لاہور (20 اگست 2025): وزیر اعلیٰ پنجاب مریم نواز نے صوبے کی پولیس کو جدید ٹیکنالوجی سے لیس کرنے کا فیصلہ کیا ہے۔
اے آر وائی نیوز کے مطابق پنجاب پولیس کو جاپان پولیس کی طرز پر انفراریڈ الٹرا سانک ٹیکنالوجی سے لیس کیا جائے گا۔ ٹریفک منیجمنٹ، حادثات پر قابو پانے اور موسمی صورتحال سے پیشگی آگہی نظام سے لیس کیا جائے گا۔
وزیراعلیٰ مریم نواز کی دورہ جاپان سے واپسی پر اس منصوبے پر باضابطہ عملدرآمد کا آغاز کیا جائے گا اور پہلے مرحلے میں لاہور میں پائلٹ پراجیکٹ شروع کیا جائے گا۔
مریم نواز نے دورہ جاپان کے دوران ٹوکیو میں نیشنل پولیس ایجنسی ہیڈ آفس کا دورہ کیا اور نیشنل پولیس ایجنسی شعبوں کا معائنہ کیا۔ اس موقع پر انہیں جاپان پولیس سسٹم کے نگراں ادارے سے متعلق بریفنگ دی گئی۔
جاپانی حکام نے وزیراعلیٰ کو بتایا کہ نیشنل پولیس ایجنسی جاپان کے امپیریل گارڈز کی کارکردگی کی نگرانی کرتی ہے اور پولیس کے تمام محکمے نیشنل پولیس ایجنسی سے منسلک ہیں۔ نیشنل پولیس ایجنسی جاپان پولیس کی محکمانہ پالیسیوں کابھی تعین کرتی ہے۔
انہیں یہ بھی بتایا گیا کہ نیشنل پبلک سیفٹی کمیشن جاپان کی نیشنل پولیس ایجنسی کانگران ہے اور نیشنل پولیس ایجنسی تمام سیکیورٹی محکموں کو ہنگامی صورتحال میں رہنمائی فراہم کرتی ہے۔
وزیراعلیٰ پنجاب نے نیشنل پولیس ایجنسی سسٹم کو سراہتے ہوئے کہا کہ جاپان میں امن وامان کی صورتحال قابل تقلید ہے۔ ہم پنجاب میں بھی پولیس کو جدید خطوط پر استوار کر رہے ہیں۔ جرائم کے خاتمے کیلیے کرائم کنٹرول ڈیپارٹمنٹ کا نیا ادارہ قائم کیا ہے۔ اس کے قیام کے بعد صوبے میں امن وامان کی صورتحال بہتر ہوئی ہے۔
