Tag: پنجاب کی خبریں

لاہور: پنجاب اسمبلی میں قائد حزب حمزہ شہباز نے وزیر خزانہ اسد عمر کے استعفے پر رد عمل ظاہر کرتے ہوئے کہا ہے کہ غریبوں کے منہ سے روٹی چھیننے کے بعد استعفیٰ قوم سے مذاق ہے۔

تفصیلات کے مطابق وزیر خزانہ اسد عمر کے اپنے عہدے سے استعفے کے اعلان کے بعد ن لیگی رہنما حمزہ شہباز نے اسے مہنگائی میں پھنسی قوم کے ساتھ مذاق قرار دیا۔

حمزہ شہباز نے اپنے بیان میں کہا کہ ان 9 ماہ میں ملک کا کباڑہ کر کے ہزاروں ارب قرض بڑھایا جا چکا ہے، لاکھوں گھروں کے چولھے بجھ گئے ہیں، دوائیں مہنگی ہو گئی ہیں، نیازی صاحب اور ان کی ٹیم پر کیا اثر پڑا؟

اپوزیشن لیڈر پنجاب اسمبلی نے وزیرِ اعظم سے مطالبہ کیا کہ نا اہلی پر وہ مستعفی ہو جائیں، وزیر خزانہ کا غریبوں کے منہ سے روٹی چھیننے کے بعد استعفیٰ قوم سے مذاق ہے، کابینہ نالائقوں کا ٹولہ ہے۔

یہ بھی پڑھیں:  اسد عمرنے وزارت خزانہ چھوڑدی، کوئی نئی وزارت نہیں لیں گے

انھوں نے کہا کہ کھلاڑی بدلنے سے معاشی میچ جیتا نہیں جا سکتا، کپتان بدلنا پڑے گا، اسد عمر کا استعفیٰ عمران خان کی نا اہلی کا اعتراف ہے، اسد عمر تمام اقدامات عمران خان کو اعتماد میں لے کر کرتے تھے۔

حمزہ شہباز کا کہنا تھا کہ اپوزیشن کو رگڑے کے چکر میں معیشت اور عوام کو رگڑا لگایا گیا، حکومتی نا اہلی کا خمیازہ بد قسمتی سےغریب عوام کو ادا کرنا پڑ رہا ہے، لیڈر کو معاملات کی سوجھ بوجھ نہ ہو تو ٹیم کا رد و بدل بے سود ہوتا ہے۔

لاہور: پاکستان مسلم لیگ ن کے رہنما میاں شہباز شریف نے کہا ہے کہ جہاں جہاں شفاف انتخابات ہوں گے وہاں مسلم لیگ ن ہی فاتح ہوگی۔

تفصیلات کے مطابق قومی اسمبلی میں اپوزیشن لیڈر شہباز شریف نے گجرات میں ن لیگی میئر منتخب ہونے پر کارکنوں کو مبارک باد دیتے ہوئے کہا کہ شفاف انتخابات جہاں ہوں گے وہاں ن لیگ فتح حاصل کرے گی۔

شہباز شریف نے ن لیگی میئر کے انتخاب پر کہا ’ہم اللہ کا شکر ادا کرتے ہیں کہ اس نے ہمیں یہ فتح نصیب فرمائی۔‘

ان کا کہنا تھا کہ عوام نے ایک بار پھر مسلم لیگ ن پر اپنے اعتماد کا اظہار کیا، نو منتخب میئر  طاہر اقبال مانڈہ اور ان کی تمام ٹیم کو مبارک باد دیتے ہیں، عوام کے اعتماد کو ٹھیس نہیں پہنچنے دیں گے، ماضی کی طرح ہر سطح پر ان کی بھرپور خدمت کریں گے۔

یہ بھی پڑھیں:  نیب نے شہباز شریف کی اہلیہ اور بیٹیوں کو سوال نامہ بھجوا دیا

 خیال رہے کہ آج 17 اپریل کو گجرات کی میئر شپ کے لیے مسلم لیگ ن اور مسلم لیگ ق کے درمیان الیکشن لڑا گیا۔ چوہدری پرویز الہیٰ نے کہا تھا کہ گجرات کے میئر الیکشن میں سرپرائز دیں گے۔

