ARYNews.tv | Urdu – Har Lamha Bakhabar

Tag: پولیو ورکرز

  • پولیو ورکرز پر حملوں کی صورت میں ضلعی انتظامیہ قانونی کارروائی کرے: وزیر اعظم

    پولیو ورکرز پر حملوں کی صورت میں ضلعی انتظامیہ قانونی کارروائی کرے: وزیر اعظم

    اسلام آباد: وزیر اعظم عمران خان کی زیر صدارت انسداد پولیو مہم کے حوالے سے جائزہ اجلاس میں وزیر اعظم نے ہدایت کی کہ ضلعی انتظامیہ پولیو ورکرز پر حملوں کی صورت میں قانونی کارروائی کی ذمہ داری لیں۔

    تفصیلات کے مطابق وزیر اعظم عمران خان کی زیر صدارت انسداد پولیو مہم کے حوالے سے جائزہ اجلاس ہوا، اجلاس میں ڈاکٹر فیصل سلطان، ڈاکٹر نوشین حامد، چیف سیکریٹریز، اور 30 سے زائد ضلعی ڈپٹی کمشنرز بذریعہ ویڈیو لنک شریک ہوئے۔

    وزیر اعظم کا کہنا تھا کہ انسداد پولیو کے لیے کاوشوں پر خراج تحسین پیش کرتا ہوں، پولیو ورکرز مشکل علاقوں تک پہنچ کر قومی خدمت سر انجام دے رہے ہیں۔

    انہوں نے کہا کہ پولیو ورکرز خصوصی تعریف کے مستحق ہیں، بہترین کارکردگی پر پولیو ورکرز کے لیے انعامات کا پلان مرتب کیا جائے۔

    وزیر اعظم کا کہنا تھا کہ کم منتقلی والا سیزن پولیو کے خاتمے کے لیے موزوں ترین وقت ہے، ہم سب کو مل کر پولیو وائرس کا خاتمہ کرنا ہے۔

    وزیر اعظم نے چیف سیکریٹریز اور ڈپٹی کمشنرز کو انسداد پولیو اقدامات مزید مؤثر بنانے کی ہدایت دیتے ہوئے کہا کہ ضلعی انتظامیہ پولیو ورکرز پر حملوں کی صورت میں قانونی کارروائی کی ذمہ داری لیں۔

    انہوں نے کہا کہ بچوں کے عمومی بچاؤ کے ٹیکوں اور انسداد پولیو مہم کو ساتھ چلایا جائے، اومیکرون کے پیش نظر ویکسی نیشن مہم کو مزید بڑھایا جائے۔

  • کراچی: بااثر افراد لیڈی پولیو ورکر کو ہراساں کرنے لگے

    کراچی: بااثر افراد لیڈی پولیو ورکر کو ہراساں کرنے لگے

    کراچی: شہر قائد میں بااثر افراد کی جانب سے لیڈی پولیو ورکر کو ہراساں کرنے کا واقعہ پیش آیا ہے، خاتون داد رسی کے لئے اے آر وائی نیوز کے دفتر پہنچ گئی ہے۔

    تفصیلات کے مطابق گلشن معمار سے تعلق رکھنے والی خاتون نے اے آر وائی نیوز کو بتایا کہ بااثر افراد رات میں گھر میں زبردستی گھس کر غیراخلاقی حرکتیں کرتےہیں ، بااثر افراد دوستی کا کہتےہیں، انکار پر آئے روز گھر میں چوریاں کرائی جاتی ہیں۔

    متاثرہ خاتون نے بتایا کہ مجھے اور میرے کمسن بیٹےکو قتل کی دھمکیاں دی جارہی ہیں، میرے والد کا کچھ عرصہ قبل انتقال ہوچکا، بیٹے کے ساتھ اکیلے رہتی ہو، پہلےگھر میں کپڑے فروخت کرتی تھی لیکن تمام چیزیں چوری کرادی گئیں ہیں۔

    یہ بھی پڑھیں:  باہمت لڑکی تعلیم اور گھر کی کفالت کے لیے پولیو ورکر بن گئی

    متاثرہ لیڈی پولیو ورکر کا کہنا تھا کہ شکایت لیکر گلشن معمار تھانےگئی، کوئی سنوائی نہیں ہوئی، آئی جی سندھ اور ایڈیشنل آئی جی کراچی با اثرافراد کےخلاف کارروائی کریں۔

