پر بھی گہری نظر رکھی جائے گی۔
حکمران اتحاد کے امیدواروں کی حرکات وسکنات پر فوری ردعمل دیا جائے گا اور ووٹرز پر اثر انداز ہونے اور ٹرن آوٹ کو متاثر کرنے کی کوششوں کو بطورِ خاص ناکام بنایا جائے گا۔
تحریک انصاف کےقائدین خصوصی ٹیموں سے مسلسل فیڈ بیک حاصل کریں گے اور ہر پولنگ اسٹیشن پر نہایت تربیت یافتہ پولنگ ایجنٹس تعینات کئے جائیں گے۔
پولنگ ایجنٹس کےکام میں کسی بھی طرح کی رکاوٹ پربھرپورردعمل دیا جائے گا ، ووٹوں کی گنتی،نتائج کی تیاری اوررپورٹنگ کےعمل کی کڑی نگرانی کی جائے گی۔
تحریک انصاف کےقائدین مصدقہ نتائج کےبروقت حصول کیلئےحکمت عملی نافذکریں گے ، نتائج اور پولنگ سامان کی دفتروں تک منتقلی کے عمل پر بھی خصوصی نگاہ رکھی جائے گی جبکہ قائدین مرکزی الیکشن کنڑول روم کو لمحہ بہ لمحہ صورتحال سے آگاہ رکھیں گے۔
راولپنڈی ڈاکٹربابراعوان اورفیاض الحسن چوہان کےسپرد کر دیا گیا جبکہ شہریارآفریدی اورکنول شوذب خوشاب میں فرائض سنبھالیں گے۔
فیصل جاوید خان اور جمشیداقبال چیمہ بھکرمیں انتخابی عمل کی نگرانی کریں گے جبکہ فرخ حبیب اورولیداقبال فیصل آبادمیں محاذسنبھالیں گے۔
اسی طرح علی محمد خان اور زلفی بخاری جھنگ میں خدمات سرانجام دیں گے ، عالیہ حمزہ اورعاطف خان شیخوپورہ کےحلقےمیں انتخابی عمل کی نگرانی کریں گی۔
شفقت محموداورحماداظہرلاہورمیں انتخاب پرڈاکہ ڈالنےکی کوششیں ناکام بنائیں گے جبکہ علی نوازاعوان اورصمصام بخاری کوساہیوال کی ذمہ داری سونپ دی گئی ہے۔
شاہ محمودقریشی اورملیکہ بخاری ملتان میں محاذ سنبھالیں گے ، شبلی فراز اور ڈاکٹر شہزاد وسیم لودھراں ، حسان خاور اور مراد سعید لیہ میں انتخابی عمل کی کڑی نگرانی کا فریضہ سرانجام دیں گے۔
زرتاج گل اور سینیٹر عون عباس پبی ڈیرہ غازی خان ، شوکت لالیکا اور شوکت بسرا بہاولنگر کا محاذ سنبھالیں گے جبکہ قاسم سوری اور عمر چیمہ کو مظفرگڑھ کی ذمہ داری سونپ دی گئی ہے۔
