کراچی : پولیس یونیفارم میں اغواء ، ہاؤس رابری اور دیگر سنگین وارداتوں میں ملوث پانچ رکنی گینگ کو گرفتار کرلیا گیا۔
تفصیلات کے مطابق کراچی میں کورنگی پولیس نے خفیہ اطلاع پر کارروائی کرتے ہوئے پولیس یونیفارم پہن کر اغوا اور ہاؤس رابری میں ملوث 5 رکنی گینگ کو گرفتار کرلیا۔
ایس ایس پی کورنگی طارق نواز نے بتایا کہ ملزمان کی شناخت علی عمران شیخ، وقار، انیل، دھیرج اور فرزوق شاہ کے ناموں سے ہوئی، گرفتار ملزمان سے اسلحہ برآمد کیا گیا ہے۔
طارق نواز کا کہنا تھا کہ ملزمان نے 6 جنوری کو زمان ٹاؤن میں 16 لاکھ روپے کی ڈکیتی کی جبکہ سال 2021 عیدگاہ کی حدود میں مندر پر فائرنگ کر کے 5 لاکھ روپے کا بھتہ وصول کیا۔
ایس ایس پی نے بتایا کہ ملزمان نے8 اگست2024 کو تاجر سلمان بٹ کو اغوا کیا، مغوی کو حبس بے جا میں رکھ کر10 لاکھ روپے تاوان وصول کیا گیا۔
اس کے علاوہ ملزمان نے سال 2024 میں ہندوشخص کے آئی ٹی سینٹرمیں نقب زنی کی اور شنکرکوبلیک میل کر کے2 لاکھ روپے وصول کیے۔
انھوں نے کہا کہ نومبر2024 چکرہ گوٹھ سے بابر نامی شخص کو اغواکر کے بعد میں چھوڑا گیا، گرفتار ملزمان 2025 کی سب سے بڑی واردات کی منصوبہ بندی کر رہے تھے۔
ایس ایس پی کورنگی کے مطابق ملزمان نے انکشاف کیا کہ ان کی ٹیم کی تیاری مکمل تھی ، اگر ہم گرفتار نہ ہوتے تو اس واردات میں بھی کامیابی ملتی۔
گرفتار ملزمان کا کراچی کے مختلف علاقوں میں وارداتوں کا انکشاف کیا ، ملزمان سرکاری اداروں کا یونیفارم پہن کروائر لیس سیٹ دکھا کر گھروں میں داخل ہوتے تھے۔
