کراچی: پولیس نے سعیدآباد میں کارروائی کرتے ہوئے دو بھتہ خوروں کو گرفتار کرلیا ہے۔
پولیس کے مطابق گرفتار ملزمان قتل ، اقدام قتل اور بھتہ خوری سمیت کئی وارداتوں میں مطلوب تھے ، ملزمان کا تعلق سہیل خوف کے گروپ سے ہے، جو پیسے لیکر قتل کی وارداتیں کرتے تھے۔
گرفتار افراد سے اسلحہ اور دستی بم بھی برآمد ہوا ہے۔
دوسری جانب سیکیورٹی اداروں نے منگھوپیر گرم چشمہ کے قریب سرکاری اسپتال میں ملزم کی موجودگی کی اطلاع پر چھاپہ مارا، کارروائی کے دوران کوئی گرفتاری عمل میں نہیں آئی۔
لاہور: حساس نے اداروں نے پولیس کے ساتھ مشترکہ کارروائی کرتے ہوئے برکی روڈ پر تحریکِ طالبان فضل اللہ گروپ کے تین دہشت گردوں کو ہلاک کردیا ہے۔
لاہور برکی روڈ پر مکان میں حساس اداروں کی کارروائی میں تین دہشت گرد مارے گئے، ہلاک ہونے والے دہشت گردوں کا تعلق فضل اللہ گروپ سےہے اور تینوں دہشت گردوں کا تعلق باجوڑ ایجنسی سے بتایا گیا ہے۔
ذرائع کے مطابق دہشتگردوں نے برکی روڈ پر ایک مکان کرائے پر لے رکھا تھا، واقعے سے قبل مبینہ دہشتگردوں کو فضل اللہ سے رابطے کرنے کے دوران حساس اداروں نے اسپاٹ کیا اور برکی روڈ پر موٹرسائیکل پر فرار ہونے والے مشتبہ دہشتگردوں کومقابلے کے بعد ہلاک کردیا ۔
ساتھیوں کی ہلاکت پر دہشت گرد روح اللہ نےخود کو دھماکے سےاڑالیا، دہشتگردوں کے قبضے سے اسلحہ، موٹرسائیکل اور شناختی کارڈ برآمد ہوئے ہیں۔
روح اللہ کو واہگہ بارڈر دھماکے کا ماسٹر مائنڈ بھی بتایا جارہا ہے۔
کراچی: پولیس کی کارروائیوں میں دو ڈاکو سمیت چار ملزمان ہلاک ہوگئے جبکہ اسٹریٹ کرائم میں ملوث دو ملزمان کو گرفتار کرلیا گیا ہے۔
کراچی کے علاقے ڈیفنس خیابان بادبان میں گھر میں ڈکیتی کی نیت سے داخل ہو نے والے ملزمان کی اطلاع پر پولیس نے چھاپہ مارا تو ملزمان نے پولیس پر فائرنگ شروع کردی، پولیس کی جوابی کارروائی میں دو ڈاکو ہلاک ہو گئے ہیں، ملزمان کی لاشیں پوسٹ مارٹم کے لئے اسپتال منتقل کر دی گئی ہیں۔
کراچی کے علاقے لیاری چاکیواڑہ میں خفیہ اطلاع پر پولیس نے کاروائی کی تو ملزمان نے پولیس پر فائرنگ شروع کردی ، فائرنگ کے تبادلہ میں دو ملزمان ہلاک ہوگئے، ہلاک ملزمان کے قبضہ سے اسلحہ برآمد کیا گیا ہے۔
کراچی کے علاقے ملیر سعودآباد میں اسٹریٹ کرائم میں ملوث دو ملزمان گرفتار کر لئے گئے، جن کے قبضہ سے اسلحہ اور موٹر سائیکل بر آمد کرلی گئی، پولیس نے مقدمہ درج کرکے تفتیش کا آغاز کر دیا ہے۔
پشاور : پولیس نے کارروائی میں بھاری تعداد میں اسلحہ اور کارتوس برآمد کرلئے ، صدر تھانے کی حدود میں دہشتگردوں کی فائرنگ سے ایک اہلکار جاں بحق ہوگیا۔
پشاورکے علاقے بڈھ بیر میں پولیس نے اسلحے سے بھری گاڑی پکڑ لی، گاڑی سے آٹھ کلاشنکوف، تین رائفل، بیس پستول، شارٹ اور بائیس ہزار کارتوس برآمد ہوئے۔
ایس پی شاکر بنگش کے مطابق بڈھ بیر کے مختلف علاقوں میں ٹارگٹڈ کارروائیوں میں تیرہ ملزم گرفتار کرلئے، جن کے قبضے سے بھاری تعداد میں اسلحہ اور منشیات برآمد ہوئی ہے، ملزمان سنگین جرائم میں ملوث تھے، دوسری جانب بنوں تھانہ صدر کی حدود میں ڈسٹرکٹ ہیڈکواٹر کے سامنے مسلح افراد نے گاڑی پر فائرنگ کرکے ایک شخص کو قتل کردیا۔
