Tag: پیپلز پارٹی

خیر پور: وزیر اعلیٰ سندھ مراد علی شاہ نے کہا ہے کہ این آئی سی وی ڈی اور دیگر اسپتال اب وفاق کے حوالے ہیں، ہم اسپتالوں کو چلانا چاہتے ہیں لیکن مالی بحران کا مسئلہ تھا۔

تفصیلات کے مطابق وزیر اعلیٰ سندھ نے کہا ہے کہ امراض قلب کا قومی ادارہ اب وفاق کے پاس ہے، جو کچھ ہو رہا ہے وہ عوام کے لیے اچھا نہیں ہو رہا، وفاق کو اللہ ہدایت دے اور ادھر ادھر کی چیزیں چھوڑ کر حکومت کریں۔

مراد علی شاہ کا کہنا تھا کہ قیمتیں آسمان سے باتیں کر رہی ہیں، وفاق کے خلاف احتجاج کا فیصلہ پیپلز پارٹی کی قیادت کرے گی۔

وزیر اعلیٰ سندھ نے مزید کہا کہ ان کے آئی جی سندھ سے کوئی اختلافات نہیں ہیں، تقرریاں حکومت کا کام ہے، پنجاب میں ہو رہا ہے یہاں کیوں نہیں۔

یہ بھی پڑھیں:  قومی ادارہ برائے امراض قلب میں مالی بحران شدت اختیار کر گیا

انھوں نے کہا کہ ایڈز کے مریضوں کی تعداد سے متعلق تشویش ہے، حکومت سندھ نے ایڈز سے متعلق فوری اقدامات کیے ہیں، ایچ آئی وی وائرس سے متعلق آگاہی مہم چلانی چاہیے۔

دریں اثنا ریلوے سے متعلق ایک سوال کا جواب دیتے ہوئے وزیر اعلیٰ سندھ نے کہا کہ شیخ رشید کی بات چھوڑیں ان کی بات نہ کریں، اخباروں میں پڑھا ہے ریلوے میں 2500 ارب کا نقصان ہوا۔

خیال رہے کہ گزشتہ روز قومی ادارہ برائے امراض قلب (این آئی سی وی ڈی) کے ایگزیکٹو ڈائریکٹر ڈاکٹر ندیم قمر نے وزیر اعلیٰ سندھ کو تحریری طور پر آگاہ کیا تھا کہ امراض قلب کے ادارے میں مالی بحران شدت اختیار کر گیا ہے، اسپتال میں ادویات اور طبی آلات نایاب ہو گئے ہیں جس کی وجہ سے انتظامی امور بری طرح متاثر ہو گئے ہیں۔

اسلام آباد: سابق وزیر اعظم شاہد خاقان عباسی نے کہا ہے کہ فاٹا بل پر اتفاق ہو سکتا ہے تو ملکی مفاد پر تمام جماعتوں میں اتفاق کیوں نہیں ہو سکتا۔

تفصیلات کے مطابق قومی اسمبلی کے اجلاس سے خطاب کرتے ہوئے شاہد خاقان عباسی نے کہا کہ ملک کے بڑے مسائل ہیں ان پر ایوان میں بات نہیں ہوئی۔

شاہد خاقان کا کہنا تھا کہ ملک میں بڑے بڑے مسائل ہیں، لیکن اس ایوان میں 9 ماہ ان پر کوئی بات نہیں ہوئی، اس ایوان میں کوئی اتفاق نہیں ہے، لیڈر آف دی ہاؤس بھی یہاں نہیں آتا۔

پی پی رہنما نے کہا کہ یہ عدم اتفاق ہے کہ آج ایک بل کی موجودگی میں اسی حوالے سے دوسرا بل پیش کر دیا گیا، ایوان میں اتفاق نہیں لیکن پھر بھی فاٹا کے عوام کے لیے اتفاق پایا جاتا ہے۔

