اسلام آباد: پنجاب کی وزارت اعلیٰ سے متعلق اہم کیس کی سماعت کے سلسلے میں آج بڑے سیاسی رہنما سپریم کورٹ میں موجود ہوں گے۔
اے آر وائی نیوز کے مطابق آج سپریم کورٹ میں پنجاب کی وزارت اعلیٰ سے متعلق قانونی دنگل سجے گا، کیس کی سماعت آج دوپہر ایک بجے ہوگی۔
مختلف سیاسی جماعتوں کے مرکزی رہنماؤں نے عدالت میں حاضری کا فیصلہ کیا ہے، پاکستان تحریک انصاف کی جانب سے شاہ محمود قریشی، اسد عمر، فواد چوہدری، شیریں مزاری، عمر ایوب، بابر اعوان، پرویز خٹک اور عامر کیانی سپریم کورٹ آئیں گے۔
ن لیگ کے شاہد خاقان عباسی، خرم دستگیر، رانا ثنا اللہ کی بھی سپریم کورٹ آمد کا امکان ہے، وزیر قانون اعظم نذیر تارڑ، احسن اقبال، سعد رفیق اور امیر مقام، ایاز صادق، عطا تارڑ، اور ملک احمد خان بھی عدالت آئیں گے۔
پی پی چیئرمین بلاول بھٹو زرداری، جے یو آئی رہنما فضل الرحمان، مولانا اسعد، ایم کیو ایم کے کنوینر خالد مقبول صدیقی، عوامی نیشنل پارٹی کے امیر حیدر ہوتی بھی عدالت آئیں گے۔
بی این پی کے اختر مینگل، اسلم بھوتانی کی بھی سپریم کورٹ آمد کا امکان ہے، جب کہ ق لیگ کے سربراہ چوہدری شجاعت حسین، سالک حسین اور طارق بشیر چیمہ بھی عدالت آئیں گے۔
چوہدری شجاعت کی سپریم کورٹ آمد کے سلسلے میں سیکیورٹی کو بھی آگاہ کر دیا گیا ہے، وہ عدالت میں اپنے خط کی تصدیق کریں گے، اس موقع پر سپریم کورٹ کے اندر اور باہر سیکیورٹی کے سخت انتظامات کیے جائیں گے۔
جے یو آئی، چوہدری شجاعت، پی پی پی، اور ایم کیو ایم نے بھی اکھاڑے میں اترنے کا اعلان کیا ہے، تمام جماعتوں کی جانب سے فل کورٹ تشکیل دینے کی استدعا کی جائے گی۔ فیصلہ یہ ہونا ہے کہ پالیسی پارلیمانی پارٹی کی چلے گی یا پارٹی کے سربراہ کی، یاد رہے کہ سپریم کورٹ نے حمزہ شہباز کو ٹرسٹی وزیر اعلیٰ کے طور پر کام کرنے اجازت دی تھی۔