  • دور افتادہ علاقوں کے پولیو ورکرز کو موٹر سائیکلیں فراہم کردی گئیں

    دور افتادہ علاقوں کے پولیو ورکرز کو موٹر سائیکلیں فراہم کردی گئیں

    اسلام آباد: حکومت پاکستان کی جانب سے دور افتادہ علاقوں اور وسیع علاقہ کور کرنے والے انسداد پولیو ورکرز کو موٹر سائیکلیں فراہم کردی گئیں۔

    تفصیلات کے مطابق حکومت نے انسداد پولیو ورکرز کی حوصلہ افزائی کے لیے احسن اقدام کرتے ہوئے پولیو ورکرز کو موٹر سائیکلیں فراہم کر دیں۔ ذرائع کا کہنا ہے کہ موٹر سائیکل دور افتادہ علاقوں اور وسیع علاقہ کور کرنے والے پولیو ورکرز کو دی گئی ہیں۔

    ذرائع کا کہنا ہے کہ انسداد پولیو ورکرز کو موٹر سائیکل 2 مراحل میں فراہم کی جائیں گی، پہلے مرحلے میں 12 سو 54 موٹر سائیکلیں دی جائیں گی۔

    وفاقی دارالحکومت اسلام آباد کے انسداد پولیو ورکرز کو 42 موٹر سائیکلیں اور آزاد کشمیر کے انسداد پولیو ورکرز کو 376 موٹر سائیکلیں دی گئی ہیں۔ اسی طرح گلگت بلتستان میں 164 جبکہ قبائلی اضلاع کے انسداد پولیو ورکرز کو 672 موٹر سائیکلیں فراہم کی گئیں۔

    ذرائع کے مطابق موٹر سائیکلوں کی خریداری کے لیے فنڈ حکومت نے فراہم کیے۔

    خیال رہے کہ حکومت نے کرونا وائرس سے انسداد پولیو مہم کو پہنچنے والے نقصان کے ازالے کا فیصلہ کرتے ہوئے رواں سال کی آخری سہ ماہی میں متواتر انسداد پولیو مہمات چلانے کا فیصلہ کیا ہے۔

    وفاقی حکومت نے فیصلہ کیا ہے کہ رواں سال کی آخری سہ ماہی میں ہر ماہ انسداد پولیو مہم چلائی جائیں گی۔

    اس فیصلے کے تحت رواں ماہ قومی انسداد پولیو مہم، اکتوبر اور نومبر میں ذیلی قومی انسداد پولیو مہم جبکہ دسمبر میں پھر قومی انسداد پولیو مہم چلائی جائے گی۔

  • کرونا وائرس سے نمٹنے کے لیے انسداد پولیو ورکرز کو میدان میں اتارنے کا فیصلہ

    کرونا وائرس سے نمٹنے کے لیے انسداد پولیو ورکرز کو میدان میں اتارنے کا فیصلہ

    کوئٹہ: حکومت بلوچستان نے کرونا وائرس سے نمٹنے کے لیے انسداد پولیو ورکرز کو میدان میں اتارنے کا فیصلہ کر لیا ہے۔

    تفصیلات کے مطابق بلوچستان حکومت نے فیصلہ کیا ہے کہ کرونا وائرس کے خلاف انسداد پولیو ورکرز کو میدان میں اتارا جائے گا، ذرایع کا کہنا ہے کہ پولیو ورکرز بلوچستان میں کرونا سرویلنس ٹیم کا حصہ ہوں گے۔

    اے آر وائی نیوز کے مطابق انسداد پولیو ورکرز کرونا سرویلنس میں بلوچستان حکومت کی مدد کریں گے، بلوچستان میں پولیو ورکرز کی شمولیت کا فیصلہ مؤثر سرویلنس کے لیے کیا گیا ہے، اس فیصلے سے متعلق وفاق کو بھی اعتماد میں لے لیا گیا ہے۔

    کرونا وائرس ، سندھ حکومت کا 13 مارچ تک تعلیمی ادارے بند رکھنے کا اعلان

    بتایا گیا ہے کہ مؤثر سرویلنس سے کرونا وائرس کا پھیلاؤ روکنا ممکن ہوگا، سرویلنس ٹیم محکمہ صحت کو روزانہ رپورٹ پیش کرے گی، ورکرز کو میدان میں اتارنے سے قبل انھیں کرونا سرویلنس کی تربیت دی جائے گی، ڈبلیو ایچ او کے ماہرین انسداد پولیو ورکرز کو تربیت دیں گے۔

    پولیو ورکرز کو کرونا کیس مینجمنٹ، سرویلنس اور تدارک کی ٹریننگ دی جائے گی، جب کہ کرونا سرویلنس کرنے والے ورکرز کو اعزازیہ بلوچستان حکومت دے گی۔

