Tag: پولیس موبائل

کراچی : پولیس موبائل میں کوکنگ آئل لوٹنے والا گینگ دھر لیا گیا، لوٹ مار میں انچارج سی ٹی ڈی سول لائینز ملوث نکلا۔

تفصیلات کے مطابق کراچی میں پولیس موبائل میں کوکنگ آئل لوٹنے والا گروہ پکڑا گیا،۔ پولیس حکام نے بتایا کہ گارڈن ہیڈ کوارٹرز کے قریب چھاپے میں پانچ سے زائد ملزمان کو گرفتار کیا گیا، گرفتار ملزمان میں گودام کا مالک، ملازم اور پولیس اہلکار بھی شامل ہیں۔

پولیس موبائل پر کوکنگ آئل لوٹنے والے میں انچارج سی ٹی ڈی سول لائینز ملوث نکلا ، انچارج سی ٹی ڈی سول لائنز انسپکٹر ظفر اقبال کو گرفتار کرلیا گیا ہے۔

پولیس کا کہنا ہے کہ نیو کراچی انڈسٹریل ایریا تھانے میں مقدمہ درج کرلیا گیا ہے، مقدمے کے متن میں کہا گیا کہ ملزمان کئی ماہ سے کوکنگ آئل لوٹنے کی وارداتیں کرتے تھے، گزشتہ روز سیکٹر 5 جی نیوکراچی سے پولیس موبائل نےسوزوکی چھینی ، پولیس موبائل میں 6 مسلح پولیس اہلکار موجود تھے۔

مقدمے میں کہا کہ سوزوکی میں ٹریکرکی مددسےگارڈن کےعلاقےمیں کارروائی کی گئی، دکان کے باہر سوزوکی مال سمیت موجود تھی، پولیس نے 4ملزمان عثمان،عبدالواحد،واصف ،سعد کو رنگےہاتھوں پکڑا، ملزم سعد نے بھاگنے والے شخص کا نام ارسلان بتایا، جس کے بعد ملزم ارسلان نے میرا رابطہ ظفر اقبال نامی انسپکٹر سے بھی کرایا تھا۔

متن کے مطابق انسپکٹر ظفر اقبال نے بتایا تیل اور گھی چوری کی ہیں اور ظفراقبال نے گارنٹی دی مارکیٹ سے سستا تیل آپ کو فروخت کر رہے ہیں، مفرور ملزم ارسلان انسپکٹر ظفر اقبال کا گن مین اور رشتےدارہے جبکہ گینگ میں دیگر سی ٹی ڈی اہلکار بھی ملوث ہیں۔

پولیس نے بتایا کہ ڈسٹرکٹ سینٹرل میں پولیس موبائل میں مسلح افراد کوکنگ آئل کی گاڑیاں لوٹتے تھے، گزشتہ ماہ درجنوں وارداتیں رپورٹ ہوئیں۔۔ ملزمان پولیس موبائل میں کوکنگ آئل گودام میں لے جاتے تھے۔