یاد رہے کہ گزشتہ روز نیب لاہور نے شہباز شریف کی اہلیہ نصرت شہباز، بیٹی جویریہ اور رابعہ کو بذریعہ ڈاک سوال نامہ بھجوا دیا ہے، چیئرمین نیب جسٹس (ر) جاوید اقبال کی ہدایت پر طلبی کے نوٹسز کینسل کر دیے گئے تھے۔

سوال نامے میں مبینہ منی لانڈرنگ اور بینکوں میں آنے والی رقوم کے حوالے سے پوچھا گیا۔ یاد رہے 13 اپریل کو نیب نے اثاثہ جات کیس میں شہباز شریف خاندان کے خلاف تحقیقات کا دائرہ کار مزید وسیع کرتے ہوئے ان کے پورے خاندان کو بیان کے لیے طلب کیا تھا۔

لاہور: پاکستان مسلم لیگ ن کے رہنما حمزہ شہباز شریف نے کہا ہے کہ انھیں پاکستان کی معیشت بیٹھ جانے کا خوف لاحق ہو گیا ہے۔

تفصیلات کے مطابق ن لیگی رہنما حمزہ شہباز نے اپنے وکلا سے طویل مشاورت کے بعد میڈیا سے گفتگو کرتے ہوئے کہا کہ وہ نہ عدالتوں سے گھبراتے ہیں کہ گرفتاری سے ڈرتے ہیں۔

حمزہ شہباز نے اپنا مؤقف پھر دہراتے ہوئے کہا کہ انھوں نے جو کچھ کیا ہے قانون کے مطابق کیا ہے، انھیں بس خوف پاکستان کی معیشت کے بیٹھ جانے کا ہے۔

پنجاب اسمبلی میں اپوزیشن لیڈر حمزہ شہباز کا کہنا تھا کہ اس وقت ملک کے جو حالات ہیں ان میں اللہ کے سوا کوئی مدد کرنے والا نہیں ہے۔

تفصیل پڑھیں:  حمزہ شہباز کی عبوری ضمانت میں 25 اپریل تک توسیع

خیال رہے کہ آج لاہور ہائی کورٹ نے حمزہ شہباز کی عبوری ضمانت میں 25 اپریل تک توسیع کر دی ہے، ہائی کورٹ نے توہین عدالت کی درخواست پر ڈی جی نیب کو نوٹس بھی جاری کیا۔

حمزہ شہباز آج رمضان شوگر ملز اور صاف پانی کیس میں ضمانتوں کی درخواستوں کے سلسلے میں پیش ہوئے تھے، عدالت میں نیب کا مؤقف تھا کہ حمزہ نے گزشتہ روز نیب میں پیشی پر کسی سوال کا جواب نہیں دیا، عدالت میں نیب کی جانب سے ریکارڈ فراہم کیا جا چکا، اس لیے ضمانت میں مزید توسیع نہ کی جائے۔

لاہور: پنجاب کے وزیرِ قانون راجا بشارت نے پاکستان مسلم لیگ ن کے رہنما حمزہ شہباز کی پبلک اکاؤنٹس کمیٹی کی چیئرمین شپ پر تحفظات کا اظہار کر دیا۔

تفصیلات کے مطابق لاہور میں پنجاب کے وزیر قانون راجا بشارت نے میڈیا سے گفتگو کرتے ہوئے کہا ’حمزہ شہباز کی پی اے سی چیئرمین شپ پر تحفظات ہیں۔‘

وزیر قانون پنجاب کا کہنا تھا کہ حمزہ شہباز پر مختلف مقدمات چل رہے ہیں، پی اے سی کے سلسلے میں اپوزیشن سے مذاکرات بھی چل رہے ہیں، تاہم مونس الہیٰ ن لیگ سے ملاقاتوں کی تردید کر چکے ہیں۔