  • ساہیوال میں انسداد پولیوٹیم پر حملہ ہوگیا

    ساہیوال میں انسداد پولیوٹیم پر حملہ ہوگیا

    حاجی آباد: پنجاب کے شہر ساہیوال میں انسداد پولیو ٹیم پر حملہ ہوا اور جان سے مارنے کی بھی دھمکیاں دی گئیں۔

    تفصیلات کے مطابق ساہیوال کے علاقے حاجی آباد میں انسدادپولیو کی ٹیم کام میں مصروف تھی کہ اچانک ان پر حملہ ہوگیا، ملزم ندیم نے ٹیم پر دھاوا بولا اور تشدد کا نشانہ بنایا۔

    پولیس کا کہنا ہے کہ انسداد پولیو ٹیم نے ڈیرے میں گھس کر جان بچائی، تھانہ کمیر پولیس نے ملزم کو گرفتار کر کے مقدمہ درج کرلیا، حملہ آور ٹیم کو جان سے مارنے کی دھمکیاں دیتے ہوئے فرار ہوا تھا۔

    خیال رہے کہ ملک کو پولیو سے پاک کرنے کے لیے پولیو ورکرز اپنی جانوں پر کھیل کر بچوں کو قطرے پلارہے ہیں، جبکہ ملک دشمن عناصر انہیں ڈرانے، دھمکانے اور جان سے مار دینے کی دھمکیوں سے باز نہیں آرہے۔

    کوئٹہ : پولیو ٹیم پر حملہ ،4 ورکرز جاں بحق

    ملک میں یہ کوئی نیا واقعہ نہیں اس سے قبل بھی ایسے واقعات رونما ہوچکے ہیں۔

    خیال رہے کہ رواں سال اپریل میں صوبہ بلوچستان کے ضلع چمن میں پولیو ٹیم پر فائرنگ سے ایک خاتون پولیو ورکر جاں بحق اور ایک زخمی ہوگئی تھیں۔ تاہم اس کے باوجود پولیو ورکرز کے حوصلے پست نہیں ہوئے۔

  • پنجاب: پولیو ورکرز کو بہبود آبادی پرعوامی شعور بیدار کرنے کا ٹاسک سونپ دیا گیا

    پنجاب: پولیو ورکرز کو بہبود آبادی پرعوامی شعور بیدار کرنے کا ٹاسک سونپ دیا گیا

    لاہور: صوبہ پنجاب میں پولیو ورکرز کو بہبودآبادی پرعوامی شعورکو بیدار کرنے کا ٹاسک سونپ دیا گیا.

    تفصیلات کے مطابق اب پولیوورکرزبھی ڈیوٹی کےدوران پاپولیشن ویلفیئرپرآگاہی فراہم کریں.

    یہ اہم فیصلہ وزیراعلیٰ پنجاب عثمان بزدارکی زیرصدارت اجلاس میں ہوا، اجلاس میں بہبود آبادی سے متعلق اموراور تجاویز پرغورکیا گیا.

    اس موقع پر وزیر اعلیٰ پنجاب سردار عثمان بزدار نے کہا کہ آبادی کنٹرول کیے بغیر بہترسہولتوں کے اہداف ممکن نہیں.

    انھوں نے کہا کہ بہبود آبادی پرعوامی شعورکوبیدارکرنے کے لئے ہرطبقے کو کردار ادا کرنا ہوگا، پولیو ورکرزبھی ڈیوٹی کے دوران عوام کو معلومات فراہم کریں.

    مزید پڑھیں: وزیراعلیٰ پنجاب کی سرکاری کالجوں میں ٹیچر انٹرنز کی اسامیوں پر بھرتی کی منظوری

    وزیر اعلیٰ پنجاب سردار عثمان بزدار نے کہا کہ بہبود آبادی کے اہداف حاصل کرنے کے لئے ایس اوپیزپرعمل یقینی بنایا جائے.

