نواب شاہ: پاکستان پیپلز پارٹی کے چیئرمین بلاول بھٹو زرداری نے کہا ہے کہ پیپلز پارٹی دہشت گردی کے خلاف تھی، ہے اور رہے گی، جمہوریت پر کامل یقین ہے، عوام کے مسائل حل کرنا ہمارا منشور ہے۔
تفصیلات کے مطابق پیپلز پارٹی کے چیئرمین بلاول بھٹو زرداری نے ایک بیان میں کہا کہ ہم چاہتے ہیں کہ دہشت گردی کا مکمل خاتمہ ہو اور اس کے لیے ضروری ہے کہ دہشت گردی کو جڑ سے اکھاڑ پھینکا جائے۔
بلاول بھٹو نے کہا کہ اگر وفاق اپنی ذمے داریاں پوری کرتا تو یہ دن نہ دیکھنے پڑتے۔ دہشت گردوں کی سرپرستی کرنے والے عوام کے دشمن ہیں۔
انہوں نے مزید کہا کہ پیپلز پارٹی ہمیشہ سے دہشت گردی کے خلاف تھی، ہے اور رہے گی۔
وہ آج میرپور خاص اور نواب شاہ ڈویژن کے عہدے داروں کے اںٹرویوز کریں گے ان کے ساتھ دیگر پی پی رہنما بھی ہوں گے۔ ان کا کہنا تھا کہ ایسے عہدے داروں کو منتخب کرنے کی کوشش کی جارہی ہے جو عوام کی خدمت کریں،جمہوری اداروں کی مضبوطی ہمارا فرض ہے تمام فیصلے جمہوریت کی مضبوطی کے لیے کیے جائیں گے۔
کراچی : چئیرمین پاکستان پیپلز پارٹی بلاول بھٹو نے کہا ہے کہ نواز حکومت قومی ایکشن پلان پر مکمل عملدرآمد سے گریزاں ہے، اچھے اوربرے دہشت گرد کی لغت عوام کو بے وقوف بنانے کے لئے استعمال کی گئی، پشاور دھماکہ اور آزاد کشمیرمیں ایم ڈبلیو ایم کے رہنما علامہ تصور حسین نقوی پرحملہ انتہائی قابل مذمت ہے۔
ان خیالات کا اظہار انہوں نے اپنے جاری بیان میں کیا، بلاول بھٹونے کہا کہ دہشت گردی کے واقعات میں اضافہ ہو رہا ہے اورنواز حکومت قومی ایکشن پلان پر مکمل عملدرآمد سے گریزاں ہے۔
بلاول بھٹو کا کہنا تھا کہ قومی ایکشن پلان پر عملدآمد اپنی مرضی کے تحت نہیں ہوسکتا۔ انہوں نے کہا کہ دہشت گردی کی مصیبت اب وادی کشمیر کی طرف رینگ رہی ہے۔ پیپلزپارٹی دہشتگردی کے خلاف آواز بلند کرتی رہے گی۔
علاوہ ازیں مجلس وحدت المسلمین کے رہنما احمد اقبال رضوی نے علامہ تصور جوادی پر قاتلانہ حملہ کی شدید مذمت کرتے ہوئے جمعہ کو ملک گیر یوم احتجاج منانے کا اعلان کیا ہےاور ملک بھر میں کالعدم جماعتوں کے خلاف فوری آپریشن کا مطالبہ کیا ہے۔
واضح رہے کہ مظفرآباد میں نامعلوم افراد کی فائرنگ سے مجلس وحدت المسلمین آزاد کشمیر کے جنرل سیکرٹری علامہ تصورحسین نقوی زخمی ہوگئے تھے، علامہ تصور حسین نقوی کو جہلم ویلی روڈ پر قاتلانہ حملہ کیا گیا، جنہیں بعد ازاں اسپتال منتقل کردیا گیا۔
کراچی: پیپلز پارٹی نے وفاقی حکومت پر پنجاب میں میٹرو بس منصوبے میں اربوں روپے کی کرپشن کا الزام عائد کرتے ہوئے کہا ہے کہ منصوبے پر دگنی لاگت ظاہر کی گئی، عوام کی سہولت کے نام پر وفاقی حکومت میٹرو بس منصوبوں میں اربوں روپے خورد برد کررہی ہے۔
