اسلام آباد : ملک میں 8 فروری کو ہونے والے الیکشن کے پیش نظر اسلام آباد میں پولیس اہلکاروں کی چھٹیاں منسوخ کرنے اور تاحکم ثانی پابندی عائد کرنے کا فیصلہ کرلیا گیا۔
تفصیلات کے مطابق اسلام آباد میں الیکشن سے متعلق آئی سی سی پی او اکبر ناصر کی زیرصدارت اجلاس ہوا، جس میں الیکشن کے حوالے سے سیکیورٹی پلان کو حتمی شکل دے دی گئی۔
اجلاس میں پولیس اہلکاروں کی چھٹیاں منسوخ کرنے اور تاحکم ثانی پابندی عائد کرنے کا فیصلہ کرلیا۔
تاحال فنڈز جاری نہ ہونے کی وجہ سےعملی اقدامات تاخیر کا شکار ہے ، ترجمان نے بتایا کہ ڈی آئی جی افسران کی زیر نگرانی شرقی ،غربی حصوں میں تقسیم کیا جائے گا، اضافی اور نظم و ضبط کی ڈیوٹیوں کیلئے رضاکار،ریٹائرڈ افسران کی خدمات لی جائیں گی۔
خواتین پولنگ اسٹیشنز کیلئے انتظامیہ سے500خواتین رضاکاروں کی خدمات کی درخواست کی ہے۔
ترجمان پولیس نے کہا ہے کہ الیکشن ضابطہ اخلاق کی خلاف ورزی ہرگزبرداشت نہیں کی جائے گی ، اسلحہ نمائش، احتجاج، ہوائی فائرنگ یاامن عامہ میں خلل پر رعایت نہیں ہوگی۔
ترجمان کا کہنا تھا کہ تمام حساس پولنگ اسٹیشنز پر کیمرے نصب کیے جائیں گے اور سیف سٹی اسلام آباد میں مرکزی کنٹرول روم قائم کیا جائے گا۔
اسلام آباد پولیس و دیگرقانون نافذ کرنیوالے اداروں کے 10 ہزار اہلکار فرائض انجام دیں گے ، اسلام آباد کیپیٹل پولیس کی اولین ترجیح پرامن انتخابات کا انعقاد ہے۔