لندن: پاکستان پیپلز پارٹی کے شریک چیئرمین اورسابق صدرآصف علی زرداری آج لندن میں پارٹی رہنماؤں سے اہم ملاقات کررہے ہیں۔
پیپلز پارٹی کے لندن میں ہونے والے اجلاس میں ملک میں درپیش سیاسی صورتحال کا بھی جائزہ لیا جائے گا اور ساتھ میں تھرپارکرکی صورتحال بھی اجلاس کے ایجنڈے میں شامل ہے۔
قحط زدہ علاقوں میں معاملات کو بہتر بنانے کیلئے ہنگامی بنیادوں پرکام کے احکامات جاری کئے جائیں گے، اجلاس کے بعد سابق صدر آصف علی زرداری پریس کانفرنس بھی کریں گے ۔
کراچی: وزیراطلاعات سندھ شرجیل میمن نے کہا ہے کہ ایم کیو ایم کے ارکان سندھ اسمبلی کی جانب سے وزیراعلیٰ سندھ پر لگائے جانے والے الزامات من گھڑت اور بے بنیاد ہیں۔
شرجیل میمن کاکہنا تھا کہ ایم کیو ایم نے ہر دور میں اقتدار کے مزے لوٹے ہیں اور من پسند وزارتیں حاصل کی ہیں، محکمہ صحت کا قلمدان برسوں ایم کیو ایم کے وزراء کے پاس رہا ہے ،اس لیے ہر چیز کی وہ برابر کی ذمہ دار ہے، انہوں نے کہا کہ سیاسی جماعتیں پوائنٹ اسکورنگ نہ کریں تھر پارکر کی پسماندگی اور قدرتی آفات کو سنجیدگی سے محسوس کریں،تھر پارکر پاکستان کا پسماندہ علاقہ ہے وہاں کی صورتحال جیسی حالت کسی اور حصے میں نہیں ہے۔
صوبائی وزیر اطلاعات نے کہا کہ بے بنیا د الزامات اور من گھڑت پروپیگنڈے سے وعام کو گمراہ نہیں کیا جاسکتا، شرجیل میمن نے کہا کہ وزیراعلیٰ سندھ ایک تجربہ کار سیاست دان ہیں اور وہ بہتر طریقے سے صوبے کو درپیش مسائل کو حل کررہے ہیں۔
کراچی: تھر میں قحط سالی سے پید اہو نے والی صورت حال اور اس دوران بچوں کی اموات پر سندھ حکومت شدید دباوں میں ہے۔ ایم کیو ایم کی جانب سے تھر کی صورت حال پر پیپلز پارٹی کو مسلسل تنقید کا نشانہ بنایا جارہا ہے۔ تھر میں بچوں کی اموات پر شرجیل میمن اور اظہار الحسن آمنے سامنے آگئے۔
تفصیلات کے مطابق سندھ کےوزیر اطلاعات شرجیل میمن نے کہا ہے کہ صوبائی حکومت تھر میں قدرتی آفات سے نمٹنےکی کوششیں کررہی ہےتاہم پاکستان میں روزانہ چھ سو بچے جاں بحق ہوتے ہیں۔ محض تھر کےحوالےسےاس مسئلے کو نہ دیکھا جائے۔
دوسری جانب تھرایم کیو ایم کے رہنما اظہار الحسن کا کہنا ہے کہ میں ایک بھی بچہ مرےگاتو ایم کیو ایم جواب طلب کرےگی۔ ایم کیو ایم کےرہنماخواجہ اظہارالحسن نے کہا ہے کہ پورے پاکستان میں بچوں کی ہلاکتوں کی تعداد کو تھر کےمسئلے سے نہ جوڑا جائے۔ سندھ میں ایک بچہ بھی بھوک سے مرےگا تو ایم کیو ایم حکومت سے جواب طلب کرے گی۔
شرجیل میمن اور اظہار الحسن علیحدہ علیحدہ سندھ اسمبلی کےباہر میڈیا سے گفتگوکررہے تھے۔
اسلام آباد: پیپلز پارٹی نے قومی اسمبلی کے آج کے اجلاس سے واک آؤٹ کردیا اور کل قومی اسمبلی کے اجلاس کا احتجاج کے طور پر بائیکاٹ کرنے کا اعلان کیا ہے۔
