واشنگٹن: امریکا نے کروڑوں افراد کو بروقت زلزلے کی اطلاع دینے والی نئی ٹیکنالوجی تیار کر لی ہے۔
تفصیلات کے مطابق امریکا دنیا میں کروڑوں افراد کو زلزلوں کے بارے میں پیشگی اطلاع دے گا، ماہرین کا کہنا ہے کہ جب بھی کوئی زلزلہ آتا ہے تو چند سیکنڈ کی پیشگی اطلاع بھی زندگی اور موت سے متعلق فیصلہ کن ثابت ہو سکتی ہے۔
اس ٹیکنالوجی کا امریکا میں استعمال شروع ہو چکا ہے، کئی دیگر ممالک کے علاوہ اس ٹیکنالوجی کو یونان، اسرائیل، جمہوریہ کوریا اور ترکی میں بھی آزمایا جا رہا ہے۔
اس موبائل ایپ تیار کی تیاری کے لیے امریکا کے ارضیاتی سروے (یو ایس جی ایس) نے کئی تحقیقی یونیورسٹیز کے ساتھ شراکت کی ہے، یہ ایپ امریکا کے مغربی ساحل کے رہائشیوں کو اُن کے علاقے میں آنے والے کسی زلزلے سے دسیوں سیکنڈ پہلے ہوشیار کر دے گا۔
’شیک الرٹ‘ نامی اس ایپ کی تیاری کے لیے امریکی حکومت نے 12 ملین ڈالر کے فنڈز فراہم کیے، جب اس آلے میں لگے سنسر 5.0 درجے سے زیادہ شدت کے کسی زلزلے کا پتا لگاتے ہیں تو اُس علاقے کے لوگوں کو کسی محفوظ جگہ جانے پر مشتمل ایک پیغام بھیج دیا جاتا ہے۔
متعلقہ حکام کا کہنا ہے کہ شیک الرٹ سسٹم سے چند سیکنڈ لوگوں کی زندگیاں بچانے والے مواقع میں تبدیل ہو سکتے ہیں، یہ سسٹم 13 سال میں کی جانے والی پیش رفتوں کا ثمر ہے۔
امریکا اب جاپان، میکسیکو اور چلی جیسے اُن ممالک میں شامل ہوگیا ہے، جن کے ہاں حکومت کے زیر انتظام وہ نظام قائم ہیں جو اپنے شہریوں کو کسی بڑے زلزلے کی پیشگی اطلاع دیتے ہیں۔
واضح رہے کہ شیک الرٹ کو ڈیٹا فراہم کرنے والے پہلے الگورتھم اور 2007 میں تیار کیے گئے ’الارم ایس‘ نے تجربے کے دوران ’ایس لہروں‘ کے زمین کی سطح پر پہنچنے سے پہلے انتباہ جاری کیا تھا، ایس لہریں زیر زمین گڑگڑاہٹ پیدا کرنے والی وہ لہریں ہیں جو سب سے زیادہ نقصان پہنچاتی ہیں۔