راجا بشارت نے کہا کہ پرویز الہیٰ نے بھی پی ٹی آئی کی قیادت پر اعتماد کا اظہار کیا ہے، حمزہ شہباز پر مقدمات ہیں، پی اے سی چیئرمین شپ کیسے دی جائے۔

یہ بھی پڑھیں:  میں نے جو بھی کیا پاکستان اور ٹیکس قوانین کے مطابق کیا: حمزہ شہباز

انھوں نے پنجاب میں بیوروکریسی میں تبادلوں کے سوال پر کہا کہ آئی جی پنجاب اور بیورو کریسی میں تبادلوں کا اختیار وزیر اعلیٰ کے پاس ہے، بیورو کریسی پاکستان کی ہے کسی جماعت کی نہیں، اس کی وفاداری ریاست کے ساتھ ہوتی ہے۔

خیال رہے کہ آج آمدن سے زائد اثاثہ جات کیس میں نیب میں پیشی کے بعد میڈیا سے گفتگو کرتے ہوئے حمزہ شہباز نے کہا ’2005 سے 2008 تک مجھے ٹی ٹی کے ذریعے پیسا آیا ہے، اس دور میں میں عوامی نمائندہ نہیں تھا، پبلک آفس ہولڈر نہیں تھا تو کس بات کی کرپشن اور منی لانڈرنگ کی۔‘

انھوں نے کہا ’ایک طرف فواد چوہدری اور شہزاد اکبر 85 ارب کی بات کرتے ہیں، وزارت داخلہ نے 33 ارب کی کرپشن کا الزام لگایا، جب کہ نیب نے مجھ سے صرف 18 کروڑ کا سوال کیا ہے۔‘

لاہور: پاکستان مسلم لیگ ن کے رہنما حمزہ شہباز نے کہا ہے کہ انھوں نے جو بھی کیا وہ پاکستان اور ٹیکس قوانین کے مطابق کیا، ٹی ٹی سے جس دور میں پیسا آیا، اس وقت وہ عوامی نمائندے نہیں تھے۔

تفصیلات کے مطابق آمدن سے زائد اثاثہ جات کیس میں نیب میں پیشی کے بعد میڈیا سے گفتگو کرتے ہوئے حمزہ شہباز نے کہا کہ ان پر الزامات اربوں روپے کے لگائے گئے لیکن نیب نے صرف اٹھارہ کروڑ کا پوچھا۔

انھوں نے کہا ’ایک طرف فواد چوہدری اور شہزاد اکبر 85 ارب کی بات کرتے ہیں، وزارت داخلہ نے 33 ارب کی کرپشن کا الزام لگایا، جب کہ نیب نے مجھ سے صرف 18 کروڑ کا سوال کیا ہے۔‘

حمزہ شہباز نے مزید کہا ’2005 سے 2008 تک مجھے ٹی ٹی کے ذریعے پیسا آیا ہے، اس دور میں میں عوامی نمائندہ نہیں تھا، پبلک آفس ہولڈر نہیں تھا تو کس بات کی کرپشن اور منی لانڈرنگ کی۔‘

یہ بھی پڑھیں:  آمدن سےزائداثاثہ جات کیس : حمزہ شہباز نیب میں پیش

ن لیگی رہنما نے کہا کہ ان کے خلاف روز پریس کانفرنس ہوتی ہے اور الزامات لگائے جاتے ہیں، لیکن منی لانڈرنگ اور کرپشن ثابت نہ ہوئی تو عمران خان کو معافی مانگنا پڑے گی، شہباز شریف پر آشیانہ، صاف پانی کیس پر الزامات لگائے گئے، فیصلہ آیا تو دودھ کا دودھ اور پانی کا پانی ہو گیا۔

ان کا کہنا تھا کہ انھیں پرویز مشرف کے دور میں اغوا کر کے گروی رکھا گیا تھا، پاکستان سے باہر جانے کی اجازت بھی نہیں تھی، مشرف کا دور تھا اور میں اکیلا یہاں موجود تھا، نیب 6،6 گھنٹے بلا کر بٹھاتا تھا۔

