کوئٹہ : بلوچستان کے دارالحکومت کوئٹہ میں نامعلوم افراد نے مسجد کے اندر فائرنگ کرکے پولیس کے سب انسپکٹر کو ہلاک کر دیا.
تفصیلات کے مطابق کوئٹہ میں یہ واقعہ چمن پھاٹک کے قریب محلہ فقیرآباد کی مسجد میں پیش آیا،پولیس کے مطابق سب انسپکٹر مشتاق مسجد میں شام کی نماز پڑھ رہے تھے کہ تین افراد مسجد میں داخل ہوئے اور دوران نماز فائرنگ کردی،جس سے سب انسپکٹر مشتاق جان کی بازی ہار گئے.
سول لائنز پولیس ا سٹیشن میں پولیس افسر کی ہلاکت کا مقدمہ درج کرکے تحقیقات کا آغاز کردیا گیا.
یاد رہے رواں سال مئی اور جون کے مہینے میں کوئٹہ میں پولیس اہلکاروں پر ہونے والے حملوں میں بڑی حدتک اضافہ ہوا ہے.
واضح رہے کہ رواں سال کوئٹہ شہر میں پولیس اہلکاروں پر ہونے والے حملوں میں 33 پولیس اہلکار جاں بحق جبکہ متعدد زخمی ہوئے ہیں.