پیپلز پارٹی نے واک آؤٹ اوجی ڈی سی ایل ملازمین پر پولیس کے تشدد پر کیا۔
اپوزیشن لیڈر خورشید شاہ کا کہنا ہے کہ بہری اور اندھی حکومت کو نہ کچھ دکھائی دیتا ہے نہ کچھ سنائی دیتا ہے، خورشید شاہ نے وزراء کو نااہل قرار دیتے ہوئے کہا کہ وزراء کی ہی وجہ سے وزیرِاعظم نوازشریف کو مسائل کا سامنا ہے۔
وزیرِ داخلہ چودہری نثار کے بیان پر اپوزیشن لیڈر کا کہنا تھا کہ وہ اپنی سناتے ہیں، دوسرے کی سنتے ہی نہیں۔
اجلاس میں انہوں نے حکومت پر تنقید کرتے ہوئے نجکاری کے خلاف آواز اٹھانے والے مزدوروں پر لاٹھیاں برسانے کے واقعے کا حوالہ دیا، خورشید شاہ نے کہا کہ مزدوروں کیخلاف حکومت نے طاقت کا مظاہرہ کیا تو طاقت کا جواب دیں گے۔
تہران: پاک ایران گیس پائپ لائن منصوبے کے حوالے سے مذاکرات کا اہم دور آج سے تہران میں شروع ہورہا ہے ۔
پاکستان اور ایران کے وزارت پیٹرولیم و قدرتی وسائل کے حکام کے درمیان مذاکرات میں سات ارب ساٹھ کروڑ ڈالر مالیت کے اس منصوبے کو عملی جامہ پہنانے کے بارے میں بات چیت کی جائے گی ۔پاکستانی حکام اپنے حصے کی پائپ لائن کی تعمیر کیلئے ڈیڈ لائن میں توسیع کی کوشش کرے گااور اس کے علاوہ جرمانے سے بھی بچنے کیلئے بات چیت کی جائے گی۔ معاہدے کی رو سے پاکستان کو اپنے حصے کی پائپ لائن کی تعمیرگزشتہ سال کے اختتام تک ختم کرنا تھی مگر ایران پر عائد پابندیوں کے باعث ایسا ممکن نہ ہوسکا۔
کراچی: ایم کیو ایم کے رہنماء ڈاکٹر فاروق ستار نے کہا ہے کہ اعتزاز احسن کے بیان سے لگتا ہے کہ وہ خورشید شاہ کا مقدمہ لڑ رہے ہیں،اعتزازا حسن کا بیان خود عدم برداشت کی عکاسی کرتا ہے۔
پیپلز پارٹی کے سینیٹر اعتزاز احسن کے بیان پر ہنگامی پریس کانفرنس میں شدید رد عمل دیتے ہوئے رابطہ کمیٹی کے ممبر فاروق ستار کا کہنا تھا کہ چودھری اعتزاز احسن نے آج حقائق کو توڑ مروڑ کر پیش کیا۔ ڈاکٹر فاروق ستار کہتے ہیں کہ اعتزاز احسن کے بیان سے ان کی ذہنیت کا اندازہ ہوتا ہے،اعتزاز احسن کا بیان بھی تحقیر آمیز اور متعصبانہ ہے۔ ہمیں روادرای اور برداشت کا سبق پڑھانے والے اعتزاز احسن کا بیان عدم برداشت کی عکاسی کرتا ہے۔
فاروق ستار نے کہا کہ اعتزاز احسن بیگانے کی شادی میں عبداللہ دیوانے کا کردار ادا کر رہے ہیں، اعتزاز احسن کا بیان بھی ہماری دل آزاری کے برابر ہے، انہوں نے کہا کہ اعتزازاحسن خورشید شاہ کو صیح ثابت کرنے اور مہاجروں میں چور ڈاکو ڈھونڈنے کے بجائے پیپلز پارٹی کی صوبائی حکومت کا جائزہ لیں، جو کرپشن مافیا کی سرپرستی کر رہی ہے۔
فاروق ستار نے کہا کہ جلد ایم کیو ایم پیپلز پارٹی کی صوبائی حکومت کی کرپشن، قومی خزانے کو لوٹنے کے حوالے سے وائٹ پیپز بھی شائع کرے گی، پیپلز پارٹی جمہوریت کے نام پر تجوریاں بھرنے کا عمل ترک کرے ۔
