Tag: پنجاب یونیورسٹی

لاہور : کروڑوں کی اسکالرشپس لے کر فرار ہونے والے بارہ اساتذہ کو ملازمت سے برخاست کردیا گیا۔

تفصیلات کے مطابق کروڑوں کی اسکالر شپس لیکر فرار ہونے والے پنجاب یونیورسٹی کے 12 اساتذہ کو برخاست کردیا گیا۔

مفرور اساتذہ سے رقوم کی ریکوری کیلئے پنجاب یونیورسٹی ایف آئی اے کو خط لکھے گی جبکہ شناختی کارڈ اور پاسپورٹ بلاک کرنے کیلئے وزارت خارجہ کو خط لکھا جائے گا۔

ترجمان کا کہنا تھا کہ پنجاب یونیورسٹی کے 56 اساتذہ کو بیرون ملک پی ایچ ڈی کیلئےگرانٹ ملی ، پنجاب یونیورسٹی کے 7 اساتذہ ایچ ای سی کی اسکالرشپ اور 5 اساتذہ یونیورسٹی کی اسکالر شپ لے کر مفرور ہے۔

اساتذہ کو پی ایچ ڈی کرنے کے بعد 5 سال یونیورسٹی میں سروسز دینی تھی ، 56 میں سے 12 اساتذہ نے اسکالرشپ حاصل کرنے کے بعد یونیورسٹی جوائن نہ کی، ڈیوٹی جوائن نہ کرنے پر اساتذہ کو یونیورسٹی کو کروڑوں روپے ادا کرنے تھے۔

پنجاب یونیورسٹی جی آئی ایس سینٹر کی فرح ستار 70 لاکھ ، جی آئی ایس سینٹر کے سید محسن علی ایک کروڑ 40 لاکھ ، انسٹی ٹیوٹ آف ایڈمنسٹریٹو سائنسز کی کرن عائشہ ایک کروڑ ادا کیے بغیر مفرور ہیں۔

اس کے علاوہ شعبہ ایم ایم جی کی رابعہ عباد 90 لاکھ روپے، آئی کیو ٹی ایم کے خواجہ خرم خورشید 84 لاکھ روپے، طہیلی کالج آف کامرس کی شمائلہ اسحاق ایک کروڑ 61 لاکھ ، سینٹرفارکول ٹیکنالوجی کے عثمان رحیم 72 لاکھ روپے دیے بغیر مفرور ہیں۔

لاہور:کالج آف انجینئرنگ کے سلمان عزیز 90 لاکھ ، جی آئی ایس کے محمد نواز 72 لاکھ روپے ، پی یو سی آئی ٹی کی جویریہ اقبال 60 لاکھ ، ایڈمنسٹریٹو سائنسز کی سیماب آرا کو ایک کروڑ اور سامعہ محمودایک کروڑ 16 لاکھ ادا کرنے ہیں۔

لاہور: پولیس نے پنجاب یونیورسٹی میں طالبعلم رانا عمار کے قتل میں ملوث 3 ملزمان گرفتار کر کے گاڑی اور پستول برآمد کر لیا۔

پولیس نے بتایا کہ ملزمان میں دلاور، عبداللہ اور حذیفہ شامل ہیں، مقتول رانا عمار اپنے دوستوں کے ساتھ پنجاب یونیورسٹی میں گاڑی میں موجود تھا، ملزمان عبداللہ اور حذیفہ نے گاڑی میں دلاور سے پستول لیا۔

ایس پی اقبال ٹاؤن بلال احمد نے بتایا کہ عبداللہ اور حذیفہ نے چیمبر مارا تو اچانک برسٹ کی شکل میں گولیاں چلیں، گاڑی کی فرنٹ سیٹ پر ہونے کی وجہ سے رانا عمار کو 3 گولیاں لگیں۔

5 دسمبر کو پنجاب یونیورسٹی میں رانا عمار نامی طالبعلم کے جاں بحق ہونے کی خبر سامنے آئی تھی تاہم انتظامیہ نے جامعہ میں فائرنگ کا واقعہ پیش آنے کی تردید کی تھی۔

انتظامیہ کا مؤقف تھا کہ فائرنگ کا کوئی واقعہ نہیں ہوا، سی سی ٹی وی چیک کیے لیکن فائرنگ کا کوئی عینی شاہد نہیں ملا، کسی بھی جگہ سے گولی کا شیل یا خون نہیں ملا۔

انہوں نے کہا تھا کہ طالبعلم یونیورسٹی کے ایڈمن افسر کا بھانجا ہے، کچھ طلبہ انتظامیہ پر جان بوجھ کر الزام تراشی کر رہے ہیں۔

انتظامیہ کا کہنا تھا کہ طلبہ تنظیم کے کارکنوں نے ایڈمن بلاک پر حملہ کیا اور شیشے توڑے، انہوں نے کنٹین پر بھی حملہ کر کے توڑ پھوڑ کی، انتظامیہ کسی سے بلیک میل نہیں ہوگی۔

محمد عمار کے جاں بحق ہونے کی خبر کے بعد ترجمان پولیس نے بھی فائرنگ کا واقعہ رپورٹ نہ ہونے کی تصدیق کی تھی۔ پولیس کا کہنا تھا کہ جامعہ میں فائرنگ کا کوئی واقعہ اب تک رپورٹ نہیں ہوا۔

