Tag: پنجاب

لاہور: پنجاب اسمبلی میں اپوزیشن لیڈر حمزہ شہباز کا کہنا ہے کہ پنجاب اسمبلی میں جعلی اسپیکر کا ڈٹ کر مقابلہ کریں گے۔ تحریک عدم اعتماد کی ہمیں ابھی کوئی جلدی نہیں، ان کی حکومت چلنے دیں تاکہ ان کی اصلیت عوام کے سامنے آئے۔

تفصیلات کے مطابق پنجاب اسمبلی میں اپوزیشن لیڈر حمزہ شہباز نے میڈیا سے گفتگو کرتے ہوئے کہا کہ وزیر اعظم عمران خان کا کل سعودی عرب میں خطاب سنا۔ لگتا ہے وزیر اعظم عمران خان ابھی کنٹینر سے نیچے نہیں اترے۔

انہوں نے کہا کہ سعودی عرب جانے سے پہلے بھی عمران خان نے ایک انٹرویو دیا۔ نعیم الحق نے کہا وہ غیر رسمی گفتگو تھی، غیر ملکی صحافی نے کہا کہ انٹرویو تھا۔

انہوں نے کہا کل سپریم کورٹ کے 2 ججز نےایک بیان دیا۔ وہ ججز کہتے ہیں کہ نیب نے عوام کا کروڑوں روپے خرچ کیا۔ اس سے ثابت ہوتا ہے نیب سیاست زدہ ہو چکا ہے۔

حمزہ شہباز کا کہنا تھا کہ نیب بعض کیسز پر عقاب سے زیادہ تیزی سے کام کر رہا ہے۔ شہباز شریف کو بلاتے صاف پانی کیس میں ہیں اور گرفتار آشیانہ میں کرتے ہیں۔ ’نیب کو بتانا چاہتا ہوں پنجاب بینک میں ڈاکہ ڈالنے والے یہاں بھی بیٹھے ہیں‘۔

انہوں نے کہا کہ اسپیکر پنجاب اسمبلی روزانہ بغض پر مبنی رولنگ دیتے ہیں انہیں گرفتار کریں۔ کل عمران خان سرمایہ کاروں کے سامنے دکھڑے رو رہے تھے۔ گھر کے مسائل پر گھر میں ہی بات ہوتی ہے۔

حمزہ شہاز کا کہنا تھا کہ پنجاب حکومت کی جانب سے ایک جعلی تصویر شائع کی گئی۔ مطالبہ کرتے ہیں اسپیکر پنجاب اسمبلی کے خلاف کارروائی ہو۔ ہم اپنا آئینی حق ادا کریں گے، ہم نے مشرف دور کی جیلیں بھی دیکھی ہیں۔ 6 ارکان کو معطل کرنے کی رولنگ بالکل غلط ہے۔

انہوں نے کہا کہ سنا ہے ارکان کی معطلی پر ایک کمیٹی بنائی گئی جس میں 10 ارکان حکومتی ہیں، پنجاب اسمبلی واقعے کی تحقیقاتی کمیٹی میں صرف 2 ارکان اپوزیشن سے ہیں۔ انتخابات میں دھاندلی سے متعلق کمیٹی کے ٹی او آرز طے کیے جانے چاہئیں۔ ٹی او آرز اپوزیشن کی مشاورت سے طے ہونے ہیں۔

اپوزیشن لیڈر نے کہا کہ پنجاب اسمبلی میں جعلی اسپیکر کا ڈٹ کر مقابلہ کریں گے۔ تحریک عدم اعتماد کی ہمیں ابھی کوئی جلدی نہیں، ان کی حکومت چلنے دیں تاکہ ان کی اصلیت عوام کے سامنے آئے۔ فیاض الحسن چوہان کو جواب دینا بھی ہتک عزت سمجھتا ہوں۔

انہوں نے مزید کہا کہ پرویز الٰہی کی جعلی کمیٹی کو مسترد کرتا ہوں، ہمارا کوئی ممبر نہیں جائے گا۔ جعلی تصویر شائع کرتے ہیں اور 6 ارکان کو معطل کرتے ہیں۔ ’کیا آپ کو خواب آیا تھا کہ یہ 6 ارکان واقعے میں ملوث ہیں‘۔