بھارتی فلمی اداکار اور ریئلٹی ٹی وی اسٹار پونم پانڈے زندہ ہیں۔ اداکارہ نے انسٹاگرام پر سروائیکل کینسر سے متعلق آگاہی کے بارے میں ایک ویڈیو بیان میں واضح کیا۔
پونم پانڈے نے ہفتہ کی صبح ایک ویڈیو بیان میں کہا کہ ان کی جعلی موت کی خبر اس بیماری کے بارے میں بیداری پیدا کرنے کے لیے تھی۔ اداکارہ کی جانب سے جاری کئے گئے بیان میں کہا گیا ہے کہ ”میں زندہ ہوں، میری موت سروائیکل کینسر کی وجہ سے نہیں ہوئی“۔
انہوں نے کہا کہ ”بدقسمتی سے، میں ان سیکڑوں اور ہزاروں خواتین کے بارے میں یہ نہیں کہہ سکتی جو سروائیکل کینسر کی وجہ سے اپنی جانیں گنوا چکی ہیں۔ یہ اس لیے نہیں ہے کہ وہ اس کے بارے میں کچھ نہیں کر سکتے تھے بلکہ اس لیے کہ انھیں اس کے بارے میں کچھ نہیں معلوم تھا کہ کیا کرنا ہے۔“
پونم پانڈے کا مزید کہنا تھا کہ ”میں آپ کو یہ بتانے کے لیے حاضر ہوں کہ، دوسرے کینسروں کے برعکس، سروائیکل کینسر سے بچا جا سکتا ہے۔ آپ کو بس اتنا کرنا ہے، آپ کو اپنے ٹیسٹ کروانے ہوں گے اور آپ کو HPV ویکسین لگوانی ہوگی،“۔
یہاں یہ بات قابل غور ہے کہ ان کی موت کی جعلی خبر کا اعلان ان کے منیجر نے جمعہ کو ایک سوشل میڈیا پوسٹ میں کیا تھا۔ جس میں کہا گیا تھا کہ آج کی صبح ہمارے لیے اداسی سے بھری ہوئی ہے۔
دو دن پہلے پونم پانڈے کے ساتھ کیا ہوا تھا؟
ہمیں یہ بتاتے ہوئے انتہائی دکھ ہو رہا ہے کہ ہم نے اپنی پیاری پونم کو سروائیکل کے باعث کھو دیا ہے۔ غم کے اس وقت، ہم آپ سے پرائیویسی کی درخواست کرتے ہیں۔
