کراچی: مسلم لیگ فنکشنل سندھ کے صدر پیر صدر الدین شاہ راشدی نے کہا ہے کہ سندھ کے حکمرانوں کے آخری دن چل رہے ہیں، سندھ میں آنے والا وقت فنکشنل لیگ اور جے ڈی اے کا ہے۔
تفصیلات کے مطابق مسلم لیگ فنکشنل سندھ کے صدر پیر صدر الدین شاہ راشدی نے کنونشن سے خطاب کرتے ہوئے کہا کہ سندھ کے حکمرانوں کے آخری دن چل رہے ہیں، فروری کے ماہ سے قلابازیاں شروع ہوجائیں گی۔
انہوں نے کہا کہ جن قوتوں نے ان کو اقتدار دیا اب ان کو احساس ہوچکا ہے، الیکشن کے بعد ہم قومی مفاد کی خاطر خاموش رہے، قومی مفاد کی خاطر اب بھی خاموش ہیں۔
پیر صدر الدین شاہ نے کہا کہ سو دن گزر گئے اب ضلعی سطح تک تنظیم کو منظم کرنا ہے، سندھ میں زرداری لیگ کا نظام فیل ہوگیا ہے، زرداری لیگ کے اپنے لوگ ان کے خلاف وعدہ معاف گواہ بن رہے ہیں۔
انہوں نے کہا کہ پیپلزپارٹی بینظیر بھٹو کی شہادت کے بعد ختم ہوگئی تھی اس وقت بھی ہمارے لوگوں کے ساتھ زیادتیاں کی گئیں کاروبار تباہ اور دکانیں جلائی گئیں۔
پیر صدر الدین شاہ نے کہا کہ ان کے غباروں سے ہوا نکل چکی ہے یہ کب تک شہیدوں کے نام پر عوام کو بے وقوف بناتے رہیں گے، اب نوجوانان کا دور ہے نوجوان اور خواتین کو آگے آنا ہوگا۔
انہوں نے کہا کہ سردار رحیم پر یہ ذمہ داری عائد ہوتی ہے کہ وہ ضلعی سطح پر تنطیم سازی کا عمل مکمل کریں اب ہر پندرہ روز بعد ایک تقریب کا اہتمام کیا جائے گا۔
کنونشن میں صوبائی جنرل سیکریٹری سردار رحیم، سینیٹر مظفر حسین شاہ، کاشف نظامانی، سید اسماعیل شاہ راشدی، نصرت سحر عباسی، نند کمار گوکلانی ودیگر رہنماؤں نے بھی خطاب کیا۔
