کراچی : پاکستان پیپلز پارٹی کے چیرمین بلاول بھٹو زرداری قافلے کی صورت میں جلسہ گاہ میمن گوٹھ کی جانب رواں دواں ہے،ملیر 15 پر شاندار استقبال کیا جائے۔
تفصیلات کے مطابق سربراہ پی پی پی بلاول بھٹو حال ہی میں ملیر کے حلقے پی ایس 127 کے ضمنی انتخابات میں پیپلز پارٹی کے نمائندے کی جیت کے بعد آج ملیر کا دورہ کرنے کے لیے اپنے گھر بلاول ہاؤس سے ملیر روانہ ہو گئے ہیں۔
بلاول بھٹو زرداری کے قافلے کا راستے میں جگہ جگہ پُرتپاک استقبال کیا گیا جب قافلہ ملیر 15 کے مقام پر پہنچا تو پیپلز پارٹی کے کارکنان نے اپنے محبوب قائد کی گاڑی پر پھولوں کی پتیاں نچھاورکر کے استقبال کیا،پارٹی نغموں پر رقص اور بلند شگاف نعروں نے مجمع میں کا جوش گرما دیا۔
کارکنان کا جوش و جذبہ دیکھ کربلاول بھٹو بھی خود پر قابو نہ رکھ سکے اور تمام سیکیورٹی تحفظات کو بالائے طاق رکھتے ہوئے اپنی گاڑی سے باہر آگئے نعرے لگائے،بلاول بھٹو کو باہر آتا دیکھ کر کارکنان کا جوش و ولولہ مزید بڑھ گیا اور انہوں نے اپنے قائد کے ہم آواز ہو کر واشگاف نعرے بلند کیے۔
اس موقع پر بلاول بھٹو زرداری نے خصوصی طور اپنی گاڑی سے باہر آکر اے آر وائی کے نمائندے ارباب چانڈیو کو بہترین کوریج کو سراہتےہوئے تا کید کی کہ اے آر وائی کی ٹیم کوریج کے لیے قافلے کے ہمراہ چلتی رہے۔
واضح رہے اے آر وائی نیوز نے بلاول بھٹو زرداری کے قافلے کی کوریج کے لیے خصوصی انتظام کر رکھے ہیں اور پیپلز پارٹی کے قافلے کی لمحہ بہ لمحہ خبر عوام تک پہنچارہے ہیں جس کے معترف خود بلاول بھٹو زرداری بھی ہوئے۔