اے آر وائی نیوز کے نمائندہ کراچی ارباب چانڈیو کے مطابق بلاول ہاؤس میڈیا سیل کی جانب سے ریسرچ ورک کے بعد انچارج میڈیا سیل نے بیان دیا ہے کہ وفاق کی جانب سے میٹرو بسیں چلانے کے جو اعلانات ہورہے ہیں ان میں بدترین مالی کرپشن کی جارہی ہے۔
میڈیا سیل نے دیگر ممالک میں بننے والے میٹرو بس منصوبوں کا لاہور کے میٹرو بس منصوبوں سے موازنہ کیا ہے کہ وہاں کتنی رقم خرچ ہوئی اور پنجاب میں کتنی لاگت آٗئی۔
میڈیا سیل نے کہا ہے کہ موازنے کے مطابق میٹرو بس منصوبے پر ترکی میں 1000 ملین روپے،چین میں 450 ملین روپے جب کہ پنجاب میں 1530 ملین روپے خرچ ہوئے،تخت رائے ونڈ نے بھارت سے 88 اور چین سے 78 ارب زیادہ سرمایہ لگایا۔
انہوں نے کہا کہ لاہور میں میٹرو بس منصوبے پر اربوں روپے لاگت ظاہر کی گئی،ملتان میٹرو بس میں بھی اربوں روپے کا غبن کیا گیا۔
انہوں نے کہا کہ پنجاب میں میٹرو بس منصوبوں پر جتنی لاگت آئی اس سے دگنے اخراجات ظاہر کیے گئے، یہ منصوبے بدترین مالی کرپشن کی نشاندہی کرتے ہیں، عوام کی سہولت کے نام پر وفاقی حکومت اربوں روپے خورد برد کررہی ہے۔
گوجرانوالہ : وفاقی وزیر ریلوے خواجہ سعد رفیق نے کہا ہے کہ نواز شریف نے تین سالوں میں ملک کی کایا پلٹ دی ، بلوچستان کو قومی دھارے میں شامل کیا، کراچی میں امن قائم کیا اور ملک کے کونے کونے میں سڑکوں کا جالوں بچھایا جب کہ اس سے قبل لُوٹو اور پھوٹو کی پالیسی تھی۔
یہ بات انہوں نے گوجرانوالہ میں کارکنان سے خطاب کرتی ہوئے کہی، انہوں نے کہا کہ ہم لوہے کے چنے ہیں جو ہمیں چبانے کی کوشش کرے گا ا س کے دانت ٹو ٹ جائیں گے، بلاول کے بابا اور مشرف نے ملک کا ستیا ناس کر دیا اور کنگال پاکستان ہمارے حوالے کیا گیا تھا۔
انہوں نے تحریک انصاف کے سربراہ کی جانب بسے لگائے گئے الزامات کا جواب دیتے ہوئے کہا کہ مریم نواز ہماری چھوٹی بہن ہے باس نہیں ہے اور ہماری جماعت میں بادشاہت نہیں ہے یہاں کارکنان کی سنی جاتی ہے اور اتفاق رائے سے فیصلے ہوتے ہیں یہی وجہ کہ مجھ سے مڈل کلاس سے تعلق رکھنے والے لوگ اسمبلیوں تک پہنچ پاتے ہیں۔
خواجہ سعد رفیق کا کہنا تھا کہ ملک میں ہر طرف دہشت گردی کا راج تھا لیکن ہم نے ہمت کی اور پاک فوج کے ساتھ مل کر ضرب عضب آپریشن کے زریعے دہشت گردوں کا نیٹ ورک توڑا اور ملک میں امن و امان قائم کیا جب کہ اس سے قبل ہر دوسرے روز دھماکے ہوتے تھے۔