    خیال رہے کہ آج اپنے ایک بیان میں  وزیراعلیٰ پنجاب سردار عثمان بزدار نے انسداد پولیو کے لیے فعال ومتحرک انداز میں بھرپور مہم چلانے کی ہدایت کی  تھی۔

     انھوں نے کہا تھا کہ انسداد پولیو مہم کے لیے وضع کردہ پلان پر100 فیصد عملدرآمد یقینی بنایا جائے اور فیلڈ میں موجود انسداد پولیو ٹیموں کی موثر مانیٹرنگ کی جائے۔

  • پولیوورکر عرفان کے جذبے سے ہم پاکستان کوپولیوفری کرنے میں کامیاب ہوں گے، وزیراعظم

    پولیوورکر عرفان کے جذبے سے ہم پاکستان کوپولیوفری کرنے میں کامیاب ہوں گے، وزیراعظم

    اسلام آباد: وزیراعظم عمران خان کا کہنا ہے کہ عرفان کی وائرل ویڈیو نے ہرایک میں ان کے لئے تعظیم اورفخرکے جذبات پیدا کئے، اس جذبے سے پاکستان کوپولیوفری کرنے میں کامیاب ہوں گے۔

    تفصیلات کے مطابق وزیراعظم عمران خان نے پولیوورکر سے متعلق سماجی رابطے کی ویب سائٹ ٹوئٹر پر اپنے پیغام میں کہا عرفان ان دولاکھ ساٹھ ہزارپولیوورکرزمیں سے ایک ہیں جوسخت موسمی حالات کے باوجود بچوں کوپولیوویکسین دینے کے لئے پہنچتے ہیں۔

    وزیراعظم کا کہنا تھا کہ عرفان کی وائرل ویڈیو نے ہرایک میں ان کے لئے تعظیم اورفخرکے جذبات پیدا کئے، یہی وہ جذبہ ہے جس سے ہم پاکستان کوپولیوسے پاک کرنے کا مقصد حاصل کریں گے۔

    گذشتہ روز وزیر اعظم عمران خان نے سوات کے برف پوش پہاڑوں پر چلنے والے پولیو ورکرز سے ملاقات کی تھی اور پولیو ورکرز کو شاندار خدمات پرخراج تحسین پیش کرتے ہوئے ان کے جذبے کو سراہا اور ان کی حوصلہ افزائی کی۔

    مزید پڑھیں : برف پوش پہاڑوں پر فرائض انجام دینے والے پولیو ورکرز کی وزیر اعظم عمران خان سے ملاقات

    واضح رہے کہ دو روز قبل پاکستانی پولیو ورکرز کی سردی کے سخت موسم میں سوات کے برف پوش پہاڑوں پر چلتے ہوئے پولیو ویکسین پلانے کے لیے جانے کی تصاویر اور ویڈیوز سوشل میڈیا پر سامنے آئی تھی ، جن میں وہ شدید سرد موسم اور برف باری کے دوران بھی پولیو پلانے کے لیے اپنے سفر پر رواں دواں تھے، دشوار گزار برفیلے راستے بھی ان کی ہمت نہ توڑ سکے تھے۔

    تصاویر اور ویڈیوز سوشل میڈیا پر وائرل ہونے کے بعد ان کی کارکردگی کو خوب سراہا جارہا ہے۔

  • برف پوش پہاڑوں پر فرائض انجام دینے والے پولیو ورکرز کی وزیر اعظم عمران خان سے ملاقات

    برف پوش پہاڑوں پر فرائض انجام دینے والے پولیو ورکرز کی وزیر اعظم عمران خان سے ملاقات

    اسلام آباد : وزیر اعظم عمران خان سے سوات کے برف پوش پہاڑوں پر چلنے والے پولیو ورکرز نے ملاقات کی، وزیراعظم نے پولیو ورکرز کو شاندار خدمات پرخراج تحسین پیش کیا۔

    تفصیلات کے مطابق پاکستانی پولیو ورکرز کی سردی کے سخت موسم میں سوات کے برف پوش پہاڑوں پر چلتے ہوئے پولیو ویکسین پلانے کے لیے جانے کی تصاویر اور ویڈیوز سوشل میڈیا پر وائرل ہونے کے بعد ان کی کارکردگی کو خوب سراہا جارہا ہے۔

    اس سلسلے میں مذکورہ پولیو ورکرز کو وزیر اعظم ہاؤس مدعو کیا گیا، پولیو ورکرز کی وزیر اعظم عمران خان سے ملاقات کرائی گئی، وزیراعظم نے پولیو ورکرز کو ان کی شاندار خدمات پرخراج تحسین پیش کرتے ہوئے ان کے جذبے کو سراہا اور ان کی حوصلہ افزائی کی۔

    ملاقات میں پولیو سے ملک کو پاک کرنے کی حکمت عملی پر بات چیت کی گئی، فوکل پرسن بابر بن عطا اور وفاقی وزیر عامرمحمود کیانی بھی ملاقات میں موجود تھے۔ اس موقع پر وزیر اعظم نے پولیو ورکرز سے ساتھ تصاویر بھی بنوائیں۔

