لاہور: پنجاب کی جیلوں میں موجود قیدیوں نے کروڑوں روپے کما کر حکومت کے حوالے کر دیے۔
تفصیلات کے مطابق پنجاب کی جیلوں میں قیدیوں کی کمائی کے حوالے سے جاری ایک رپورٹ میں کہا گیا ہے کہ قیدیوں نے لگ بھگ پونے 9 کروڑ روپے کا منافع کمایا۔
رپورٹ کے مطابق 5 سال میں پنجاب بھر سے 21 ہزار سے زائد قیدیوں نے 8 کروڑ 76 لاکھ روپے منافع کمایا، یہ منافع مختلف اشیا کی فروخت سے حاصل ہوا۔
جیل میں قیدیوں کی تیار کردہ 18 مختلف اشیا مارکیٹ میں فروخت کی گئی تھیں، ان اشیا میں قالین، کمبل، کٹ باکس، سائیڈ لاکرز، فرنیچر سمیت کئی دیگر اشیا شامل تھیں، یہ اشیا قیدیوں نے مہارت کے ساتھ بنائیں۔
ملتان جیل میں قتل کا قیدی ٹک ٹاکر بن گیا
رپورٹ میں کہا گیا ہے کہ قیدیوں نے ٹیکسٹائل میں سب سے زیادہ 2 کروڑ سے زیادہ کا منافع کمایا، قیدیوں کی جانب سے کمائی گئی رقم چالان کی صورت میں قومی خزانے میں جمع کرا دی گئی ہے۔
واضح رہے کہ گزشتہ برس وزارت انسانی حقوق نے کرونا وبا پر اقدامات کی رپورٹ سپریم کورٹ میں جمع کراتے ہوئے انکشاف کیا تھا کہ ملک بھر کی جیلوں میں گنجائش سے زیادہ قیدی موجود ہیں۔ رپورٹ میں بتایا گیا تھا کہ پنجاب کی 41 جیلوں میں گنجائش 32 ہزار 477 قیدیوں کی ہے لیکن وہاں پر 45 ہزار 324 قیدی موجود ہیں۔