ان کا کہنا تھا کہ فاٹا سے متعلق ایک جماعت بل پر کریڈٹ لینا چاہتی ہے، لیکن میں فاٹا بل کی حمایت پر تمام جماعتوں کو کریڈٹ دیتا ہوں، فاٹا کے عوام نے قائد اعظم کے ساتھ معاہدہ کیا تھا، جب ہم ان چیزوں پر اتفاق کر سکتے ہیں تو ملکی مفاد پر کیوں نہیں۔

یہ بھی پڑھیں:  ایٹمی پروگرام کی طرح سی پیک منصوبے کو بھی مکمل کریں گے: شاہ محمود قریشی

شاہد خاقان نے کہا کہ فاٹا کے عوام کو 100 ارب روپے اضافی دیا جائے گا، ان کو پاکستان کے دیگر لوگوں کی طرح سہولت دیں گے، فاٹا کو ضم کرنے کے لیے آدھے سے زیادہ فاٹا نمائندوں نے ووٹ نہیں دیا، لیکن اب ہاتھ جوڑ کر گزارش کرتا ہوں کہ اس الیکشن کو غیر متنازع بنا دیں۔

سابق وزیر اعظم نے کہا کہ ایوان میں تشریف لانے پر میں وزیر اعظم صاحب کا شکر گزار ہوں، امید ہے وزیر اعظم آئی ایم ایف سے معاہدے کی تفصیل بتائیں گے، اور عوام کو تمام مسائل اور ان کا حل بھی بتائیں گے۔

شاہد خاقان نے کہا کہ اب بھی وقت ہے اگر ایوان چلانا ہے تو یہاں بولنے دیں، یہاں نہیں بولیں تو کہاں بولیں گے، رویے میں تبدیلی چاہیے، تمام اراکین کو بات کا حق ملنا چاہیے، اسپیکر صاحب سے گزارش ہے ہاؤس کا تقدس بحال کیا جائے۔

اسلام آباد: پیپلز پارٹی کے رہنما خورشید شاہ نے پی ٹی ایم سے پوچھے گئے سوالات کی تائید کر دی، انھوں نے کہا کہ کچھ لوگ 71 جیسے حالات پیدا کرنا چاہتے ہیں تو ان سے سوالات ہونے چاہئیں۔

تفصیلات کے مطابق اسلام آباد میں پریس کانفرنس کرتے ہوئے خورشید شاہ نے پی ٹی ایم سے ڈی جی آئی ایس پی آر کے سوالات کو درست قرار دے دیا۔

خورشید شاہ نے کہا کہ کچھ لوگ 71 جیسے حالات پیدا کرنا چاہتے ہیں تو ان سے سوالات ہونے چاہئیں، اور ان سوالات کے جواب آنے چاہئیں، بات ہو تاکہ 71 جیسے حالات نہ بنیں۔

پی پی رہنما نے آرمی چیف کے بیان پر تبصرہ کرتے ہوئے کہا کہ اچھی بات ہے آرمی چیف نے اس پر خود بات کی، انھوں نے پی ٹی ایم سے متعلق جو کہا اسے اسی صورت میں دیکھنا چاہیے۔

یہ بھی پڑھیں:  پی ٹی ایم کے چند لوگ غیروں کے ہاتھوں میں کھیل رہے ہیں: آرمی چیف

خورشید شاہ کا کہنا تھا کہ چند لوگ ہیں جن پر بات ہو سکتی ہے کہ وہ کیا ہیں، میں کہتا ہوں اگر معاشرے، سسٹم اور کسی ادارے میں سوال ہوتا ہے تو ہونے دیں، سوال ہونے دیں پھر اس کا جواب آنا چاہیے، پھر ڈائیلاگ ہوں۔

انھوں نے مزید کہا کہ آج وہ حالات ہیں کہ ڈائیلاگ ہو سکتے ہیں، کل یہ نہیں ہوگا، مشرقی پاکستان میں ایک وقت تھا کہ ڈائیلاگ ہو سکتے تھے۔

خورشید نے کہا پاکستان ہم سب کا ہے، فوج ہمارے ملک کی حفاظت کے لیے ہے، فوج کا بھی یہ ہی مقصد ہے کہ ملک میں امن و امان رہے، سوال ہونے دیں، ڈائیلاگ کریں ہر چیز کلیئر ہو جائے گی۔