کراچی : ایس بی سی اے کے مقتول اسسٹنٹ ڈائریکٹر اظہرحسین کا پوسٹ مارٹم کیا گیا ، جس میں ان کے سر، ہاتھوں اورگردن پر تشدد کے نشانات ہیں۔
تفصیلات کے مطابق ایس بی سی اے کے اسسٹنٹ ڈائریکٹر اظہر حسین کے قتل کے معاملے پر مقتول کا عباسی شہید اسپتال میں پوسٹ مارٹم کیا گیا۔
جس میں بتایا گیا کہ اظہر حسین کے سر،ہاتھوں اور گردن پر تشدد کے نشانات ہیں تاہم وجہ موت کے تعین کیلئے نمونے کیمیائی تجزیئے کیلئے بھیج دیئے گئے ہیں۔
پولیس حکام کا کہنا ہے کہ رپورٹ آنے کے بعد وجہ موت کا حتمی تعین ہوگا، مقتول کے ورثا کے ساتھ رابطے میں ہیں، ورثاء کے بیان اورحتمی رپورٹ آنے کے بعد مقدمہ درج کیا جائے گا۔
ذرائع کا کہنا ہے کہ اظہر خان ملیر رفاہ عام سوسائٹی کا رہائشی اور 3 جون سے لاپتہ تھا، میت رکھوانے والے شخص نے سرد خانے کو غلط معلومات فراہم کیں۔
اظہر خان ایس بی سی اے میں اسسٹنٹ ڈائریکٹر تھے، ان کی ملیر میں پوسٹنگ تھی، متوفی جانوروں کے بیوپاری کے طور پر کام بھی کرتے تھے۔
ایدھی فاونڈیشن کا کہنا تھا کہ گزشتہ روز میت سرد خانہ میں طاہر وہاب کے نام سے شناخت بتا کر رکھوائی گئی تھی، جس شخص نے گزشتہ روز میت رکھوائی وہ کال اٹینڈ نہیں کررہا۔
