کراچی : سپر ہائی وے پر باڑہ مارکیٹ کے قریب مبینہ پولیس مقابلے میں کالعدم تحریک طالبان کے تین دہشت گرد مارے گئے،جبکہ شہر کے مختلف علاقوں میں کاروائیوں کے دوران پینتیس سے زائد ملزمان کو گرفتار کرلیاگیا.
تفصیلات کے مطابق سپر ہائی وے پر واقع باڑہ مارکیٹ کے قریب رات گئےدہشت گردوں اور پولیس کے درمیان ہونےوالی فائرنگ کے تبادلے میں تین دہشت گرد مارے گئے.
ایس ایس پی ملیر راؤ انوار کا کہنا ہے کہ مارے گئے تین میں سے دو دہشت گردوں کی شناخت اقبال اور شاہ محمد کے ناموں سے ہوئی اور تینوں کے قبضے سے کلاشنکوف،ہینڈ گرنیڈ اور دھماکہ خیز مواد برآمد ہوا ہے.
راؤ انوار کا مزید کہنا ہے کہ مارے گئے دہشت گردوں کا تعلق کالعدم تحریک طالبان پاکستان سواتی گروپ سے تھا.
دوسری جانب چاکیواڑہ پولیس نے لیاری کے علاقے سنگولین اور رانگیواڑہ میں چھاپہ مار کاروائی کے دوران لیاری گینگ وار عزیز بلوچ کے دو کارندے حیدر داڈا اور عبداللہ کو گرفتار کر کے اسلحہ اور منشیات برآمد کر لی.
پولیس کا کہنا ہے کہ دونوں ملزمان ،بھتہ خوری اور ٹارگٹ کلنگ سمیت متعدد وارداتوں میں پولیس کو مطلوب تھے،جبکہ ملزم حیدر ڈاڈا حال ہی میں ایران سے کراچی پہنچا ہے .
ادھرلیاقت آباد کے علاقے بندھانی کالونی،عزیز آباد کے علاقےحسین آباد اور نیو کراچی کے مختلف علاقوں میں پولیس نے سرچ آپریشن کرتے ہوئے پینتیس سے زائد مشتبہ افراد کو گرفتار کر لیا.