حمزہ شہباز نے ہزار گنجی میں دہشت گردی کی مذمت کرتے ہوئے کہا کہ واقعے میں جاں بحق افراد کے لواحقین سے تعزیت کرتا ہوں، پشاور میں اے ایس آئی کی شہادت پر افسوس ہوا۔

انھوں نے کہا ’مہنگائی کا سونامی ریڑھی والے کو گھیرنے والا ہے، معاشی دیوالیہ نکالا جا رہا ہے، ابھی پتا چل رہا ہے کہ 80 فی صد گیس مہنگی ہونے والی ہے، میری پیشیوں سے معاشی حالات بہتر ہو جائیں تو روز بلائیں۔‘

لاہور: علامہ اقبال ائیر پورٹ پر نجی ایئر لائن کی پرواز میں چوہا گھس گیا، جس کی وجہ سے پرواز کئی گھنٹے تاخیر کا شکار ہو گئی تاہم فیومی گیشن کے بعد طیارے کو گراؤنڈ کر دیا گیا۔

تفصیلات کے مطابق لاہور ایئر پورٹ پر نجی ایئر لائن کے طیارے میں چوہا نکلنے کے معاملے پر طیارے کو گراؤنڈ کرنا پڑ گیا، نجی ائیر لائن کی پرواز پی اے 470 نے 3 بج کر 20 منٹ پر جدہ روانہ ہونا تھا۔

ترجمان ایئر لائن نے کہا کہ مسافروں کو جدہ پہنچانے کے لیے اسلام آباد سے فیری فلائٹ لاہور پہنچے گی، مسافروں کو متبادل پرواز کے ذریعے جدہ روانہ کیا جائے گا۔

یہ بھی پڑھیں:  نیواسلام آباد ایئرپورٹ مسائل کا گڑھ بن گیا، مسافروں کو پریشانی کا سامنا

چوہا گھسنے کی وجہ سے تاخیر پر پرواز 8 بجے روانہ ہونے کا شیڈول جاری کیا گیا تاہم بعد میں پرواز کو ری شیڈول کر کے رات ساڑھے 12 بجے روانہ ہونے کا اعلان کیا گیا۔

مذکورہ پرواز سے 218 مسافر روانہ ہونے تھے، تمام مسافر ائیر پورٹ لاؤنج میں جہاز سے چوہا نکلنے کا انتظار کرتے رہے، جہاز میں چوہے مار سپرے بھی کیا گیا، تاہم چوہا نہ نکالا جا سکا، جس کی وجہ سے پرواز پی اے 470 مزید تاخیر کا شکار ہوا۔

اطلاعات کے مطابق ائیر لائن کا عملہ تا حال چوہے کو تلاش کرنے میں نا کام ہے، جس کی وجہ سے طیارے کو گراؤنڈ کر دیا گیا۔

لاہور: کراچی کے بعد پنجاب میں بھی موسم کے تیور بگڑ گئے، مختلف شہروں میں تیز آندھی نے تباہی مچا دی، مکانوں کی چھتیں اور دیواریں گرنے سے 10 افراد جاں بحق ہو گئے جب کہ درجنوں زخمی ہو گئے۔

تفصیلات کے مطابق تیز آندھی کے باعث لاہور کے علاقے شاد باغ عامر روڈ پر دیوار گرنے سے ایک شخص جاں بحق، جب کہ 7 افراد زخمی ہو گئے۔

ریسکیو ذرائع نے کہا ہے کہ لاہور کے علاقے کاہنہ میں مکان کی چھت گر گئی جس میں 3 افراد زخمی ہو گئے ہیں، منصورہ میں چھت گرنے سے 4 افراد زخمی ہوئے، زخمیوں کو مختلف اسپتالوں میں منتقل کر دیا گیا ہے۔