انہوں نے کہا کہ ملک تیزی سے ترقی کر رہا ہے ہم ایک دن میں چاردن کا سفر طے کر رہے ہیں اور اب ملک کو رون مستقبل اور خوشحال معاشرہ بننے سے کوئی نہیں روک سکتا ہے قوم نے نوازش ریف کی قیادت میں ترقی کا سفر جاری رکھنے کا فیصلہ کیا ہے اور جو لوگ پاناما پاناما کا شور مچا رہے ہیں انہیں ناکامی کا سامنا کرنا پڑے گا۔
وفاقی وزیر ریلوے نے کہا کہ خان صاحب کسی اور کے ایجنڈے پر کام کر رہے ہیں اور اگرعدالتی فیصلہ ان کی مرضی کا نہ آیا توعمران خان باہر آکر گند ڈالیں گے یہی وجہ ہے کہ وہ عدالت کو دباﺅمیں لانا چاہتا ہے اور اپنی مرضی کے نتائج حاصل کرنا چاہتے ہیں جس کا دور تک امکان نہیں۔
خواجہ سعد رفیق نے مزید کہا کہ ملک دشمنوں کو نواز شریف پسند نہیں کیوں کہ وہ ملک کی ترقی، خوشحالی اور امن و امان کے لیے دن رات محنت کر رہا ہے نواز شریف کا در سب کے لیے کھلا ہے یہ پیپلز پارٹی نہیں کہ 28 سال کا لڑکا بڑوں کی قیادت کرے اور وہ سر جھکا کر کھڑے ہو جائیں اور نہ ہی یہ بنی گالا کا دربار ہے۔
لاہور: چیئرمین پیپلز پارٹی بلاول بھٹو زرداری کا کہنا ہے کہ موجودہ حکومت نے پنجاب کا بیڑہ غرق کر دیا ہے۔ بجلی، گیس اور روزگار چاہیئے تو شریفوں کو بھگانا ہوگا۔
پاکستان پیپلز پارٹی نے لاہور سے فیصل آباد ریلی کی صورت میں حکومت مخالف تحریک کا آغاز کردیا۔ لاہور کے سگیاں پل پر استقبالی کیمپ سے خطاب کرتے ہوئے چیئرمین بلاول بھٹو کا کہنا تھا کہ پیپلز پارٹی اپنے 4 مطالبات پر قائم ہے اور پورے کروا کر رہے گی۔
بلاول کا کہنا تھا کہ ہم اس کرپٹ نظام کے خلاف ہیں، موجودہ کرپٹ سسٹم سے نکلنے کے لیے عوام کو گھروں سے باہر نکلنا ہوگا۔ جو کالعدم تنظیموں کے ساتھ بیٹھتے ہیں ان سے چھٹکارہ حاصل کرنا ہے۔ جو کھاتے ظالموں کے ساتھ اور بات مظلوموں کی کرتے ہیں۔
چیئرمین پیپلز پارٹی نے مزید کہا کہ حکومت کی کسان دشمن پالیسی سے کسان رل گیا ہے۔ موجودہ حکومت میں کسانوں کو کوئی پوچھنے والا نہیں ہے۔ پیپلز پارٹی کے فیصلوں کے باعث کسان خوشحال ہوا تھا۔
انہوں نے موجودہ حکومت کو کسان اور مزدور دشمن حکومت قرار دیا۔
حکومت مخالف تحریک کے آغاز سے قبل انہوں نے اپنے سماجی رابطوں کی ویب سائٹ ٹوئٹر پر ٹوئٹ کیا تھا، ’مک گیا تیرا شو نواز، گو نواز گو نواز‘۔
لاہور : پاکستان پیپلز پارٹی کے چئیرمین بلاول بھٹو زرداری نے لاہور کو سیاسی مرکز بنانے کا فیصلہ کرلیا۔ بلاول بھٹو زرداری رواں ہفتے لاہور سے عوامی رابطہ مہم کا آغاز کریں گے۔
پاکستان پیپلز پارٹی کے چئیرمین بلاول بھٹو زرداری اپنے چار مطالبات نہ ماننے پرنواز لیگ کے خلاف جنگ کے لیے تیار ہوگئے، عام انتخابات سے قبل بلاول ہاؤس لاہور کو سیاسی سرگرمیوں کا مرکز بنانے کا فیصلہ کرلیا۔
