خیر پور: صوبائی وزیر سندھ برائے صنعت و تجارت منظوروسان نے کہا ہے کہ میں نے پانچ ماہ پہلے ہی پیشن گوئی کردی تھی کہ آصف علی زرداری 27 دسمبر کو ملک میں موجود ہوں گے،اور27 کے بعد جو دھمال لگے گی اسے سب دیکھیں گے۔
صوبائی وزیر منظور وسان ڈپٹی کمشنر آفس خیرپور کے دربار ھال میں ضلع بھر کے ھیڈ آف ڈیپارٹمنٹ کے افسران سے بریفنگ لینے کے بعد پریس کانفرنس کر رہے تھے،انہوں نے کہا کہ آصف زرداری کو کسی قوت نے ملک آنے سے نہیں روکا تھا، پاکستان میں اگر کوئی قوت ہے تو وہ صرف عوام ہے، اب عوام نے کہہ دیا ہے تو آصف زرداری آرہے ہیں۔
منظور وسان نے کہا کہ آصف علی زرداری 27 دسمبر کو ملک میں ہوں گے، اور بی بی شہید کی برسی کے موقع پر دھواں دھار تقریر بھی کریں گے، پیپلز پارٹی کے چار مطالبات نہ مانے گئے تو’’ 27 دسمبر کے بعد جو دھمال لگے گی اسے سب دیکھیں گے‘‘
پریس کانفرنس میں اپنی مخالف سیاسی جماعتوں کو ہدف تنقید بناتے ہوئے ان کا کہنا تھا کہ مسلم لیگ (فنکشنل) کوئی سیاسی جماعت نہیں بلکہ صرف مرید اور مرشد کی پارٹی ہے جسے عوامی پذیرائی حاصل نہیں جب کہ ایم کیو ایم کا کوئی مستقبل نظر نہیں آرہا ہے۔
صوبائی وزیر منظور حسین وسان نے مزید کہا کہ ہم جمہوریت کو ڈی ریل ہونے نہیں دیں گے،جمہوریت کے لیے جتنی قربانیاں پیپلز پارٹی نے دی ہیں اتنی کسی پارٹی نے نہیں دیں لیکن بلاول بھٹو زرداری کو بچہ کہنے والوں کو 27 دسمبر کے بعد کے بعد پتہ لگ جائے گا۔
سندھ میں مردم شماری کے حوالے سے پوچھے گئے ایک سوال کے جواب میں صوبائی وزیر منظوروسان کا کہنا تھا کہ سندھ حکومت مردم شماری کی راہ میں رکاوٹ نہیں بلکہ بہ حثییت سندھ کی نمائندہ جماعت، ہمیں اس سے فائدہ ہی ہوگا کیوں کہ مردم شماری کے بعد سندھ کی آبادی 5 کروڑ ہوجائے گی۔
