کراچی : سندھ حکومت نے پیپلز اسکوائر میں سرکاری ملازمین کی گاڑیوں کی پارکنگ فیس ادا کرنے کا فیصلہ کرتے ہوئے ٹھیکیدار کو ادائیگی کی منظوری دے دی۔
تفصیلات کے مطابق چیف سیکریٹری سندھ نے پیپلز اسکوائر میں سرکاری ملازمین کی گاڑیوں کی پارکنگ فیس کی مد میں ٹھیکیدار کو ادائیگی کی منظوری دے دی۔
پیپلز اسکوائر میں سرکاری ملازمین کی گاڑیوں کی پارکنگ فیس سندھ حکومت ادا کرے گی، 19ماہ کی فیس کی مد میں پہلی قسط کے طور پر 33 لاکھ 68 ہزار روپے ادا کیے جائیں گے۔
سندھ سیکریٹریٹ میں گنجائش کی کمی پر سندھ سیکریٹریٹ کے سامنے پیپلز اسکوائر تعمیر کرایا گیا، جہاں گریڈ ایک سے لے کر گریڈ 18 تک کے ملازمین کی گاڑیاں اور موٹرسائیکلیں پارک کی جاتی ہیں۔
گاڑی کی پارکنگ 100 روپے اور موٹرسائیکل کی پارکنگ پر 50 روپے ٹھیکیدار وصول کرتا ہے۔