ریاض: سڑک پر ٹائر اسکریچنگ کرنے والے نوجوان کو پستول تان کر روکنے والے پولیس اہلکار کو اعلیٰ اعزاز سے نوازا گیا، شہری بھی مذکورہ پولیس اہلکار کی تعریف کر رہے ہیں۔
سعودی ویب سائٹ کے مطابق سعودی عرب کی الدرعیہ کمشنری میں ایک ٹریفک اہلکار نے مقامی نوجوان کو ٹائر اسکریچنگ اور فرار ہونے سے روکنے کے لیے پستول تان لیا، ویڈیو سوشل میڈیا پ وائرل ہوگئی۔
ویڈیو میں دیکھا جاسکتا ہے کہ ایک نوجوان الدرعیہ میں ٹائر اسکریچنگ کر رہا ہے، پولیس اہلکار نے اسے روکا اور جب اس نے فرار ہونے کی کوشش کی تو اس پر پستول تان لیا۔
سوشل میڈیا پر صارفین نے پولیس اہلکار کے فوری اور بروقت اقدام کو سراہتے ہوئے کہا کہ اگر پولیس اہلکار ٹائر اسکریچنگ کرنے والے نوجوان کو نہ روکتا تو راہ گیروں کی جانیں خطرے میں پڑجاتیں، پولیس اہلکار نے جو اقدام کیا وہ قابل تعریف ہے۔
اس سے قبل محکمہ ٹریفک نے اپنے بیان میں کہا کہ ریاض ٹریفک پولیس نے اس گاڑی کے ڈرائیور کو گرفتار کرلیا جو الدرعیہ میں ٹائر اسکریچنگ کر رہا تھا اور راہ گیروں کی سلامتی کو خطرے میں ڈالے ہوئے تھا۔
سوشل میڈیا پر ایک اور تصویر وائرل ہے جس میں ریاض پولیس کے ڈائریکٹر میجر جنرل فہد المطیری اور ریاض ٹریفک کے قائم مقام ڈائریکٹر بریگیڈیئر محمد الدوسری ٹائر اسکریچنگ کرنے والے نوجوان کو روکنے والے ٹریفک اہلکار عبد السلام الصنیتان کو اعزاز دے رہے ہیں۔
