کراچی : شہر قائد کے مختلف علاقوں میں پولیس نے کارروائیاں کرتے ہوئے 9 ملزمان کو گرفتار کرکے اسلحہ برآمد کرلیا۔
تفصیلات کے مطابق کراچی کے علاقے ماڑی پور روڈ پر دُعا ہوٹل کے قریب کلری پولیس اور ڈاکوؤں میں مقابلے کے دوران ایک ڈاکو زخمی ہوا جسے گرفتار کرلیا گیا۔
پولیس کے مطابق ڈاکو کے قبضے سے اسلحہ اور مسروقہ سامان برآمد کرلیا جبکہ ملزم کا ساتھی فرار ہونے میں کامیاب ہوگا۔
حیدری پولیس نے چار اسٹریٹ کرمنلز کو گرفتار کرکے ان سے اسلحہ، مسروقہ موٹرسائیکل، موبائل فونز، نقدی ودیگر قیمتی سامان برآمد کیا، ملزمان کے خلاف مقدمہ درج کرکے تفتیش شروع کردی گئی۔
رضویہ پولیس نے کارروائی کرکے ڈکیتی کے دوران شہری کو زخمی کرنے والے ملزم کو گرفتارکرکے اس کے خلاف مقدمہ درج کرلیا۔
سکھن پولیس نے جرائم پیشہ عناصروں کے خلاف کریک ڈاؤن کے دوران تین ملزمان گرفتار کیے، ملزمان سے چرس، اسلحہ اور نقدی برآمد کیں۔
یاد رہے کہ گزشتہ روز شہرِ قائد کی پولیس نے مبینہ جعلی مقابلے میں ساٹھ سالہ شخص کو ڈاکو قرار دے کر مار دیا تھا، پولیس نے دعویٰ کیا کہ مقابلے میں مارا جانے والا ڈاکو تھا۔
کراچی : شہر قائد کے مختلف علاقوں میں پولیس نے کارروائیاں کرتے ہوئے 13 ملزمان کو گرفتار کرکے اسلحہ برآمد کرلیا۔
تفصیلات کے مطابق کراچی کےعلاقے گڈاپ میں مبینہ پولیس مقابلے کے بعد ایک ملزم کو زخمی حالت میں گرفتار کرلیا گیا، ملزم کے دوساتھی موقع سے فرار ہوگئے۔
دوسری جانب شہر قائد کے علاقے اسٹیل ٹاؤن میں پولیس نے مقابلے کے بعد ڈاکو کو زخمی حالت میں اسلحے سمیت گرفتار کرلیا۔
ایس ایس پی عرفان بہادر کے مطابق ملزم نے اسٹیل ٹاؤن میں ماں بیٹے سے سونا، نقدی اورموبائل لوٹا تھا، ملزمان کی سی سی ٹی وی فوٹیج منظرعام پر آئی تھی، ملزم دو ہزارتیرہ میں بھی گرفتارہوا تھا۔
کراچی کے علاقے مڈل کالونی میں پولیس نے بھتہ خور کو گرفتارکیا گیا ، بھتہ خور ملزم سلمان سے اسلحہ بھی برآمد ہوا۔
ادھر تیموریہ میں پولیس نے جرائم پیشہ ملزمان کے خلاف کریک ڈاؤن کے دوران دس ملزمان کو حراست میں لے لیا، گرفتار ملزمان میں چھ گٹکا فروش اور تین منشیات فروش شامل ہیں۔
کراچی: شہر قائد میں پاکستان کوارٹرز کے مکینوں کی بے دخلی کے خلاف احتجاجی مظاہرے کے دوران کئی افراد کو حراست میں لے لیا گیا۔
تفصیلات کے مطابق پاکستان کوارٹرز کے رہائشیوں کی بے دخلی کے خلاف احتجاجی مظاہرہ کرنے والے متعدد افراد کو پولیس نے حراست میں لے لیا۔
پولیس کی جانب سے مظاہرین کو منتشر کرنے کے لیے لاٹھی چارج اور واٹرکینن کا استعمال بھی کیا گیا۔
کراچی پولیس چیف
