Tag: پولیو

لاہور: چھ ماہ کی عمر سے پولیو کے شکار، لاہور کے رہائشی نوجوان نوید بٹ نے معذروں کے باڈی بلڈنگ کے ورلڈ چیمپین اور مسٹر اولمپیا کا ٹائٹل جیت کر دنیا بھر میں پاکستان کا نام روشن کیا۔

تفصیلات کے مطابق پاکستان کے ہونہار نوجوان نوید بٹ جو چھ ماہ کی عمر میں پولیو کے موذی مرض میں مبتلا ہوگئے تھے،لیکن انہوں نے اپنی معذوری کو اپنی کمزوری نہیں بننے دیا،باڈی بلڈنگ کے شوقین اس نوجوان نے دن رات محنت کر کے اندرون ملک کے ساتھ ساتھ بیرون ملک میں بھی بے شمار اعزازات جیتے۔

ذرائع کے مطابق نوید بٹ نے کئی بین الاقوامی مقابلوں میں اپنی فتح کے جھنڈے لہرائے،اور باڈی بلڈنگ کےورلڈ چمپین بنے،بعد ازاں وہ مسٹر اولمپیا کا ٹائٹل بھی اپنے نام کرنے میں کامیاب رہے۔

اپنی کامیابیوں کی داستاں سناتے ہوئے نوید بٹ نے بتایا کہ چھ ماہ میں پولیو کا شکار ہونے کے باوجوداُن کے عزم و ہمت میں کمی نہیں آئی، باڈی بلڈنگ میرا جنون ہے،اور اس کے لیے میں گھر کے اثاثے بیچ کر بین الاقوامی مقابلوں میں حصہ لیا اور ورلڈ چمپین سمیت مسٹر اولمپیا کا ٹائٹل پاکستان کے نام کیا۔

اس موقع پر معذور نوید بٹ نے حکومت سے مالی امداد کی درخواست کرتے ہوئے کہا کہ وہ آرنلڈ شوارزنیگر کا سات بار مسٹر اولمپیا بننے کا ریکارڈ توڑ نا چاہتا ہے،جو حکومتی توجہ اور امداد کے بغیر ممکن نہیں۔

ہمارے معاشرے میں معذور افراد کو قابل رحم زندگی گزارنے پر مجبور کر دیا جاتا ہے لیکن نوید بٹ جیسے جواں ہمت نوجوان اپنی معذوری کے باوجود ملک کے سرمایہ ثابت ہورہے ہیں،ایسے باصلاحیت ’’خصوصی افراد‘‘ ہماری خصوصی توجہ کے متقاضی ہوتے ہیں۔