ARYNews.tv | Urdu – Har Lamha Bakhabar

Tag: پنو عاقل

  • ایل پی جی ٹیموں، قانون نافذ کرنے والے اداروں نے پنو عاقل کو بڑی تباہی سے بچا لیا

    ایل پی جی ٹیموں، قانون نافذ کرنے والے اداروں نے پنو عاقل کو بڑی تباہی سے بچا لیا

    پنو عاقل: اوگرا، حکومت سندھ اور قانون نافذ کرنے والے اداروں کی گیسیں مکس کرنے والے ڈپوز کے خلاف بروقت کارروائی نے پنو عاقل کو تباہی سے بچا لیا۔

    تفصیلات کے مطابق چیئرمین اوگرا مسرور خان نے ایل پی جی ٹیموں کو ہدایت کی کہ قانون نافذ کرنے والے اداروں اور صوبائی حکومت کے ساتھ مل کر غیر قانونی گیس مکسنگ کے خلاف مناسب کارروائی عمل میں لائیں۔

    اوگرا نے پنوعاقل، سکھر اور اطراف کے علاقوں میں ایل پی جی میں کاربن ڈائی آکسائیڈ کی غیر قانونی ملاوٹ کے تمام مقامات کو سیل کر دیا ہے۔

    ترجمان اوگرا کے مطابق ایل پی جی گیس میں کاربن ڈائی آکسائیڈ گیس مکسنگ کسی بھی وقت بڑے پیمانے پر دھماکوں اور نقصان کا ذریعہ بن سکتی تھی۔

    ضلعی انتظامیہ نے قانون کی خلاف ورزی پر ملزمان کے خلاف ایف آئی آر درج کر لی، اوگرا کو اطلاع موصول ہوئی تھی کہ سکھر کے قریب پنوعاقل میں ایل پی جی کے ساتھ کاربن ڈائی آکسائیڈ مکس کی جاتی ہے۔

  • قومی شاہراہ پر مسافر کوچ الٹ گئی، 13 مسافر جاں بحق

    قومی شاہراہ پر مسافر کوچ الٹ گئی، 13 مسافر جاں بحق

    سکھر: صوبہ سندھ میں قومی شاہراہ پر پنو عاقل کے قریب رات گئے مسافر کوچ الٹ گئی، کوچ میں بیشتر مزدور سوار تھے جن میں سے 13 جاں بحق ہوگئے۔

    تفصیلات کے مطابق قومی شاہراہ پر پنو عاقل کے قریب رات گئے مسافر کوچ الٹ گئی۔ ڈپٹی کمشنر سکھر رانا عدیل کا کہنا ہے کہ حادثے میں 13 افراد جاں بحق ہوئے ہیں جبکہ 29 زخمی ہیں۔

    حکام کے مطابق جائے حادثہ پر ریسکیو آپریشن مکمل کرلیا گیا، تمام زخمیوں کو اسپتال منتقل کر دیا گیا۔ 11 زخمی سی ایم ایچ پنو عاقل، 2 روہڑی تعلقہ اسپتال اور 16 زخمیوں کو سول اسپتال سکھر منتقل کر دیا گیا۔

    ڈپٹی کمشنر کا کہنا ہے کہ کوچ میں بیشتر مزدور سوار تھے جو ملتان سے کراچی جا رہے تھے۔

    ذرائع کے مطابق جاں بحق 13 افراد میں سے 6 مسافروں کی شناخت ہوگئی ہے، جاں بحق ہونے والوں کے نام محمد ریاض، محمد اقبال،اللہ دتہ، عباس، ندیم، محمد شکیل بھی شامل ہیں۔

    روہڑی تعلقہ اسپتال میں موجود 5 لاشوں کی تاحال شناخت نہ ہو سکی۔

  • 6 سالہ جھلسی ہوئی بچی کے والدین علاج کے لیے در در کی ٹھوکریں کھانے پر مجبور

    6 سالہ جھلسی ہوئی بچی کے والدین علاج کے لیے در در کی ٹھوکریں کھانے پر مجبور

    کراچی: پنو عاقل سے تعلق رکھنے والے والدین 2 روز سے اپنی 6 سالہ جھلسی ہوئی بچی لے کر ایک شہر سے دوسرے شہر در در کی ٹھوکریں کھانے پر مجبور ہوگئے، بچی کو مختلف اسپتالوں نے علاج سے منع کردیا۔

