پشاور میں اسمبلی چوک پر پیپلزپارٹی کے احتجاجی مظاہرے پر پولیس کی جانب سے آنسو گیس کی شیلنگ کی گئی جس سے مظاہرین مشتعل ہوگئے اور انہوں نے پی ٹی آئی کے احتجاجی کیمپ کو آگ لگا دی۔
اے آر وائی نیوز پشاور کے نمائندے ظفر اقبال کے مطابق پشاورمیں پیپلزپارٹی کا "صوبہ بچاؤ مہم” احتجاج جاری تھا کہ پشاور اسمبلی چوک پر پولیس نے مظاہرین پر شیلنگ کردی۔
پیپلزپارٹی کے قائدین اور کارکن ریڈ زون میں جمع ہوئے تو ریڈ زون کی خلاف ورزی پر پولیس نے آنسو گیس کی شیلنگ شروع کر دی۔
مشتعل افراد نے تحریک انصاف کے احتجاجی کیمپ کو آگ لگائی۔ پولیس حکام کا کہنا ہے کہ نقاب پوشوں نے ریڈ زون میں داخلے کی کوشش کی جس پر پولیس کو شیلنگ کرنا پڑی۔
احتجاجی ریلی میں پارٹی کے مرکزی سیکریٹری جنرل ہمایوں خان کی تقریر کے دوران پولیس نے آنسو گیس شیلنگ کردی جس سے مظاہرین منتشر ہوگئے۔
بعد ازاں پیپلز پارٹی کے مشتعل کارکنان نے وہاں پر قائم تحریک انصاف کے احتجاجی کیمپ کو آگ لگادی، کیمپ بانی پی ٹی آئی کی رہائی کے لیے لگایا گیا تھا۔
چیئرمین پیپلز پارٹی بلاول بھٹو نے پیپلزپارٹی کے کارکنوں پرتشدد کی مذمت کی اور کہا کہ خیبر پختون خوا حکومت نے پرامن احتجاج روک کر کرپشن چھپانے کی کوشش کی۔ پی ٹی آئی نے نہتے کارکنوں پرتشدد کرکے بزدلی کا مظاہرہ کیا۔
اس حوالے سے اے آر وائی نیوز سے گفتگو کرتے ہوئے تحریک انصاف کے رہنما شیخ وقاص اکرم نے کہا کہ ہمیں کہیں احتجاج کرنے کی اجازت نہیں دی جاتی لیکن ہم نے پیپلزپارٹی کو کےپی میں اجازت دی
انہوں نے کہا کہ یہ کیاطریقہ ہے کہ احتجاج کرکے ہمارے ہی احتجاجی کیمپ پرحملہ کردیا گیا، پیپلزپارٹی کا احتجاج نہیں شرارت تھی، ہمارے کیمپ پر حملےکی فوٹیج موجود ہیں۔