لاہور، خانیوال، فیصل آباد، ٹوبہ ٹیک سنگھ، میاں چنوں، چستیاں اور جلال پور بھٹیاں میں تیز بارش ہوئی، پنجاب میں پروازوں کا شیڈول بھی متاثر ہوا۔

ادھر گوجرانوالہ شہر اور گرد و نواح میں بھی موسلا دھار بارش شروع ہو گئی ہے، گیپکو کے 25 سے زائد فیڈر ٹرپ کر گئے، متعدد علاقوں میں بجلی کی فراہمی معطل ہو گئی ہے۔

لاہور شہر میں تیز آندھی کے باعث بجلی کا نظام معطل ہو گیا ہے، شہر کے مختلف علاقوں میں 150 فیڈر ٹرپ کر گئے، متاثرہ علاقوں میں ٹاؤن شپ، جوہر ٹاؤن، کیمپس، ٹھوکر نیاز بیگ شامل ہیں، جب کہ فیڈرز ٹرپ ہونے سے بند روڈ، ملتان روڈ اور ساندہ کے علاقوں میں بجلی بند ہو گئی ہے۔

باغبان پورہ، ہربنس پورہ، باٹا پور، جلو، جی ٹی روڈ، تاج پورہ میں بھی بجلی معطل ہو گئی ہے، چیف ایگزیکٹو لیسکو نے بتایا کہ بجلی کی بحالی کے لیے آپریشن جاری ہے۔

یہ بھی پڑھیں:  کراچی: مختلف علاقوں میں تیز اور گرد آلود ہوائیں چلنے لگیں

بہاول نگر اور گرد و نواح میں تیز ہوا اور گرج چمک کے ساتھ بارش ہو رہی ہے، طوفانی بارش سے متعدد جگہوں پر بوسیدہ چھتیں اور دیواریں گر گئیں۔

نارووال شہر اور گرد و نواح میں بھی تیز آندھی چلنا شروع ہوگئی ہے، جس کے باعث بجلی کی فراہمی معطل ہو گئی، جہانیاں، تلمبہ، حویلی لکھا میں تیز بارش سے نشیبی علاقے زیر آب آ گئے ہیں، تلمبہ میں تیز آندھی سے کئی درخت گر گئے اور بجلی کا نظام درہم برہم ہو گیا۔

سکھیکی، پنڈی بھٹیاں اور گرد و نواح میں بھی تیز ہوا کے ساتھ بارش ہو رہی ہے، چاغی شہر اور گرد و نواح میں گرج چمک کے ساتھ بارش کا آغاز ہو گیا ہے۔

اوکاڑہ میں مصنوعی جنگل پیپلی پہاڑ پر آسمانی بجلی گرنے سے آگ لگ گئی، ریسکیو 1122 کی امدادی ٹیمیں آگ بجھانے میں مصروف ہیں۔

لاہور: حمزہ شہباز شریف کی جانب سے قومی احتساب بیورو پر الزامات کے بعد ڈائریکٹر جنرل نیب پیشی کے دوران ہونے والی حمزہ شہباز کی گفتگو سامنے لے آئے۔

تفصیلات کے مطابق ڈی جی نیب شہزاد سلیم نے بتایا کہ حمزہ شہباز نے دوران تفتیش کہا میں خاندان کے افراد کے بارے میں جواب نہیں دوں گا۔

ڈی جی نیب شہزاد سلیم کا کہنا تھا کہ حمزہ شہباز نے کہا ’والدہ سے متعلق سوالات نیب خود اُن سے کرے۔‘

نیب کے ڈائریکٹر جنرل نے کہا کہ حمزہ کو 12 اپریل کو نصرت شہباز سے متعلق ریکارڈ لانے کی ہدایت کی گئی تھی، لیکن انھوں نے ایسا کوئی بھی ریکارڈ جمع کرانے سے معذرت کی۔

یہ بھی پڑھیں:  حمزہ شہباز نیب پر برس پڑے، میری بہنوں اور بیمار والدہ کو بھی نوٹس بھیج دیا