ایڈیشنل آئی جی کراچی ڈاکٹرامیرشیخ کا کہنا ہے کہ سندھ حکومت کے احکامات پرپاکستان کوارٹرزمیں آپریشن روک لیا گیا۔
کراچی پولیس چیف نے کہا کہ واقعے کی تحقیقات کے لیے کمیٹی تشکیل دے دی گئی ہے، ڈی آئی جی سی آئی اے اورڈی آئی جی ایسٹ پرمشتمل کمیٹی بنانے کا اعلان کیا ہے۔
مظاہرین کا خرم شیرزمان کی گاڑی پرپتھراؤ
پاکستان تحریک انصاف کے رکن سندھ اسمبلی خرم شیرزمان پاکستان کوارٹرز پہنچے تو مشتعل مظاہرین نے ان کی گاڑی پرپتھراؤ کیا۔
پاکستان کوارٹرز کے مکینوں نے رکاوٹیں لگا کر داخلی راستے بلاک کردیے اور حکومت کے خلاف شدید نعرے بازی کی۔ پرتشدد احتجاجی مظاہرے کے دوران زخمی ہونے والے چار پولیس اہلکاروں کو اسپتال منتقل کردیا گیا۔
اسپتال ذرائع کا کہنا ہے کہ زخمیوں میں سپاہی رضوان، منیر، تنویر اور زمان شامل ہیں۔
وزیراعلیٰ سندھ مراد علی شاہ
وزیراعلیٰ سندھ نے پاکستان کوارٹرز کے معاملے کا نوٹس لیتے ہوئے آئی جی سندھ کو فوری پولیس واپس بلانے کا حکم دے دیا۔
مراد علی شاہ نے آئی جی سندھ پولیس سید کلیم امام کو ٹیلی فون کیا اور کہا کہ عوام کے ساتھ ایسا رویہ انتہائی تکلیف دہ ہے، یہ کیا ہورہا ہے؟ ختم کریں، یہ عوام کی پریشانی کا باعث ہے۔
فیصل واوڈا
وفاقی وزیربرائے آبی وسائل فیصل واوڈا نے اے آروائی نیوز سے گفگتوکرتے ہوئے کہا کہ آئی جی پولیس اورکراچی پولیس چیف ذمہ دار افسران ہیں، نہیں سمجھتا اس معاملے میں پیپلزپارٹی کی مداخلت نہ ہو۔
فیصل واوڈا نے کہا کہ صوبائی حکومت معاملے پرکنفیوزنہ کرے، شہریوں سے مذاکرات ہوتے اور معاملہ حل کیا جاتا۔
وفاقی وزیربرائے آبی وسائل نے کہا کہ وفاق کا اس معاملے پرکیا تعلق بنتا ہے، صوبائی حکومت کو دیکھنا چاہیے تھا، وفاقی وزیرکے طورپرپولیس سے معاملے پربات کروں گا۔
مشیراطلاعات سندھ مرتضیٰ وہاب
مشیر اطلاعات سندھ مرتضیٰ وہاب نے اے آروائی نیوز سے گفتگو کرتے ہوئے کہا کہ پولیس کا رویہ غلط تھا، وزیراعلیٰ سندھ لاٹھی چارج کا نوٹس لیا ہے۔
مرتضیٰ وہاب نے کہا کہ جس طرح پولیس نے کارروائی کی ہے اس کی تحقیقات ہونی چاہیے، پولیس نے معاملے کوغلط اندازمیں ہینڈل کیا ہے۔
مشیر اطلاعات سندھ نے کہا کہ پولیس علاقے میں موجود ہے ابھی کوئی کارروائی نہیں ہو رہی، اگر پولیس کارروائی کر بھی رہی ہے تو انہیں روکنے کے احکامات دیں گے۔
فاروق ستار
اے آر وائی نیوز سے گفتگو کرتے ہوئے ایم کیو ایم پاکستان کے رہنما فاروق ستار نے کہا کہ ناجائز قابضین نہیں، سابقہ حکومتوں نے انہیں یقین دہانی کرائی۔
فاروق ستار نے کہا کہ سابقہ حکومتوں نےعدالت سے حقائق چھپائے، اب حکومت کی ذمےداری ہے ان سے متعلق پالیسی بنائے۔
