کولڈ ڈرنک کا استعمال دنیا بھر میں عام سی بات ہے، آج کل نقلی کولڈ ڈرنک بھی دستیاب ہیں جن سے بچنے کےلیے انھیں پہچاننا ضروری ہے۔
اے آر وائی کے پروگرام میں جعلی کولڈ ڈرنک کے حوالے سے گفتگو کرتے ہوئے ماہر محسن بھٹی نے بتایا کہ کس طرح جعلی مشروب کی پہچان کی جائے، انھوں نے بتایا کہ کسی سپراسٹور یا شاپ پر رکھی بوتلوں کو دیکھ کر اندازہ لگایا جاسکتا ہے کہ وہ جعلی ہے یا اصلی مشروب ہے۔
محسن بھٹی نے بتایا کہ کمپنی کی اصلی کولڈ ڈرنک میں بھری ہوئی لیکویڈ کا لیول ہمیشہ ایک جیسا ہوگا جبکہ جعلی بوتلوں میں یہ لیکویڈ کی سطح کسی بوتل میں اوپر اور کسی میں نیچے ہوگی۔
انھوں نے کہا کہ اصل کمپنی کبھی نقلی چیز نہیں بنائے گی، اس لیے کمپنی سے بدگمان نہ ہوں ہاں اس کے جو نقصانات ہیں وہ اپنی جگہ ہیں، اصلی اور جعلی بوتلوں میں فرق جاننا ضروری ہوتا ہے۔
جو نقلی بوتل بناتا ہے اس کے پاس آٹو میٹک فلنگ پلانٹ نہیں ہوتا، اس لیے 250 ملی لیٹر کی بوتل میں اکثر 250 ایم ایل لیکوڈ نہیں ہوتا، بلکہ ان میں لوٹے یا مینول طور پر کولڈ ڈرنک بھری جاتی ہے۔
انھوں نے بتایا کہ جب بھی آپ ڈسپوزبل بوتل پیئیں تو اس توڑ مڑوڑ کر پھینکیں تاکہ جعلی بوتل بنانے والے ن بوتلوں کو دوبارہ استعمال نہ کرسکیں۔
جعلی بوتل کی پہچان بتاتے ہوئے محسن بھٹی نہ کہا کہ آپ کسی بھی بوتل کو اٹھا کر اچھی طرح ہلائیں اور الٹا کرکے ایسی جگہ رکھیں جہاں سورج کی روشنی اس پر پڑے۔
آپ دیکھیں گے کہ جو بوتل جعلی ہوگی اس میں ڈھکن سے تھوڑی اوپر کی سطح پر ذرات نظر آئیں گے تو اس کا مطلب یہ ہوگا کہ وہ بوتل جعلی ہوگی، اس کی وجہ یہ ہے کہ جو جعلی بوتل بناتا ہے اس کے پاس بوتل واشنگ کا نظام نہیں ہے۔
