Tag: پنجاب

لاہور: وزیر اعلی شہباز شریف اور میئر استنبول ڈاکٹر قادر توپباش نے گاڑی چلا کر جدید ریڈیو کیب ٹیکسی سروس کا افتتاح کر دیا۔ شہباز شریف کا کہنا ہے کہ پاکستان اور ترکی کی دوستی صدیوں پر محیط ہے۔

وزیر اعلٰی شہباز شریف نے جدید ریڈیو کیب ٹیکسی سروس کی افتتاحی تقریب کے موقع پر کہا کہ شہریوں کے لئے جدید ریڈیو کیب ٹیکسی سروس کا آغاز ایک تحفہ ہے، ابتدائی طور پر لاہور میں 100گاڑیاں چلائی جائیں گی جبکہ آئندہ چند برس میں جدید ریڈیو کیب گاڑیوں کی تعداد ہزاروں تک پہنچ جائے گی۔
ان کا کہنا تھا کہ پاکستان اور ترکی کی دوستی صدیوں پر محیط ہے، پوری دنیا جانتی ہے کہ پاکستان اور ترکی کے عوام یکجان دو قالب ہیں اور دونوں ملکوں کے عوام کے دل ایک ساتھ دھڑکتے ہیں۔ انہوں نے کہا کہ ترک قیادت رجب طیب اردگان اور وزیر اعظم نواز شریف کے دور میں پاک ترک دوستی کو نئی جہت ملی اوردونوں ملکوں کے مابین تجارت اور سرمایہ کاری میں اضافہ ہوا ہے۔

شہباز شریف نے کہا کہ البراک گروپ نے ہمارے گزشتہ دورحکومت میں پنجاب میں سرمایہ کار ی کا آغازکیا اور آج اس گروپ کی سرمایہ کاری اربوں روپے تک پہنچ چکی ہے۔

اس موقع پر میئر استنبول ڈاکٹر قادر توپباش کا کہنا تھا کہ وہ ترک عوام کی جانب سے پنجاب کے بھائیوں کے لئے محبت اور خلوص کا پیغام لے کر آئے ہیں، پنجاب حکومت کے ساتھ مستقبل میں بھی تعاون کا فروغ جاری رکھیں گے۔ اس سے پہلے ڈاکٹر قادرتوپباش نے لاہور کی ضلعی انتظامیہ کے ساتھ میٹروبس میں سفر کیا اور سروس کو سراہا۔

لاہور: پنجاب میں بھی سیکیورٹی رینجرز کے حوالے کرنے کا فیصلہ کرلیا گیا، رینجرز نے سترہ اضلاع میں داعش اور دیگر کالعدم تنظیموں کے خلاف بھرپور کارروائی کے لیے حکمت عملی تیار کرلی۔

پنجاب کے سترہ اضلاع میں رینجرزایکشن کرے گی، کالعدم تنظیموں سے نمٹنے کیلئے پنجاب رینجرز کو طلب کرنے کا فیصلہ کیا گیا ہے، ابتدائی طور پر بہاولپور، بہاولنگر، حاصل پور، رحیم یار خان، ملتان، فیصل آباد، سیالکوٹ، گوجرانوالہ سمیت دیگر اضلاع میں رینجرز کو لگایا جائے گا بلوچستان سے ملنے والی سرحد بھی رینجرز کی ہی ذمہ داری رہے گی۔

ذرائع کے مطابق رینجرز داعش اور دیگر کالعدم تنظیموں کے خلاف بھرپور کارروائی کے لئے حکمت عملی ترتیب دے چکی ہے، پنجاب حکومت کی خواہش ہے کہ رینجرز صرف دہشتگردی تک اپنی توجہ مرکوز رکھے۔

رینجرز کا موقف ہے کہ سہولت کار اور مالی معاونت کرنے والوں کے خلاف بھی کارروائی کی جائے گی، رینجرز کو طلب کرنے کی تاریخ اعلیٰ سطح کے اجلاس میں طے کی جائے گی، حکومتی ذرائع کا کہنا ہے رینجرز کو پولیس کی معاونت کے لئے بلایا گیا ہے۔