کراچی : امیر جماعت اسلامی کراچی حافظ نعیم الرحمان نے کہا ہے کہ پیپلز پارٹی کراچی پر صرف قبضہ چاہتی ہے۔
امیر جماعت اسلامی کراچی حافظ نعیم الرحمان نے کراچی میں پریس کانفرنس کرتے ہوئے کہا خانہ شماری میں بھی تمام گھرانوں کو نہیں گناگیا، جب مردم شماری کا آغاز ہوا تو بتایا کہ ٹیبلٹس میں مسائل ہیں، اسٹیک ہولڈرز کو ڈیٹا تک رسائی نہیں دی جارہی ہے۔
انہوں نے کہا کہ جب تک رسائی نہیں ہوگی توپتا کیسے چلےگاکہ گناگیا ہے یا نہیں، کراچی سب کو کھٹکتا ہے سب اسکی آبادی اور حیثیت سے پریشان ہیں،کراچی میں جب بھی سیاسی عمل آگے بڑھتا ہے تو شب خون مارا جاتا ہے۔
حافظ نعیم کا کہنا تھا کہ ان تمام جماعتوں نے آپس میں اتفاق کیاکہ آبادی کوکم دکھانا ہے، کراچی کے ساتھ مذاق بند رہنا چاہئے، سندھ حکومت کہہ رہی ہے آبادی پوری گنو مگر کراچی کا نام لیتے تکلیف ہوتی ہے۔
امیر جماعت اسلامی کراچی نے کہا کہ کرپشن کرنی ہو توکراچی مگر اصل مسئلے پربات نہیں کرتے، انہیں پتا ہے کراچی کی آبادی صحیح گن لی گئی تو وڈیرہ وزیر اعلیٰ نہیں آئےگا، پی ایف سی ایوار ڈقائم ہوگیا تو آبادی کےلحاظ سے شہری علاقوں کو پیسےکم ملیں گے۔
حافظ نعیم نے کہا کہ کراچی کا اہم ترین مسئلہ نمائندگی کا ہے، پیپلزپارٹی کوکھل کرکہنا چاہئےکہ کراچی کی آبادی پر سمجھوتہ نہیں ہوگا، پیپلزپارٹی کراچی پر صرف قبضہ چاہتی ہے، آپ دیہی سندھ میں عوام کی رائےکو کچل دیتے ہیں، دیہی سندھ میں ڈرا دھمکا کر ان سےحکمرانی لیتے ہیں۔
انکا کہنا تھا کہ گزشتہ مردم شماری کو نوٹیفائی کرایا اب کہتے ہیں موجودہ مردم شماری ٹھیک ہے، مطالبہ کرتےہیں مردم شماری میں جعلسازی فوری ختم ہونی چاہئے، جب آپ ہماری گنتی ہی پوری نہیں کرینگے تو ملازمتیں بھی کم ملیں گی، صوبائی حکومت میں جو دیہی شہری کاکوٹہ بنایا اسکی کوئی قانونی حیثیت نہیں، جو بچ جاتا ہے وہ جعلی ڈومیسائل بنا کر پوراکر دیتے ہیں۔
حافظ نعیم نے مزید کہا کہ مردم شماری میں دھاندلی سے براہ راست ملازمتوں،کوٹہ سسٹم پر اثر پڑتا ہے، مطالبہ کرتے ہیں مردم شماری میں جعلسازی فوری ختم ہونی چاہئے، کراچی میں جتنے لوگ ہیں اتنے گنے جائیں جوڑ توڑ نہ کیا جائے ہمارا مطالبہ ہے جعل سازی کو ختم ہونا چاہئے۔
حافظ نعیم الرحمان نے کہا کہ سندھ حکومت نے بلدیاتی نظام پر قبضہ کرنےکا خواب دیکھا ہے، کراچی کو فتح کرنےکیلئے چند درباری، وزراکیلئے سوالیہ نشان کھڑا ہوگیا، انکےاپنے بھی کہہ رہے ہیں کہ اتنی سیٹیں تو نہیں جیتے تھے جتنی مل گئیں، بلاول بھٹو سےکہا جا رہا ہے یہ سیٹیں آپ کی وجہ سےملی ہیں۔