خیال رہے کہ لیگی رہنما حمزہ شہباز نے میڈیا سے گفتگو کرتے ہوئے کہا تھا کہ کل تین گھنٹے وہ نیب میں بیٹھ کر آئے، اب پھر بلایا جا رہا ہے، اور بہنوں اور بیمار والدہ کو بھی نوٹس بھیج دیا گیا، کیا مہذب معاشرے میں ماں بیٹیوں کو نوٹس بھیجے جاتے ہیں۔

یہ بھی پڑھیں:  نیب نے حمزہ شہباز کے الزامات مسترد کر دیے، حمزہ کو بھیجا گیا نوٹس بھی منظر عام پر آگیا

انھوں نے ڈی جی نیب پر الزام لگایا اور کہا ’ڈی جی نیب لاہور نے کہا آپ نے ضمانت کی درخواست کیوں دی، ہم تو آپ کو گرفتار نہیں کرنا چاہتے، آپ حکومت سیٹلمنٹ کرلیں، آپ کو بار بار بلانا اچھا نہیں لگتا، حکومت سے ڈیل کیوں نہیں کر لیتے۔‘

تاہم قومی احتساب بیورو (نیب) نے لیگی رہنما حمزہ شہباز کے تمام الزامات مسترد کر دیے، ترجمان نیب نے کہا کہ حمزہ شہباز کے الزامات کی تردید اور مذمت کرتے ہیں۔

لاہور: قومی احتساب بیورو (نیب) نے لیگی رہنما حمزہ شہباز کے تمام الزامات مسترد کر دیے، ترجمان نیب نے کہا کہ حمزہ شہباز کے الزامات کی تردید اور مذمت کرتے ہیں۔

تفصیلات کے مطابق ترجمان نیب نے کہا کہ ڈی جی نیب لاہور نے اپنی ڈگری سے متعلق کبھی حمزہ شہباز سے بات نہیں کی، حمزہ شہباز کے تمام الزامات من گھڑت ہیں۔

انھوں نے کہا کہ حمزہ شہباز کے الزامات کھسیانی بلی کھمبا نوچے کے مترادف ہے، حمزہ اور فیملی ممبران کے خلاف منی لانڈرنگ کے ٹھوس ثبوت ملے ہیں، نیب پر حکومت کا کوئی دباؤ نہیں، نیب خود مختار ادارہ ہے۔

نیب کے ترجمان کا کہنا تھا کہ شریف فیملی کے اکاؤنٹس میں رقم مبینہ منی لانڈرنگ سے منتقل ہوئی، اس حوالے سے اسٹیٹ بینک نے شکایت کی تھی۔

یہ بھی پڑھیں:  حمزہ شہباز نیب پر برس پڑے، میری بہنوں اور بیمار والدہ کو بھی نوٹس بھیج دیا

دوسری طرف نیب کا حمزہ شہباز کو بھجوایا گیا نوٹس بھی منظر عام پر آ گیا ہے، نیب نے حمزہ کو آمدن سے زائد اثاثہ جات کیس میں 16 تاریخ کو طلب کر رکھا ہے۔

حمزہ شہباز سے مجموعی طور پر 8 سوالات پوچھے گئے، مراسلے میں کہا گیا کہ والدہ کی جانب سے وصول ہونے والی فارن کرنسی کا ریکارڈ پیش کریں، سالانہ بنیادوں پر کی جانے والی انویسٹمنٹ کا ریکارڈ بھی پیش کریں۔

نوٹس مراسلے میں حمزہ شہباز سے کہا گیا ہے کہ 2006 سے 2008 تک ٹیکس ریٹرن نہ جمع کرانے کا ریکارڈ پیش کریں، اور 2005 سے 2017 کے دوران اثاثوں میں کئی گنا اضافے پر بھی تفصیلات پیش کریں۔

نوٹس کے مطابق حمزہ شہباز سے نیب کی جانب سے 2005 سے اب تک ملنے والے تحائف کی تفصیلات بھی طلب کی گئی ہیں۔