کراچی : شہر قائد میں پولیس اہلکار نے فائرنگ کرکے نوجوان کی جان لے لی، پولیس نے ملزم کو گرفتار کرلیا۔
اے آر وائی نیوز کی رپورٹ کے مطابق کراچی کے علاقے شاہ لطیف ٹاؤن میں پولیس اہلکاروں کی فائرنگ سے ایک نوجوان زخمی ہوگیا، واقعے کے بعد ایک اہلکار کو حراست میں لے لیا گیا۔
زخمی ہونے والے کامران کے اہل خانہ کے مطابق کامران موٹر سائیکل پر جارہا تھا کہ پولیس اہلکاروں نے اسے روکا اس دوران اچانک اہلکاروں نے فائرنگ کردی جس سے ایک گولی کامران کے پیٹ میں لگی اسے فوری طور پر طبی امداد کے لیے جناح اسپتال لے جایا گیا۔
جناح اسپتال میں اے آر وائی نیوز سے گفتگو کرتے ہوئے زخمی کامران کے رشتے دار زاہد نے بتایا کہ پولیس اہلکاروں کے روکنے پر کامران سے موٹر سائیکل کی ریس پتہ نہیں کیسے تیز ہوگئی جس پر اہلکاروں نے فوری فائرنگ کردی جس سے کامران کو کمر سے گولی لگی اور پیٹ سے نکل گئی۔
پولیس حکام کے مطابق فوری طور پر واقعے میں ملوث ایک اہلکار کو حراست میں لے لیا گیا ہے جبکہ ایس پی ملیر سعید رند کو واقعے کا انکوائری افسر مقرر کردیا گیا ہے۔
مزید پڑھیں : شہری کو پولیس موبائل میں گھر سے کس نے اغوا کیا؟
گلستان جوہر بلاک 2 سے پولیس موبائل میں عدیل شیخ نامی شہری کے مبینہ اغوا کے کیس میں ورثا نے گلستان جوہر تھانے میں درخواست دے دی ہے۔
درخواست گزار نے کہا کہ میرے بھائی کو 13 جنوری کو اس کے گھر سے غیر قانونی حراست میں لیا گیا، سادہ لباس اہلکار 2 پولیس موبائل اور ایک سفید کار میں آئے تھے، دونوں پولیس موبائل بغیر نمبر پلیٹ کی تھیں، جن پر کسی تھانے کا نام درج نہیں تھا۔