    تفصیلات کے مطابق صوبہ سندھ کی تحصیل پنو عاقل سے تعلق رکھنے والی 6 سالہ معصومہ 2 روز قبل چائے کے برتن میں گر کر جھلس گئی، 2 روز سے والدین سندھ بھر کے اسپتالوں میں در در کی ٹھوکریں کھانے پر مجبور ہیں۔

    والدین کا کہنا ہے کہ بچی کو سول اسپتال پنو عاقل لے کر گئے تو انہوں نے سول اسپتال سکھر بھیج دیا، سول اسپتال سکھر گئے تو انہوں نے کراچی این آئی سی ایچ بھیج دیا۔

    والدین کا مؤقف ہے کہ این آئی سی ایچ گئے تو انہوں نے کراچی سول اسپتال برنس وارڈ بھیج دیا لیکن برنس وارڈ میں بھی علاج کرنے سے منع کردیا گیا۔

    مجبور باپ نے دہائی دیتے ہوئے کہا کہ بیٹی کو جھلسے 48 گھنٹے سے زائد کا عرصہ گزر چکا ہے، بیٹی کو لے کر سندھ بھر کے اسپتالوں میں گھما چکا ہوں۔

    والدین نے میڈیا کے سامنے روتے ہوئے کہا کہ خدارا انصاف کیا جائے اور بیٹی کا علاج کیا جائے۔

    خیال رہے کہ اس سے قبل بھی سندھ میں اسی نوعیت کا ایک واقعہ پیش آیا تھا جب شکار پور میں 10 سالہ بچے کو کتے نے کاٹ لیا تھا۔

    والدین اسے لے کر اسپتالوں میں گھومتے رہے لیکن کہیں ویکسین نہ ملی، معصوم بچے نے تڑپ تڑپ کر ماں کی گود میں جان دے دی تھی۔

  • لائن آف کنٹرول پر شہید فوجی جوان آبائی علاقوں میں سپرد خاک

    لائن آف کنٹرول پر شہید فوجی جوان آبائی علاقوں میں سپرد خاک

    پنو عاقل: لائن آف کنٹرول پر گزشتہ روز بھارتی فوج کی بلا اشتعال فائرنگ سے شہید ہونے والے فوجی جوانوں کو آبائی علاقوں میں سپرد خاک کر دیا گیا۔

    تفصیلات کے مطابق گزشتہ روز ایل او سی پر بھارتی فوج کی اشتعال انگیزی کے باعث جام شہادت نوش کرنے والے پاک فوج کے دو اہل کاروں کو سپرد خاک کر دیا گیا۔

    نائب صوبیدار کندیرو کی تدفین صوبہ سندھ کے ضلع سکھر کی تحصیل پنو عاقل میں عمل میں آئی، جب کہ سپاہی محمد احسان کو پنجاب کے ضلع جہلم کے شہر پنڈدادن خان میں سپرد خاک کیا گیا۔

    یہ بھی پڑھیں:  ایل او سی پر فائرنگ سے 2 جوان شہید، پاک فوج کا منہ توڑ جواب، 3 بھارتی فوجی ہلاک

    شہید فوجیوں کی نماز جنازہ میں فوجی اور سول حکام، عزیز و اقارب اور شہریوں کی بڑی تعداد نے شرکت کی۔

    یاد رہے کہ دونوں جوان بھارتی فورسز کی بلا اشتعال فائرنگ سے گزشتہ روز شہید ہوئے تھے، پاک فوج کی جوابی کارروائی میں تین بھارتی فوجی ہلاک ہو گئے تھے، اور دشمن کی ایک چوکی تباہ ہو گئی تھی۔

    ڈی جی آئی ایس پی آر کا کہنا تھا کہ بھارتی فورسز نے حاجی پیر سیکٹر پر بلا اشتعال فائرنگ کی ہے جس کا بھرپور جواب دیا گیا۔ پاک فوج کی جوابی کارروائی سے بھارتی چیک پوسٹ تباہ ہو گئی، اور 3 بھارتی فوجی مارے گئے، جن میں ایک صوبیدار بھی شامل تھا۔

