Tag: پنجاب کسان

لاہور: کسانوں نے حکومت سے زرعی ایمرجنسی ڈکلیئر کرنے کا مطالبہ کر دیا ہے، اور کہا ہے کہ اگر کسانوں کے مسائل پورے نہیں ہوئے تو عید کے بعد کفن پوش احتجاج کیا جائے گا۔

تفصیلات کے مطابق چیئرمین کسان اتحاد خالد حسین باٹھ نے حکومت سے ملک میں زرعی ایمرجنسی ڈکلیئر کرنے کا مطالبہ کیا ہے، اور کہا کہ وہ حکومتوں کو گائیڈ کر سکتے ہیں کہ کون سی فصلیں ڈالر لا سکتی ہیں۔

انھوں نے کہا یوریا کھاد کا بیگ 6 ہزار روپے میں کسانوں کو مل رہا ہے، جب کہ 4 ہزار کی سپورٹ پرائس میں گندم کی لاگت بھی پوری نہیں ہو رہی، اور ابھی تک یہ بھی نہیں بتایا جا رہا کہ حکومت کتنی گندم خریدے گی۔

چیئرمین کسان اتحاد نے کہا شہباز شریف نے کسانوں کے لیے 1800 ارب کے پیکیج کا اعلان کیا تھا، ہم مطالبہ کرتے ہیں کہ کسانوں کے لیے اعلان کردہ پیکیج بحال کیا جائے، انھوں نے کہا کسانوں کے حوالے سے حکومتوں کی پالیسی واضح نہیں ہے، کسانوں کے مسائل حل نہ کیے گئے تو عید کے بعد کفن پوش احتجاج ہوگا، اسلام آباد میں دھرنا دینا پڑا تو وہ بھی دیا جائے گا۔

صدر کسان اتحاد میاں عمیر نے کہا کہ مریم نواز نے زراعت پر ایک بھی میٹنگ نہیں لی، شوگر مافیا نے کسان سے گنا لے لیا مگر پیسے نہیں دیے، کسانوں کے ٹیوب ویلوں کی ڈیفرڈ اکاؤنٹ کو بھی بلوں میں ڈال دیا گیا۔ انھوں نے کہا کسان کو آج 54 روپے کا یونٹ مل رہا ہے، کسانوں کو ن لیگی حکومت کی جانب سے شہر بند کرنے پر مجبور کیا جا رہا ہے۔