لاہور: صوبہ پنجاب میں گزشتہ 24 گھنٹوں کے دوران کرونا وائرس کے 2 ہزار سے زائد نئے کیسز رپورٹ ہوئے جبکہ 25 منزید اموات ہوئیں۔
تفصیلات کے مطابق صوبہ پنجاب میں کرونا وائرس کے مریضوں میں تیزی سے اضافہ ہورہا ہے، گزشتہ 24 گھنٹوں کے دوران پنجاب میں کرونا وائرس کے 2 ہزار 33 نئے کیسز سامنے آگئے۔
ترجمان پرائمری اینڈ سیکنڈری ہیلتھ کیئر کا کہنا ہے کہ پنجاب میں کرونا وائرس کے مجموعی مریضوں کی تعداد 1 لاکھ 95 ہزار 87 ہوگئی۔
ترجمان کے مطابق گزشتہ روز لاہور میں 12 سو 62، راجن پور میں 180، فیصل آباد میں 110، سیالکوٹ میں 89 اور گوجرانوالہ میں 79 کرونا وائرس کیسز سامنے آئے۔
اسی طرح گجرات میں 40، خوشاب میں 32، سرگودھا میں 29، منڈی بہاؤ الدین میں 21، ملتان اور ساہیوال میں 19، چنیوٹ میں 17، حافظ آباد اور شیخو پورہ میں 14، 14، راولپنڈی اور اوکاڑہ میں 13، 13 اور خانیوال میں 12 کیسز رپورٹ ہوئے۔
علاوہ ازیں ٹوبہ ٹیک سنگھ میں 9، بہاولپور، جہلم اور قصور میں 8، نارروال اور ڈیرہ غازی خان میں 7، 7، بھکر میں 6، ننکانہ صاحب میں 4، مظفر گڑھ، وہاڑی اور پاکپتن میں 3، 3، جھنگ اور بہاولنگر میں 2، 2 کیسز سامنے آئے۔
ترجمان کا کہنا ہے کہ گزشتہ 24 گھنٹے کے دوران صوبے میں کووڈ 19 سے مزید 25 اموات ہوئیں جس کے بعد اموات کی کل تعداد 5 ہزار 942 ہوچکی ہے۔
صوبے میں اب تک کووڈ 19 کے 36 لاکھ 14 ہزار 105 ٹیسٹ کیے جاچکے ہیں، جبکہ صحت یاب افراد کی تعداد 1 لاکھ 75 ہزار 265 ہوچکی ہے۔
