پشین : بلوچستان کے ضلع میں پولیس لائن کےقریب دھماکے کے نتیجے میں دو بچے جاں بحق اور پانچ پولیس اہلکاروں سمیت 13 افراد زخمی ہوگئے۔
تفصیلات کے مطابق بلوچستان کے ضلع پشین میں پولیس لائن کے قریب دھماکا ہوا، جس کے نتیجے میں دوبچےجاں بحق اور پانچ پولیس اہلکاروں سمیت 13 افرادزخمی ہوگئے۔
پولیس نے بتایا کہ دھماکے سے گاڑی اور موٹرسائیکل تباہ ہوگئی ہے تاہم لاشوں اور زخمیوں کو اسپتال منتقل کردیا گیا ہے، جس کے بعد 13شدیدزخمیوں کو کوئٹہ ریفر کر دیا ہے۔
پولیس کے مطابق علاقے کی ناکہ بندی کردی گئی ہے،جائےوقوعہ سے شواہد اکھٹےکئےجارہے ہیں کہ دھماکہ کس نوعیت کا تھا تاہم تحقیقات جاری ہے۔
وزیرداخلہ محسن نقوی نے پولیس لائنز کے قریب دھماکے کی مذمت کرتے ہوئے 2 بچوں کے جاں بحق ہونے کے واقعے پر اظہار افسوس کیا اور لواحقین سے دلی ہمدردی و اظہار تعزیت کیا۔
محسن نقوی نے کہا کہ معصوم بچوں کو نشانہ بنانے والے دہشت گرد انسان کہلانے کے حقدار نہیں، دہشت گردوں اور سہولت کاروں کے خاتمے تک یہ جنگ جاری رہے گی، یہ پاکستان کی بقا اور نئی نسلوں کو پر امن اور محفوظ پاکستان دینے کی جنگ ہے، قوم اور سیکیورٹی فورسز اس جنگ میں شانہ بشانہ کھڑی ہیں۔
