Tag: پولیس کا تشدد

لاہور : پولیس نے لانگ مارچ کی کوریچ کرنے والے اے آر وائی نیوز اور دیگرمیڈیا نمائندوں کو تشدد کا نشانہ بنایا، جس پر متعلقہ ایس ایچ او کو معطل کر کے انکوائری شروع کر دی گئی۔

تفصیلات کے مطابق صوبہ پنجاب میں تحریک انصاف کے حقیقی آزادی لانگ مارچ میں پولیس نے ایس ایچ او کی موجودگی میں اے آروائی نیوز کے سینیئر رپورٹر نذیر بھٹی اور کیمرہ مین ‏عثمان پر تشدد کیا۔

کامونکی میں تحریک انصاف کے لانگ مارچ کے لیے بنائے استقبالیہ کیمپ کے پاس پولیس نے میڈیا کی ڈی ایس این جیز ‏ہٹانے پر اصرار کیا۔

جس پر صحافیوں کا کہنا تھا کہ دور سے کوریج نہیں کی جاسکتی، استقبالیہ کیمپ کے پاس گاڑیاں لگانے ‏دی جائیں۔

جس کے بعد ایس ایچ او منظر سعید نے زبردستی اے آروائی نیوز کی گاڑی ہٹانے کی کوشش کی، جب انھیں منع کیا گیا تو ‏ایس ایچ او نے اے آروائی نیوز کے رپورٹر نذیر بھٹی اور کیمرہ مین کے ساتھ دست درازی کی۔

‏جب دیگر میڈیا نمائندگان نے ‏فوٹیج بنانا شروع کی تو چار سے پانچ اہلکاروں نے ان پر بھی تشدد شروع کردیا۔

پولیس اہلکاروں نے میڈیا کی گاڑپوں اور ‏کیمروں پر ڈنڈے برسائے، جس سے گاڑیوں کو نقصان پہنچا اور دو نجی ٹی وی چینلز کے کیمرہ ٹوٹ گئے، جس کے بعد صحافیوں نے ‏پولیس کے رویے کے خلاف احتجاج کیا۔

صحافی نے بتایا کہ پولیس نے دھکا دیا تو دیگرنمائندوں نے فوٹیج بنائی جس پر زدو کوب کیا گیا۔

جس کے بعد کامونکی میں نجی چینل کے صحافیوں پر پولیس تشدد کے معاملے پر مشیر داخلہ پنجاب عمر سرفراز چیمہ نے بتایا کہ متعلقہ ایس ایچ او کو معطل کر کے انکوائری شروع کر دی گئی ہے۔

مشیر داخلہ پنجاب کا کہنا تھا کہ ابتدائی رپورٹ کے مطابق گاڑی ہٹانے کے معاملے پر تلخ کلامی ہوئی۔

وہاڑی: پنجاب پولیس کا شہریوں پر تشدد کا ایک اور واقعہ سامنے آ گیا، تھانہ لڈن پولیس نے چوری کے الزام میں گرفتار خاتون پر شدید تشدد کر کے اسپتال پہنچا دیا۔

تفصیلات کے مطابق تھانہ لڈن پولیس کے چوری کے الزام میں گرفتار خاتون پر تشدد کی رپورٹ منظر عام پر آ گئی، پولیس کے تشدد کی شکار خاتون کو ڈی ایچ کیو اسپتال منتقل کر دیا گیا، جہاں خاتون کا میڈیکل ٹیسٹ کیا گیا، خاتون کی حالت اب تک سنبھل نہیں سکی۔

واقعے کے بعد ڈی ایس پی، ایس ایچ او، انچارج سی آئی اے سمیت 13 ملزم کو گرفتار کر لیا گیا ہے، ملزمان کو آر پی او کی ہدایت پر گرفتار کیا گیا۔

آئی جی پنجاب عارف نواز خان نے لڈن وہاڑی میں خاتون پر تشدد کے واقعہ پر ایس ڈی پی او صدر، وہاڑی طارق پرویز کو معطل کر دیا۔ ایس ڈی پی او صدر وہاڑی کو غیر ذمہ دارانہ رویے اور نا اہلی کے الزامات پر معطل کرتے ہوئے سنٹرل پولیس آفس رپورٹ کرنے کے احکاما ت جاری کیے گئے۔

تازہ ترین خبریں پڑھیں:  پولیس تشدد سے عامر مسیح کی موت کی پوسٹ مارٹم رپورٹ منظر عام پر

ادھر ذرایع کا کہنا ہے کہ گرفتار ڈی ایس پی سمیت دیگر اہل کاروں کو حوالات میں پروٹوکول دیا جا رہا ہے، اہل کاروں کو تصویر جاری کرنے کے بعد لاک اپ سے باہر نکال لیا گیا۔

ذرایع نے مزید بتایا کہ ڈی ایس پی سمیت گرفتار تمام ملازمین کو موبائل فون کی سہولت بھی دی گئی ہے، تھانہ لڈن کو سیل کر دیا گیا ہے، کسی بھی شخص کو اندر جانے نہیں دیا جا رہا ہے۔

دوسری طرف وزیر اعلیٰ پنجاب عثمان بزدار نے واقعے کا نوٹس لیتے ہوئے کہا کہ وہاڑی میں خاتون پر تشدد روایتی پولیس کلچر کی بد ترین مثال ہے۔

انھوں نے کہا کہ ملوث پولیس اہل کاروں کو معطل کرنا کافی نہیں بلکہ بر طرف کیا جائے، پولیس کو کسی صورت بھی تشدد کی اجازت نہیں دی جا سکتی۔