ذرایع کے مطابق بلاول بھٹو زرداری رواں ہفتے لاہور پہنچیں گے اور عوامی رابطہ مہم کا آغاز کریں گے، بلاول بھٹو زرداری نے اپنی میڈیا ٹیم اور اسٹاف کوبھی لاہور طلب کرلیاہے۔
اسلام آباد میں بلاول بھٹو زرداری سے اپوزیشن لیڈرخورشید شاہ نے ملاقات کی جس میں چوبیس ویں آئینی ترمیم فوجی عدالتوں کے قیام میں توسیع، پانامہ لیکس، پیپلزپارٹی کےچار نکات اورلاڑکانہ کے انتخاب پر مشاورت کی گئی۔
خورشید شاہ نے ایاز صادق کی جانب سے بلائے جانے والی پارلیمانی پارٹیوں کے اجلاس کے بارے میں تفصیلات سے آگاہ کیا۔
ملاقات میں فوجی عدالتوں کے حوالے سے بھی گفتگو ہوئی، ذرائع کے مطابق ملاقات میں فوجی عدالتوں کے حوالے سے تحفظات کا اظہارکرتے ہوئے حکومت کا مؤقف سننے پر اتفاق کیا گیا۔
کراچی: پیپلز پارٹی کی سینٹرل ایگزیکٹیو کمیٹی نے فیصلہ کیا ہے کہ پیپلز پارٹی کے چیئرمین بلاول بھٹو اور سابق صدر آصف زرداری ایک ہی انتخابی نشان پر ضمنی انتخابات لڑیں گے۔
تفصیلات کے مطابق پاکستان پیپلز پارٹی اور پاکستان پیپلز پارٹی پارلیمینٹرینز نے فیصلہ کیا ہے کہ پاکستان پیپلز پارٹی کے چیئرمین بلاول بھٹو زرداری اور پاکستان پیپلز پارٹی پارلیمینٹرینز کے صدر آصف علی زرداری قومی اسمبلی کی نشستوں کے لیے ایک ہی انتخابی نشان تیر پر ضمنی انتخابات لڑیں گے۔
بلاول ہاؤس میڈیا سیل کی جانب سے جاری کردہ بیان میں کہا گیا ہے کہ الیکشن کمیشن کو پولیٹیکل پارٹیز آرڈر 2002 کے تحت ایک ہی انتخابی نشان الاٹ کرنے کے لیے درخواست دی جائے گی۔
بلاول ہاؤس میڈیا سیل نے میڈیا کے ایک سیکشن میں شائع ہونے والی اس خبر کی سختی سے تردید کی ہے جس میں کہا گیا ہے کہ بلاول بھٹو زرداری اور آصف علی زرداری مختلف انتخابی نشان پر ضمنی انتخابات لڑیں گے۔
میڈیا سیل کی جانب سے کہا گیا ہے کہ بلاول بھٹو زرداری اور آصف علی زرداری کے ضمنی انتخابات لڑنے کا فیصلہ پارٹی کی سینٹرل ایگزیکیٹو کمیٹی میں ہوا تھا۔
کراچی : پیپلز پارٹی کے چیئرمین بلاول بھٹو زرداری نے کہا ہے کہ خواتین پر تشدد کرنے والوں کے خلاف قانون سازی ناگزیر ہے، حال ہی میں قانون میں جو تبدیلیاں کی گئی ہیں وہ اچھی ہیں مگر کافی نہیں، ہمارے قوانین میں آج بھی سقم موجود ہیں۔
ان خیالات کا اظہار انہوں نے آرٹس کونسل کراچی میں مصنفہ نفیسہ شاہ کی کتاب کی تقریب رونمائی سے خطاب کرتے ہوئے کیا، بلاول بھٹو نے کہا کہ نفیسہ شاہ نے جس موضوع پر لکھا وہ نہایت توجہ کا متقاضی ہے، خواتین پر تشدد کا خاتمہ از حد ناگزیر ہے۔
انہوں نے کہا کہ رواں سال کئی لڑکیوں کوغیرت کے نام پر قتل کیا گیا، غیرت کے نام پر قتل کرنے والوں کو سزائیں دلوانا ہمارے لیےچیلنج ہے، بے نظیر بھٹو شہید کے بارے میں بھی ہمیں انصاف نہیں ملا، لاہور میں لڑکی کو اس کی ماں نے غیرت کے نام پر زندہ جلادیا۔
