وزارت تجارت کی جانب سے پیاز کی ایکسپورٹ پر پابندی عائد کرنے کے بجائے اس کی برآمدی قیمت میں اضافہ کرنے سے برآمد کنندگان کی چاندی ہوگئی۔
قیمت مقرر کرنے سے خوردہ سطح پر پیاز کی قیمت میں مزید 40روپے کا اضافہ سامنے آیا ہے، مقامی مارکیٹ میں پیاز 240روپے کلو فروخت ہورہی ہے۔
گزشتہ دنوں وزارت تجارت نے مہنگائی کے مارے عوام کی مشکلات پر ایکسپورٹرز کے مالی مفاد کو ترجیح دیتے ہوئے پیاز کی ایکسپورٹ پرائس 750ڈالر سے بڑھا کر 1200ڈالر فی ٹن مقرر کی تھی جس کے بعد پیاز کی ذخیرہ اندوزی میں مزید شدت آگئی اور خوردہ مارکیٹ کے لیے پیاز کی سپلائی انتہائی محدود ہوگئی۔
کھانے پکانے کیلئے ہر گھر میں لازم و ملزم پیاز بھی مارکیٹوں میں نایاب ہوتی جارہی ہے، سبزی منڈی ذرائع کے مطابق منڈی میں پیاز نایاب ہے اس کی ایکسپورٹ سے کاشتکاروں کو کوئی فائدہ نہیں ہے، اونے پونے داموں خریدی جانے والی پیاز کی قیمت میں من مانا اضافہ کردیا گیا ہے۔
واضح رہے کہ گزشتہ ماہ بھارت کی جانب سے مقامی مارکیٹ میں پیاز کی دستیابی کو ممکن بنانے اور اپنی عوام کو سستے داموں پیاز کی فراہمی کے لیے بھارت سے پیاز کی برآمد پر پابندی عائد کردی گئی جبکہ پاکستان میں معاشی بحران اور تاریخ کی بدترین مہنگائی کے باوجود ایکسپورٹرز کو پیاز کی ذخیرہ اندوزی اور ایکسپورٹ سے سرمایہ کمانے کی کھلی چھٹی دے دی گئی ہے۔
مزید پڑھیں : پیاز کے سرکاری نرخ کیا ہیں؟ کتنے پر فروخت ہو رہی ہے؟
علاوہ ازیں لاہور کے بازاروں میں پیاز کے سرکاری نرخوں پر انتظامیہ عمل درآمد کرانے میں ناکام نظر آرہی ہے، فی کلو پیاز کی سرکاری قیمت 175 روپے ہے جب کہ دکانوں میں 230 سے 250میں فروخت کی جارہی ہے۔