    واضح رہے کہ دو روز قبل پولیو ورکرز کی کچھ تصاویر سوشل میڈیا پر سامنے آئی تھیں جن میں وہ شدید سرد موسم اور برف باری کے دوران بھی پولیو پلانے کے لیے اپنے سفر پر رواں دواں تھے، دشوار گزار برفیلے راستے بھی ان کی ہمت نہ توڑ سکے تھے۔

    مزید پڑھیں: ملک بھر میں پولیو مہم مکمل، اقوام متحدہ نے عملے کی اعلیٰ کارکردگی کو سراہا

    سوشل میڈیا پر تصاویر وائرل ہونے کے بعد اقوام متحدہ کے ذیلی ادارے یونیسف نے بھی ٹویٹر پر ان حوصلہ مند ورکرز کو خراج تحسین پیش کیا۔

  • سکھر: پولیو مہم کا آغاز، ورکرز کو سیکیورٹی فراہم نہیں کی گئی

    سکھر: پولیو مہم کا آغاز، ورکرز کو سیکیورٹی فراہم نہیں کی گئی

    سکھر: پولیو جیسے خطرناک مرض کے خلاف محکمہ صحت کی جانب سے سکھر میں پولیو مہم کا آغاز کیا گیا ہے اورپولیو سرکرز بغیر کسی سیکیورٹی کے فرائض سر انجام دینے پر مجبور ہیں۔

    محکمہ صحت سکھر کی جانب سے دو سو سے زائد ٹیمیں بنا کر شہر کے مختلف علاقوں میں پولیو مہم کے لیے روانہ کردی گئی ہیں جو بچوں کو پولیو کے قطرے پلائینگی۔

    انتظامیہ کی جانب سے پولیو ٹیموں کو کوئی سیکیورٹی فراہم نہیں کی گئی ہے۔ خواتین ورکرز نے انتظامیہ سے سیکیورٹی کا مطالبہ کیا ہے۔

  • پولیو ورکرز کا قتل ملک کیخلاف سازش ہے،الطاف حسین

    پولیو ورکرز کا قتل ملک کیخلاف سازش ہے،الطاف حسین

    لندن : متحد ہ قومی موومنٹ کے قائد الطاف حسین نے صوبہ بلوچستان کے دارالحکومت کوئٹہ میں پولیو ورکر ز پر مسلح دہشت گردوں کی فائرنگ کی سخت الفاظ میں مذمت کی ہے ۔

    ایک مذمتی بیان میں الطاف حسین نے کہا کہ دہشت گردوں کی جانب سے ملک کے مختلف علاقوں میں پولیو ورکرز کو نشانہ بنا نے کا مقصد در اصل آئندہ نسلوں کو معذوری اور اپاہجی کے اندھیروں میں دھکیل کر ملک کے مستقبل کو بیساکھیوں پرکھڑا کرنا ہے ۔

    اسی لئے مختلف منفی پروپیگنڈوں  یا مسلح کارروائیوں کے ذریعے پولیو مہم کو ناکام بنانے کی کوششیں کی جارہی ہیں لیکن تمام تر خطرات اور دہشت گردی کی کارروائیوں کے باوجود جو خواتین و مرد رضا کارا ن گلی گلی جارہے ہیں اور بچوں کو پولیو کے قطرے پلا کر خدمت خلق کر رہے ہیں میں انہیں زبردست خراج تحسین پیش کرتا ہوں۔

    الطاف حسین نے واقعہ کے نتیجے میں 4پولیو ورکرز کی ہلاکت اور متعدد کے زخمی ہونے پر افسوس کا اظہار کرتے ہوئے دعا کی کہ اللہ تعالیٰ جاں بحق ہونے والی پولیو ورکرز کے درجات بلند فرمائے اور زخمیوں کو جلد و مکمل صحتیابی عطا کرے ۔

    الطاف حسین نے وزیر اعظم پاکستان میاں محمد نواز شریف ، وفاقی وزیر داخلہ چوہدری نثار علی خان اور بلوچستان کے وزیر اعلیٰ ڈاکٹر عبد المالک بلوچ سے مطالبہ کیا کہ وہ کوئٹہ میں پیش آنے والے افسوسناک واقعے میں ملوث دہشت گرد عناصر کو فوری گرفتار کریں ۔

     پولیو رضاکاران کی حفاظت میں کوتاہی برتنے والے ذمہ داران کے خلا ف کارروائی عمل میں لانے کے ساتھ ساتھ ملک بھر میں پولیو ورکرز کو تحفظ فراہم کرنے کیلئے اقدامات کرکے پولیو رضاکاران کے معاوضے و مراعات میں بھی اضافہ کیا جائے۔