بلاول بھٹو نے کہا کہ اگر کوئی ہماری بہنوں کا بال بھی بیکا کرتا ہے تو ہمیں اس کو نہیں چھوڑنا چاہئیے، اگر ہمیں انصاف نہیں ملا تو باقی پاکستانیوں کو کیا انصاف ملے گا۔
انہوں نے کہا کہ ہم عزم کرتے ہیں کہ پاکستان کی ہر لڑکی مستقبل کی بے نظیر ہے، تشدد کے معاملے میں معاف کرنے والے قوانین بااثر لوگ استعمال کرتے ہیں، سندھ حکومت نے خواتین پر تشدد کے خلاف دو قرار دادیں پاس کیں، پاکستانی خواتین دنیا کی بہادر ترین خواتین ہیں۔
کراچی: پیپلز پارٹی کے شریک چیئرمین اور سابق صدر آصف علی زرداری کے استقبال کی تیاریاں جاری ہیں۔ کراچی کے گلی کوچے ویلکم زرداری کے بینروں سے سج گئے۔ وزیر اعلیٰ سندھ مراد علی شاہ نے بھی کراچی ایئرپورٹ کا دورہ کیا اور انتظامات کا جائزہ لیا۔
تفصیلات کے مطابق 23 دسمبر کی سہ پہر سابق صدر آصف علی زرداری وطن واپس آرہے ہیں جس کے لیے پیپلز پارٹی کی تیاریاں زور و شور سے جاری ہیں۔ کراچی بھر کو ویلکم زرداری کے بینرز سے سجا دیا گیا۔ شاہراہوں اور چوراہوں پر سہہ رنگی پرچم لہرانے لگے۔
شہر کے مختلف علاقوں میں استقبالیہ کیمپ سج گئے۔
دوسری جانب وزیر اعلیٰ سندھ مراد علی شاہ نے کراچی ایئر پورٹ کا دورہ کیا، جلسہ گاہ کا معائنہ کیا اور وہاں انتظامات کا جائزہ لیا۔
وزیر اعلیٰ نے ہدایت جاری کی کہ ائیر پورٹ آنے جانے والے مسافروں کو مشکلات نہیں ہونی چاہیئے۔ حکام پارکنگ اور دیگر مناسب انتظامات کریں۔
میڈیا سے گفتگو کرتے ہوئے ایک سوال کے جواب میں انہوں نے کہا کہ سرکاری افسران کی تبدیلی ہوتی رہتی ہے اگر آئی جی سندھ تبدیل ہوئے تو ان کی جگہ سینئر افسر ہی آئے گا۔
مراد علی شاہ نے کہا کہ سندھ کے لوگوں نے 1970 سے سنہ 2008 تک پیپلز پارٹی کو کامیاب کروایا۔ انہوں نے کہا کہ اگر کوئی سیاسی اتحاد بنتا ہے تو بن جائے، ہم اپنا کام کرتے رہیں گے۔
کراچی: متحدہ عرب امارات کے وزیر برائے ثقافت شیخ نہیان مبارک النہیان نے پیپلز پارٹی کے چیئرمین بلاول بھٹو زرداری سے ملاقات کی۔
تفصیلات کے مطابق بلاول ہاؤس میں ہونے والی ملاقات میں متحدہ عرب امارات کے سفیر عیسیٰ عبداللہ اور قونصل جنرل نصیر حوادین القطبی بھی موجود تھے۔
دونوں رہنماؤں کے درمیان ملاقات میں دو طرفہ تعلقات، علاقائی امور سمیت دیگر معاملات پر تفصیلی تبادلہ خیال کیا گیا۔
دوسری جانب پیپلز پارٹی نے سابق صدر آصف علی زرداری کی وطن واپسی کا شیڈول جاری کردیا ہے۔ جیالوں نے شریک چیئرمین آصف زرداری کے استقبال کی تیاریاں شروع کردی ہیں۔
آصف علی زرداری 23 دسمبر کی سہ پہر خصوصی پرواز سے کراچی پہنچیں گے۔
