Tag: پنجاب کی خبریں

لاہور: وزیر اعلیٰ پنجاب عثمان بزدار نے شمالی وزیرستان میں بارودی دھماکے میں 3 فوجی جوانوں کی شہادت پر افسوس کا اظہار کرتے ہوئے دھماکے کی مذمت کی ہے۔

تفصیلات کے مطابق پنجاب کے وزیر اعلیٰ نے وزیرستان میں دہشت گردی کے واقعے پر رد عمل ظاہر کرتے ہوئے کہا کہ بارودی سرنگ کا دھماکا قابل مذمت ہے، مادر وطن پر قربان ہونے والے بہادر سپوتوں کو خراج عقیدت پیش کرتا ہوں۔

عثمان بزدار نے کہا کہ اپنی جانوں کا نذرانہ پیش کرنے والے بہادر سپاہی ہمارا افتخار ہیں، وطن کی حفاظت کے لیے شہدا کی عظیم قربانیوں کو فراموش نہیں کر سکتے، وطن بے مثال قربانیوں کے باعث امن کی جانب بڑھ رہا ہے۔

یہ بھی پڑھیں:  شمالی وزیرستان میں بارودی سرنگ کا دھماکا، 3 جوان شہید

وزیر اعلیٰ پنجاب نے کہا کہ پوری قوم شہدا کی عظیم قربانیو ں کو سلام پیش کرتی ہے۔

واضح رہے کہ گزشتہ روز شمالی وزیرستان میں دیسی ساختہ بارودی سرنگ کے دھماکے کے نتیجے میں پیٹرولنگ ٹیم کے پاک فوج کے 3 جوان شہید ہو گئے تھے، جب کہ ایک زخمی ہوا تھا۔

آئی ایس پی آر کے مطابق شہدا میں سپاہی ساجد، ریاست اور بابر شامل تھے، واقعے کے بعد سیکورٹی فورسز نے علاقے کا محاصرہ کر کے سرچ آپریشن کیا۔ یاد رہے کہ رواں سال جولائی میں بھی شمالی وزیرستان میں پاک افغان سرحد پر پاک فوج کے جوانوں پر سرحد پار سے فائرنگ کی گئی تھی جس کے نتیجے میں پاک فوج کے 6 جوان شہید ہوگئے تھے۔

ملتان: سابق وزیر اعظم یوسف رضا گیلانی کے بیٹے اور پیپلز پارٹی کے رکن پنجاب اسمبلی علی حیدر گیلانی کے خلاف کار سرکار میں مداخلت کا مقدمہ درج کر لیا گیا۔

تفصیلات کے مطابق کار سرکار میں مداخلت کرنے اور ڈی پی او سے بد سلوکی کرنے پر رکن پنجاب اسمبلی علی حیدر گیلانی کے خلاف مقدمہ درج کر لیا گیا ہے، پولیس حکام کا کہنا ہے کہ مقدمے میں 4 معلوم اور 60 نامعلوم ملزمان کو نامزد کیا گیا ہے۔

اے آر وائی نیوز کے مطابق رکن پنجاب اسمبلی علی حیدر گیلانی پر الزام ہے کہ انھوں نے مظفر گڑھ کے جلسے میں گاڑیوں کا داخلہ روکنے پر ڈی پی او سے تلخ کلامی کی تھی اوراس موقع پر انھوں نے پی پی کے کارکنوں کے ساتھ ڈی پی او اور پولیس اہل کاروں کو دھکے دیے تھے۔

رپورٹ کے مطابق علی حیدر گیلانی نے سیکورٹی بیرئیرز توڑ کر کار سرکار میں مداخلت کی تھی، ایم پی اے نے ڈی پی او کو سنگین نتائج کی دھمکی بھی دی تھی۔

یہ بھی پڑھیں:  بلاول بھٹو کا مظفر گڑھ جلسے سے خطاب

واضح رہے کہ 8 نومبر کو مظفر گڑھ میں پیپلز پارٹی کے جلسہ عام سے چیئرمین پی پی بلاول بھٹو زرداری نے خطاب کیا تھا، انھوں نے کہا احتساب کے نام پر سیاسی انتقام کی حد کردی گئی ہے، آصف زرداری نے پہلے بھی 11 سال بغیر جرم جیل میں گزارے، کیس کی سماعت بھی سندھ میں ہونی تھی لیکن مقدمہ راولپنڈی میں چل رہا ہے۔

پیپلز پارٹی کے گزشتہ دور حکومت کا ذکر کرتے ہوئے انھوں نے کہا کہ ہم نے آمرانہ دور میں نکالے گئے نوجوانوں کو نوکریوں پر بحال کیا تھا، 18 ویں آئینی ترمیم سے صوبوں کو ان کے حقوق دیے۔

اوکاڑہ: پنجاب کے ضلع اوکاڑہ میں کوڑے کے ڈھیر سے دو نومولود بچوں کی لاشیں برآمد ہوئی ہیں، نامعلوم شخص بچوں کی لاشیں شاپر میں ڈال کر پھینک گیا تھا۔

تفصیلات کے مطابق اوکاڑہ میں کوڑے کے ڈھیر سے دو نومولود کی لاشیں ملی ہیں، نامعلوم شخص بچوں کی لاشیں شاپر میں ڈال کر پھینک گیا، لاشیں پاکپتن روڈ پر پٹرول پمپ کے سامنے سے ملیں۔

معلوم نہیں ہو سکا ہے کہ نومولود بچوں کی لاشیں کیوں کوڑے کے ڈھیر پر پھینکی گئی تھیں۔

یاد رہے کہ اس سے قبل بھی گزشتہ ماہ 17 اکتوبر کو پنجاب کے دارالحکومت لاہور میں واقع قبرستان سے تین نومولود بچوں کی لاشیں برآمد ہوئیں تھیں، جس کے بعد پولیس نے گورکن کو حراست میں لے لیا تھا۔

یہ بھی پڑھیں:  نومولود بچے کی میت قبر سے نکال کر بھیک مانگنے والے ملزم گرفتار

19 اکتوبر کو جیکب آباد کے نجی میڈیکل سینٹرمیں آکسیجن نہ ملنے سے چار نومولود بچے جاں بحق ہوگئے تھے، ڈپٹی کمشنر جیکب آباد نے واقعے کا نوٹس لیتے ہوئے نجی اسپتال کو سیل کر کے انکوائری کا حکم دے دیا تھا۔

نومولود بچوں کے حوالے سے بھی عجیب واقعات پیش آتے ہیں، 16 اپریل کو پنجاب پولیس نے بادامی باغ میں نومولود بچے کی میت نکال کر بھیک مانگنے والے نوجوان کو گرفتار کیا تھا۔ معلوم ہوا تھا کہ ملزم الیاس نے بادامی باغ کے مقامی قبرستان کی قبر سے نومولود کی میت نکالی اور اُس کے ہمراہ چوک پر بیٹھ کر بھیک مانگنا شروع کر دیا۔