ایم کیو ایم پاکستان کے رہنما نے کہا کہ گھروں سے بے دخلی کی سازش حکومت کے خلاف ہے۔
اسلام آباد: ڈپلومیٹک انکلیومیں پولیس سے بدتمیزی کرنے والی خاتون ڈاکٹرشہلا کو گرفتار کرکے تھانے منتقل کردیا گیا۔
تفصیلات کے مطابق اسلام آباد میں ڈپلومیٹک انکلیومیں پولیس کو دھمکیاں دینے والی خاتون ڈاکٹر شہلا کو راولپنڈی ڈی ایچ اے فیزٹو سے گرفتار کرکے تھانہ وومن اسلام آباد منتقل کردیا گیا۔
خاتون کے خلاف کار سرکار میں مداخلت اور نازیبا الفاظ استعمال کرنے کا مقدمہ درج تھا۔
وزیرمملکت برائے داخلہ شہریار آفریدی نے واقعہ کا نوٹس لیتے ہوئے پولیس کو واقعے کی تفتیشی رپورٹ جلد پیش کرنے کی ہدایت کی تھی۔
شہریار آفریدی کا کہنا تھا کہ خاتون کے خلاف قانون کےمطابق کاروائی کی جائے، نئے پاکستان میں کوئی وی آئی پی نہیں، سب قانون کے تابع ہیں۔
وزیرمملکت برائے داخلہ کا کہنا تھا کہ پولیس ہمارا اپنا ادارہ ہے، حکومت فرض شناسی سے کام کرنے والوں کے ساتھ ہے۔
یاد رہے کہ گزشتہ روز اسلام آباد میں بغیرنمبر پلیٹ والی کار میں سوار خاتون نے ڈپلومیٹک انکلیو میں داخل ہونے کی کوشش کی تھی اور روکنے پرپولیس اہلکاروں کو دھمکیاں بھی دی تھیں۔
ابو ظہبی : پولیس نے دوران پرواز بزنس کلاس میں سفر کرنے والے اماراتی بھائیوں کے18 ہزار درہم سے زائد کی رقم چوری ہونے کے الزام میں مصری فضائی میزبان کو گرفتار کرلیا۔
تفصیلات کے مطابق پولیس نے جہاز کے عملے میں ایک فضائی میزبان کو بزنس کلاس میں سفر کرنے والے تین اماراتی بھائیوں کے سامان سے بھارتی رقم چوری کرنے کے الزام میں گرفتار کرکے میں پیش کردیا تھا۔
غیر ملکی خبر رساں ادارے کا کہنا تھا کہ تینوں اماراتی بھائی رواں برس جون میں تھائی لینڈ سے واپس متحدہ عرب امارات جارہے تھے کہ دوران پرواز اپنے بیمار والد کی تیمار داری کے لیے اپنی جگہ سے اٹھے تھے اور واپس آئے تو 18500 درہم کی خطیر رقم چوری ہوچکی تھی۔
مقامی میڈیا کا کہنا تھا کہ تینوں اماراتی بھائیوں نے بٹوے میں سے رقم چوری ہونے کی اطلاع عملے کے سپر وائزر اور پولیس کو دی۔
اماراتی میڈیا کا کہنا تھا کہ پولیس نے تحقیقات کے دوران جہاز میں میزبانی کرنے والے 37 سالہ مصری شخص کو والٹ سے ملنے والے انگلیوں کے نشانوں سے مماثلت کے بعد چوری کے الزام میں گرفتار کیا گیا تھا۔
اماراتی میڈیا کا کہنا تھا کہ بدھ کے روز دبئی کورٹ میں سماعت کے دوران فضائی میزبان نے رقم چوری کرنے کے الزامات کی تردید کی تھی۔
لاہور: نیب کی ٹیم نے اپوزیشن لیڈر شہبازشریف کو پارلیمنٹ ہاؤس پہنچا دیا جہاں وہ قومی اسمبلی کے اجلاس میں شرکت کریں گے۔