    آئی ایس پی آر کے مطابق پاک فوج کے جوان دیوا سیکٹر پر بھارتی اشتعال انگیزی سے شہید ہوئے تھے۔

  • عوام ساتھ دیں ظالم حکمرانوں کا مقابلہ کرنے کیلئے نکلاہوں، بلاول بھٹو زرداری

    عوام ساتھ دیں ظالم حکمرانوں کا مقابلہ کرنے کیلئے نکلاہوں، بلاول بھٹو زرداری

    سکھر : چیئرمین پیپلزپارٹی بلاول بھٹو زرداری نے کہا ہے کہ پیپلزپارٹی نے ہمیشہ عوام کے معاشی حقوق کی جدوجہد کی ہے، عوام ساتھ دیں ظالم حکمرانوں کا مقابلہ کرنے کیلئے نکلاہوں۔

    یہ بات انہوں نے پنو عاقل میں مہنگائی کے خلاف ریلی سے خطاب کرتے ہوئے کہی، بلاول بھٹو نے کہا کہ موجودہ حکمران50لاکھ گھر تو کیا دیں گے غریبوں کے سر سے چھت بھی چھین رہے ہیں۔

    غریبوں کے چھوٹے چھوٹے گھر گرائے جارہے ہیں کیا یہ ہے نیا پاکستان ؟ بلاول بھٹو کا مزید کہنا تھا کہ پیپلزپارٹی نے ہمیشہ عوام کے معاشی حقوق کی جدوجہد کی ہے، شہید ذوالفقارعلی بھٹو نے بیروزگار نوجوانوں کو روزگاردیا تھا، اس زمانے میں مشہور تھا کہ بینظیر آئے گی روزگار لائے گی۔

    بلاول بھٹو نے کہا کہ ہم عوامی حکومت لائیں گے اور اس حکومت کو گھر بھیجیں گے، ظالم حکمرانوں کا مقابلہ کرنے کیلئے نکلا ہوں، عوام ساتھ دیں تو کوئی طاقت ہمیں نہیں روک سکتی۔

    اپنے خطاب میں انہوں نے شراکاء سے کہا کہ اسلام آباد کے حکمرانوں کو پیغام پہنچائیں کہ نیا پاکستان نہ کھپے،عوام دشمن بجٹ میں اربوں روپے کا بیل آؤٹ ہے، بجٹ میں مہنگائی کی سونامی اور ٹیکسز کا طوفان ہے۔

  • سکھر:اسمگل شدہ دو سو کچھوے دریائے سندھ میں چھوڑ دیئے گئے

    سکھر:اسمگل شدہ دو سو کچھوے دریائے سندھ میں چھوڑ دیئے گئے

    سکھر:پاکستان سے چائنہ اسمگل کئے جانےو الےدوسو تیس کچھوے ایک ماہ قبل پاکستان اور چائنہ کی سرحدی حدود سے چائنیز اور پاکستانی کسٹم حکام نے مشترکہ کارروائی کرکے تحویل میں لئے تھے، جنہیں پاکستان کی وائلڈ لائف حکام کے حوالے کیا گیا تھا،

    بعد ازاں ایک ماہ تک کچھوؤں کو وائلڈ لائف ہیڈ کوارٹر سکھر میں رکھنے کے بعد آج پنو عاقل کے قریب دریائے سندھ میں چھوڑدیاگیا، اس موقع پر سیکریٹری فاریسٹ نائلہ واجد نے میڈیا سے گفتگو کر تے ہوئے بتایا کہ مزید 218کچھوؤں کو گذشتہ روز کراچی ایئر پورٹ سے پکڑا گیا ہے جنہیں پاکستان سے ہانگ کانگ اسمگل کیا جا رہا تھا ۔

    انھوں نے بتایا کہ بین الاقوامی مارکیٹ میں ان کھچوؤں کی مالیت کروڑوں میں ہے کیونکہ بیرون ممالک میں انہیں شوق سے کھایا جا تا ہے۔ کچھوے اسمگل کرے والوں کے خلاف وائلڈ لائف کی جانب سے کریک ڈاﺅن آپریشن کر نے کا بھی اعلان کیا گیا ہے۔