اسلام آباد : سپریم کورٹ میں پٹرولیم مصنوعات کی قیمتوں میں اضافے کے خلاف درخواست دائر کردی گئی ، جس میں استدعا کی گئی کہ عدالت عام انتخابات تک پیٹرولیم مصنوعات کی قیمتوں میں مزید اضافہ نہ کرنے کا حکم دے۔
تفصیلات کے مطابق پٹرولیم مصنوعات کی قیمتوں میں اضافے کے خلاف سپریم کورٹ میں درخواست دائر کردی گئی ، درخواست آرٹیکل 184(3) کے تحت مولوی اقبال حیدر کی جانب سے دائر کی گئی۔
درخواست میں وفاق، الیکشن کمیشن، وزارت خزانہ اوراوگرا کو فریق بناتے ہوئے استدعا کی گئی ہے کہ عدالت قرار دے آئین کے تحت نگران حکومت پیٹرولیم مصنوعات کی قیمتوں میں اضافے کا اختیار نہیں رکھتی اور صرف عوام کے منتخب نمائندے ہی پیٹرولیم مصنوعات کی قیمتوں میں اضافہ کرسکتےہیں،
درخواست میں یہ بھی استدعا کی گئی کہ عدالت قراردےکہ صرف عوام کےمنتخب نمائندےہی پیٹرولیم مصنوعات کی قیمتوں میں اضافہ کرسکتےہیں۔
درخواست گزار کا کہنا تھا کہ عدالت عام انتخابات تک پیٹرولیم مصنوعات کی قیمتوں میں مزید اضافہ نہ کرنے کا حکم دے اور تمام فریقین کو90روزمیں انتخابات کاانعقاد یقینی بنانے کا حکم دے۔
درخواست میں کہا گیا کہ نگران حکومت منتخب حکومت کے اختیارات استعمال نہیں کر سکتی، آئین کے تحت نگران حکومت کا مینڈیٹ صرف 90روز میں انتخابات کرانا ہے۔
دائر درخواست میں کہنا تھا کہ نگران حکومت نےایک ماہ میں 2بار پیٹرولیم مصنوعات کی قیمتوں میں اضافہ کیا، نگران حکومت کا پیٹرولیم مصنوعات کی قیمتیں بڑھانا غیر منصفانہ اور آئین کی کھلی خلاف ورزی ہے، نگران حکومت نےانتخابات کا انعقاد یقینی بنانے کی بجائے پیٹرول کی قیمتوں میں ریکارڈ اضافہ کیا۔
درخواست گزار نے مزید کہا کہ پٹرولیم مصنوعات کی قیمتوں میں اضافے سے عام آدمی مہنگائی کے بوجھ تلے دب گیا ہے، نگران حکومت 90 روز میں انتخابات کے انعقاد کی بجائے ٹیکسز کا نفاذ کر رہی ہے،15اگست سے پیٹرولیم مصنوعات کی قیمتوں میں 38 روپے سے زائد کا اضافہ ہو چکا ہے۔
درخواست کے مطابق پیٹرولیم مصنوعات کی قیمتوں میں اضافے سے عام عوام شدید متاثر ہو رہی ہے اس لیےعدالت نوٹس لے، پیٹرولیم مصنوعات کی قیمتوں میں اضافے کے بعد ملک میں مہنگائی کی شرح 27 فیصد سے زائد ہو چکی ہے۔
مولوی اقبال حیدر کا کہنا تھا کہ نگران حکومت کے آنے کے بعد پٹرولیم مصنوعات کی قیمتوں میں 20فیصد اضافہ ہو چکا ہے اور گزشتہ ڈیڑھ سال میں بجلی کے بل دوگنا سے زائد ہو چکے ہیں، پیٹرولیم مصنوعات کی قیمتوں میں اضافے سے کار چلانے والا اب بائیک چلانے پر مجبور ہو چکا ہے۔
دائر درخواست میں مزید کہا گیا کہ نگران حکومت کے آنے کے بعد عوام کی زندگی مزید اجیرن ہو چکی ہے اور شدید مہنگائی کی وجہ سے عوام کی بڑی تعداد بے روزگار ہو چکی ہے، مہنگائی کے اس دور میں عوام 2 وقت کا کھانا پورا کرنا مشکل ہو چکا ہے۔
درخواست گزار کے مطابق پیٹرول کی قیمتوں میں اضافے کی وجہ سے عوام کاٹرانسپورٹ پر سفر کرنا مشکل ہو چکا ہے اور روز مرہ زندگی کی اشیا مہنگی ہو چکی ہیں،۔
