لاہور : پنجاب اسمبلی میں خواتین اور اقلیتوں کی مخصوص نشستوں کی تقسیم کے بغیر اجلاس بلانے سے نیا آئینی بحران کھڑا ہوگیا۔
تفصیلت کے مطابق پنجاب میں حکومت کی تشکیل سے قبل آئینی بحران نےسراُٹھا لیا، نومنتخب پنجاب اسمبلی کا اجلاس بلانے کے حوالے سے گورنر پنجاب اور اسپیکر پنجاب اسمبلی کے درمیان قانونی محاز آرائی شروع ہونے کا خدشہ ہے۔
اس حوالے سے اسپیکر پنجاب اسمبلی سبطین خان نے کہا کہ صوبائی اسمبلی میں خواتین اور اقلیتوں کی مخصوص نشستوں کی تقسیم کے بغیر اجلاس بلانے سے نیا آئینی بحران کھڑا ہوگا۔
سبطین خان کا کہنا تھا کہ پنجاب اسمبلی کا اجلاس اگر مخصوص نشستوں کی تقسیم سے قبل بلانے اور پی ٹی آئی کی مخصوص نشستوں کسی اور جماعت کو دینے پر آئینی بحران شدت اختیار کرے گا۔
یاد رہے پنجاب میں ارکان اسمبلی کے حلف اور حکومت سازی کے معاملے پر پنجاب اسمبلی کا اجلاس فروری کے آخری ہفتے میں طلب کرنے کا فیصلہ کیا گیا تھا۔
الیکشن ڈے کے بعد 21 دن کے اندر آئینی طور پر اسمبلی اجلاس طلب کرنا لازم ہے ، پنجاب اسمبلی سیکرٹریٹ نے اجلاس کی تیاریاں مکمل کر لیں ہیں۔
پنجاب اسمبلی کے طلب کردہ اجلاس میں ارکان کا حلف، سپیکر، ڈپٹی سپیکر اور وزیر اعلیٰ کا انتخاب ہوگا۔