ترجمان کا کہنا تھا کہ مخصوص گروہ جھوٹی خبر پھیلا کر مذموم مقاصد حاصل کرنا چاہتا ہے، یونیورسٹی کی سکیورٹی نے مذکورہ مقام پر جا کر ابتدائی تحقیق کی ہے، مبینہ جگہ پر فائرنگ کا کوئی واقعہ پیش نہیں آیا۔

لاہور : وزیر برائے اعلی تعلیم رانا سکندر حیات نے پنجاب یونیورسٹی میں ہونہار اسکالرشپ پروگرام کا افتتاح کرتے ہوئے میڈیکل کالجز کی طلبا کو بڑی خوشخبری سنادی۔

تفصیلات کے مطابق وزیراعلیٰ پنجاب کی ہدایت پر ہونہار طلبا کی مالی امداد کیلئے ہونہار اسکالرشپ پروگرام کا آغاز کردیا گیا۔

وزیر برائے اعلی تعلیم نے پنجاب یونیورسٹی میں ہونہار اسکالر شپ پروگرام کا افتتاح کیا، رانا سکندر حیات نے کہا کہ 30 ہزار ہونہار طلبا و طالبات کو ہر سال اسکالر شپ دیں گے۔

ان کا کہنا تھا کہ سرکاری میڈیکل کالجز کے طلبا کو بھی پروگرام میں شامل کریں گے ساتھ ہی پنجاب کے طلبا میں جلد 40 ہزار لیپ ٹاپس بھی تقسیم کریں گے۔

خیال رہے وزیراعلیٰ پنجاب مریم نواز کی ہدایت پر ہونہاراسکالر شپ پروگرام کی رجسٹریشن شروع کردی گئی، پروگرام کے تحت 68 ڈسپلنز میں سالانہ 30 ہزار طلبہ کو اسکالر شپ دیا جائے گا۔

پروگرام کے تحت 50 پبلک سیکٹریونیورسٹیز، 16میڈیکل کالجز ،131گریجوایٹ کالجز کے طلبہ کو اسکالر شپ دی جائے گی اور 4سال میں 130ارب روپے کےوظائف فراہم کئے جائیں گے اور آئندہ 4سالو ں میں ایک لاکھ 20ہزار طلبہ مستفید ہوں گے۔

لاہور: پنجاب یونیورسٹی کی کینٹین میں 2 طلبا گروپوں میں جھگڑا ہوگیا، پولیس نے25 سے زائد طلبا کو حراست میں لے لیا۔

تفصیلات کے مطابق پنجاب یونیورسٹی کی کینٹین میں طلبا کے دو گروہ آپس میں لڑ پڑے۔ دیکھتے ہی دیکھتے لڑائی شدت اختیار کرگئی جس میں کئی طلبا زخمی ہوگئے۔ پولیس نے جھگڑے میں ملو ث 27 طلبا کو گرفتار کرلیا ہے۔

پولیس کے آنے پر متعدد طلبا فرار ہونے میں کامیاب ہوگئے۔ جھگڑے کے دوران فائرنگ بھی کی گئی جبکہ ڈنڈوں اور پتھروں سے بھی ایک دوسرے پر حملہ کیا گیا۔

پولیس حکام کا کہنا ہے کہ پنجاب ہونیورسٹی میں ہونے والے جھگڑے کے دوران 5 طلبا زخمی ہوئے ہیں، واقعے کا مقدمہ درج کر لیا گیا ہے۔

مقدمے میں دہشت گردی اور اقدام قتل کی دفعات بھی شامل کی گئی ہیں۔ پولیس نے بتایا کہ جھگڑے میں ملوث 27 طلبا کو گرفتار کرلیا ہے جبکہ متعدد فرار ہوگئے ہیں۔

پولیس نے طلبا گروپوں میں جھگڑے کے حوالے سے مزید بتایا کہ ان کے تصادم میں کینٹین اور یونیورسٹی کی املاک کو نقصان پہنچا ہے۔

لاہور: تیز ہوا اور بارش سے پنجاب یونیورسٹی گیٹ کی دیوارکا حصہ گر گیا۔

تفصیلات کے مطابق تیز ہوا اور بارش کے باعث پنجاب یونیورسٹی گیٹ کی دیوار کا حصہ گرگیا جس سے ٹریفک متاثر ہوگئی۔

ریسکیو ذرائع کا کہنا ہے کہ دیوار گرنے سے جناح اسپتال سے گارڈن ٹاؤن جانیوالی سڑک پر ٹریفک متاثر ہوگئی تاہم ملبہ ہٹانے کا کام جاری ہے۔

ریسکیو ذرائع نے بتایا کہ دیوار گرنے سے کوئی جانی نقصان نہیں ہوا، سڑک سے دیوار کا ملبہ ہٹاکر سڑک کو ٹریفک کیلئے کھول دیاجائیگا۔

ریسکیو حکام کا کہنا ہے کہ تیز ہوا چلنے کی وجہ سے اکھڑنے سے دیوار گری ہے۔