اسلام آباد : آئل اینڈ گیس ریگولیٹری اتھارٹی (اوگرا) کا کہنا ہے کہ پٹرول کی قیمتوں میں اضافے یا کمی کے بارے میں قیاس آرائی قبل از وقت ہے، شہری افواہوں پر کان نہ دھریں۔
تفصیلات کے مطابق آئل اینڈ گیس ریگولیٹری اتھارٹی (اوگرا) نے پٹرولیم مصنوعات کی قیمتوں کے حوالے سے قیاس آرائیوں پر ردعمل دیتے ہوئے کہا کہ قیمتوں میں اضافے یاکمی کے بارے میں قیاس آرائی قبل از وقت ہے، شہری افواہوں پر کان نہ دھریں۔
اوگرا کا کہنا تھا کہ قیاس آرائیوں سےممکنہ طور پرتیل سپلائی چین میں خلل آ سکتا ہے، قیمتوں کا تعین عالمی مارکیٹ اور ایکسچینج ریٹ پر ہوتا ہے۔
آئل اینڈ گیس ریگولیٹری اتھارٹی کی جانب سے کہا گیا کہ حالیہ دنوں بین الاقوامی سطح پر پیٹرولیم مصنوعات کی قیمتوں میں اضافہ ہوا تاہم حالیہ دنوں میں ڈالر سے روپےکی شرح تبادلہ میں بہتری بھی آئی ہے۔
اوگرا نے مزید کہا کہ پیٹرولیم مصنوعات کی قیمتوں کے اعلان میں ابھی ایک ہفتہ باقی ہے۔
یاد رہے گذشتہ ہفتے کراچی پریس کلب میں صحافیوں سے گفتگو کرتے ہوئے نگراں وزیر اطلاعات مرتضیٰ سولنگی کا کہنا تھا کہ اگر ڈالر کی قدر میں کمی جاری رہی تو پیٹرول کی قیمت میں کمی کی جائے گی۔
نگراں وزیر تجارت گوہر اعجاز نے بھی کہا تھا کہ یکم اکتوبر کو قوم کو خوشخبری ملے گی، مہنگائی سے عوام پریشان ہیں، امید ہے پہلی تاریخ کو پیٹرول کی قیمتوں میں کمی ہوگی۔
