طلباء و طالبات امتحانات کے ایام میں اکثر اس بات پر زیادہ فکر مند دکھائی دیتے ہیں کہ کیا وہ ٹریفک کے موجودہ نظام میں رہتے ہوئے بروقت کمرہ امتحان میں پہنچ پائیں گے، اس حوالے سے بھارتی طالب علم نے سب کو حیران کردیا۔
سوشل میڈیا پر ایک ویڈیو بہت تیزی سے وائرل ہورہی ہے کہ جس میں ایک بھارتی طالب علم نے اس کا بہترین حل پیش کردیا ہے، طالب علم کے اس عمل کو قابل تعریف قرار دیا جارہا ہے۔
مہاراشٹر کے ایک ضلع کے نوجوان سمرتھ مہانگاڈے نے امتحانات کے دوران ٹریفک جام سے بچنے کے لیے ایسا زبردست حل نکالا کہ جس نے سب کو حیران کردیا۔
بھارتی طالب علم سمرتھ مہانگاڈے جو اپنے امتحان کے دن کسی کام کے سلسلے میں دوسرے ضلع میں موجود تھا، جب اس نے دیکھا کہ پرچہ شروع ہونے میں صرف 15-20 منٹ کا وقت باقی رہ گیا ہے اور سڑکوں پر بد ترین ٹریفک جام ہے۔
نوجوان نے اس کا متبادل راستہ اختیار کرتے ہوئے زمین کے بجائے آسمان سے اپنی امتحان گاہ جانے کا فیصلہ کیا۔
سوشل میڈیا پر وائرل ہونے والی ایک ویڈیو میں دیکھا جاسکتا ہے کہ سمرتھ اپنے کالج بیگ کے ساتھ آسمان میں پرواز کرتے ہوئے پیرا گلائیڈنگ کے ذریعے حیران کن انداز میں امتحانی مرکز پہنچ رہا ہے۔
یہ سب ایک معروف ایڈونچر اسپورٹس انسٹرکٹر گووند ییوالے کی مدد سے ممکن ہوا، جنہوں نے نہ صرف پیراگلائیڈنگ کا انتظام کیا بلکہ سمرتھ کو بالکل صحیح وقت پر امتحانی مرکز کے قریب اُتار بھی دیا۔
انسٹاگرام اکاؤنٹ کے ذریعے پوسٹ کی جانے والی اس ویڈیو نے صارفین کی کافی توجہ حاصل کی ہے، کچھ لوگوں نے سمرتھ کی تخلیقی صلاحیتوں کی تعریف کی ہے جبکہ کچھ لوگوں نے اسے ٹام کروز قرار دیتے ہوئے اس کا مذاق اڑایا۔
https://urdu.arynews.tv/paragliding-dies-fall-in-colombia-video/