تفصیلات کے مطابق اپوزیشن لیڈر شہبازشریف کو پی آئی اے کی پرواز پی کے 652 سے لاہور سے اسلام آباد پہنچایا گیا، نیب کی دو رکنی ٹیم ان کے ہمراہ ہے۔
اپوزیشن جماعتوں کی جانب سے مطالبے پراسپیکرقومی اسمبلی اسد قیصر نے شہبازشریف کے پروڈکش آرڈر جاری کیے تھے، شہبازشریف آج قومی اسمبلی کے اجلاس میں شرکت کریں گے۔
پولیس اور نیب راولپنڈی کی ٹیمیں شہبازشریف کو ایئرپورٹ سے پارلیمنٹ تک لائیں، نیب ٹیم نے شہبازشریف کو قومی اسمبلی کے سارجنٹ آرمز کے حوالے کردیا، قومی اسمبلی اجلاس کے بعد سارجنٹ ایٹ آرمز شہبازشریف کو نیب ٹیم کے حوالے کریں گے۔
شہباز شریف نیب حکام کی اجازت کے بغیرکسی سے نہیں مل سکیں گے۔ اجلاس ختم ہونے کے بعد نیب ٹیم دوبارہ لاہور نیب آفس لے آئے گی۔
واضح رہے کہ نیب لاہور نے رواں ماہ 5 اکتوبر کو شہبازشریف کو صاف پانی کیس میں طلب کیا تھا تاہم ان کی پیشی پر انہیں آشیانہ ہاؤسنگ اسکینڈل میں کرپشن کے الزام میں گرفتار کرلیا گیا تھا۔
کراچی: صوبہ سندھ کے دارالحکومت کراچی میں پولیس کے 3 زونز میں اعلیٰ عہدوں پر 35 اسامیاں خالی ہیں۔ کراچی پولیس کے آپریشن اور تفتیشی شعبوں میں بیشتر عہدوں پر تعیناتیاں نہ ہوسکیں۔
تفصیلات کے مطابق کراچی پولیس کی کارکردگی بہتر نہ ہونے کی وجوہات سامنے آگئیں۔
کراچی پولیس کے 3 زون میں اعلیٰ عہدوں پر 35 اسامیاں خالی ہیں جبکہ کراچی پولیس کے آپریشن اور تفتیشی شعبوں میں بیشتر عہدوں پر تعیناتیاں نہ ہوسکیں۔
ایس ایس پی ڈسٹرکٹ ساؤتھ کا عہدہ خالی ہے اور عارضی چارج ایس ایس پی سٹی کے پاس ہے۔ کئی ماہ سے ایس پی کلفٹن کے عہدے پر کوئی تعینات نہیں۔ ایس پی کلفٹن کی ذمے داریاں ایس پی صدر عبد اللہ احمد دیکھ رہے ہیں۔
ایس پی شہلا قریشی کے بعد کسی کو ایس پی سٹی تعینات نہیں کیا گیا۔ ایس پی سٹی کا عارضی چارج ایس پی لیاری افتخار لودھی کے پاس ہے۔
دوسری جانب ڈسٹرکٹ ویسٹ میں تینوں سب ڈویژنز میں کوئی افسر تعینات نہیں۔ ایس پی اورنگی، بلدیہ اور سائٹ ایریا کا اضافی چارج ڈاکٹر رضوان کے پاس ہے۔
ڈسٹرکٹ سینٹرل میں بھی ایس پی گلبرگ کا عہدہ خالی ہے۔ ایس پی جان محمد برہمانی کے جانے کے بعد کسی کو تعینات نہیں کیا گیا۔
ایس پی نیو کراچی کے عہدے پر بھی کسی افسر کو تعینات نہیں کیا گیا۔ ایس پی نیو کراچی کا عارضی چارج ایس پی لیاقت آباد شبیر بلوچ کے پاس ہے۔ ایس ایس پی جہانزیب نذیر کی خدمات گزشتہ روز وفاق کے سپرد کی جاچکی ہیں۔ جہانزیب نذیر ایس ایس پی ایسٹ تعینات تھے۔
ڈسٹرکٹ کورنگی میں ایس پی شاہ فیصل کا عہدہ خالی ہے۔ ایس پی شاہ فیصل کی ذمےداریاں ایس پی لانڈھی شعبان خان دیکھ رہے ہیں۔ ایس پی سہراب گوٹھ کا عارضی چارج ایس پی گڈاپ اعظم جمالی کے پاس ہے۔
ایس پی انوسٹی گیشن ایسٹ ٹو کا چارج بھی ایس پی گڈاپ اعظم جمالی کے پاس جبکہ ایس پی انویسٹی گیشن ایسٹ 3 کا عارضی چارج ایس پی ملیر عبد اللہ میمن کے پاس ہے۔
سرگودھا : صوبہ پنجاب کے شہرسرگودھا میں تیزرفتار بس اور اسکول وین میں تصادم کے نتیجے میں 5 طالبات اور ڈرائیور سمیت 7 افراد جاں بحق ہوگئے۔
تفصیلات کے مطابق سرگودھا کی تحصیل بھلوال میں اسکول وین طالبات کو لے کر جا رہی تھی کہ سالم انٹرچینج کے قریب تیز رفتار بس سے ٹکرا گئی۔
افسوس ناک حادثے کے نتیجے میں 5 طالبات اور وین ڈرائیورسمیت 7 افراد جان کی بازی ہار گئے۔
حادثے کی اطلاع ملتے ہی پولیس اور ریسکیو ٹیمیں جائے وقوعہ پرپہنچیں اور زخمی ہونے والی طالبات کو ٹی ایچ کیو بھلوال پہنچا دیا گیا جہاں انہیں طبی امداد دی جا رہی ہے۔
پولیس حکام کا کہنا ہے کہ حادثے کے فوری بعد مشتعل افراد نے بس کو آگ لگا دی تاہم بس ڈرائیور موقع سے فرار ہونے میں کامیاب ہوگیا۔
پولیس کا کہنا ہے کہ حادثہ تیزرفتاری کے باعث پیش آیا، حادثہ اس قدر شدید تھا کہ متعدد طالبات کو وین کاٹ کر نکالنا پڑا۔
پولیس نے حادثے کی تحقیقات شروع کردی ہیں اور بس اور وین کو قبضے میں لے لیا ہے۔
کراچی : آئی جی سندھ ڈاکٹر سید کلیم امام نے کہا ہے کہ سندھ پولیس نے ضمنی انتخابات کے لئے سیکیورٹی پلان تیار کرلیا ہے، سیکیورٹی اقدامات کو ہرسطح پر غیر معمولی بنایا جائے گا۔
یہ بات انہوں نے کراچی میں میڈیا سے گفتگو کرتے ہوئے کہی، آئی جی سندھ نے کہا کہ پولینگ اسٹیشنوں پر سیکیورٹی انتہائی ٹھوس اور مؤثر بنانے کی ہدایت جاری کردی گئیں ہیں.
اداروں کے درمیان روابط مضبوط اور پائیدار بنائے جائیں اور سیاسی قائدین و رہنماؤں سمیت کارکنان سے تعاون ممکن بنایا جائے۔
کلیم امام نے مزید کہا کہ بیلٹ باکسز کی ترسیل کے اقدامات کو ہر لحاظ سے محفوظ بنایا جائے گا، حساس پولنگ اسٹیشنز پر کمانڈوز کو ذمہ داریاں تفویض کی جائیں گی۔
واضح رہے کہ ملک بھر میں قومی اور صوبائی اسمبلی کے پینتیس حلقوں میں ضمنی انتخاب کا میدان آج بروز اتوار چودہ اکتوبر کو سجے گا۔ ضمنی انتخابات کیلئے641 امیدوار میدان میں ہیں۔ ایک ہزار سات سو استائیس پولنگ اسٹیشنز حساس قرار دے دئیے گئے ہیں۔
کسی بھی ناخوشگوار واقعے سے نمٹنے کیلئے پولنگ اسٹیشنزپر فوج تعینات ہوگی، فوج کی تعیناتی کا فیصلہ آئین کے آرٹیکل 220 اور 245 کے تحت کیا گیا ہے، انتخابات کیلئے اسلام آباد انتظامیہ نے رینجرز کی مدد طلب کرلی۔