کراچی: ایم کیوایم کے رہنما ڈاکٹر فاروق ستار کہتے ہیں کہ خورشید شاہ خود استعفی دے دیں۔ پیپلزپارٹی کوئی دوسرا اپوزیشن لیڈر لے آئے تو قبول ہوگا۔
پیپلز پارٹی کے رہنمااور اپوزیشن لیڈر خورشید شاہ کی جانب سے دیئے گئے بیان نے ایک بار پھر پاکستان سمیت سندھ کا سیاسی ماحول انتہائی گرم کردیا ہے۔ خورشید شاہ کے بیان پر ایم کیوایم ناراض ہے تو دوسری جانب ایم کیو ایم کے اہم رہنماوں نے بھی خورشید شاہ کو آڑے ہاتھوں لیا ہے۔
ایم کیو ایم کے رہنما ڈاکٹر فاروق ستار کہتے ہیں کہ خورشید شاہ خود ہی مستعفی ہو جائے۔ پیپلزپارٹی کوئی دوسرا اپوزیشن لیڈر لے آئے تو قبول کرلیں گے۔ انھوں نے مزید کہا کہ سیاسی طور پرخورشید شاہ اپنے عہدے پر رہنے کے اہل نہیں رہے۔
دوسری جانب ایم کیوایم کی اپوزیشن لیڈرکی تبدیلی کیلئےمشاورت بھی شروع ہو گئی ہے۔ فاروق ستارنےکہاہے اپوزیشن لیڈرکی تبدیلی کیلئےدوسری جماعتوں سے بھی مشاورت کررہے ہیں۔
لاڑکانہ :پیپلز پارٹی کے چیئرمین بلاول بھٹو زرداری کا کہنا ہے کہ کراچی میں لبرل فاشسٹ سیاسی فائدے کے لئے ضیاء دور کے قانون کو سندھیوں کے خلاف استعمال کرتے رہے ہیں، انہوں نے کہا کہ مرسوں مرسوں کراچی نہ ڈیسوں۔
لاڑکانہ میں دیوالی کی تقریب سے خطاب کرتے ہوئے پیپلز پارٹی کے چیئرمین بلاول بھٹو زرداری کا کہنا تھا کہ پیپلز پارٹی سندھ کو تنہا نہیں چھوڑے گی، ان کا کہنا تھا کہ کراچی میں بھی لبرل فاشسٹ اپنی زاتی اور سیاسی فائدے لینے کے لئے ضیاء کے قانون کو سندھیوں کے خلاف استعمال کرتے رہے ہیں۔
بلاول بھٹو زرداری کا کہنا تھا کہ کراچی سندھ کا تاج ہے ، کراچی منی پاکستان ہے۔ اس موقع پر انھوں نے مردیسوں مردیسوں کراچی نہ دیسوں کا نعرہ بھی بلند کیا۔
لاڑکانہ میں پیپلز پارٹی کی جانب سے ہندو برادری کا مذہبی تہوار دیوالی منایا گیا، دیوالی کی تقریب میں ہندو برادری نے بھرپور انداز میں شرکت کی۔
سندھ میں پہلی مرتبہ ہندو براداری کا مذہبی تہوار دیوالی کسی سیاسی جماعت کے تحت منایا گیا، لاڑکانہ کے نوڈیرو ہاوس میں دیوالی کی تقریب کا اہتمام کیا گیا، زرق برق لباس میں ملبوس خواتین نے دیوالی کے تہوار کو پورے مذہبی جوش سے منایا ، اس موقع پر ان کی خوشی دیدنی تھی۔
دیوالی کے اس موقع پر شاندار آتشبازی کا بھی اہتمام کیا گیا، جس نے تقریب کے شرکاء کی خوشیوں کو دوبالا کر دیا۔
پیپلز پارٹی کے چیئرمین بلاول بھٹو زرداری آج کراچی میں مزار قائد کے سائے تلے اپنے سیاسی سفر کا آغاز وہیں سے کر رہے ہیں جہاں سے شہیدبی بی نے کیاتھا۔
جئے بھٹو اور جئے بینظیر کے نعروں کی صداؤں میں جلسے کی تیاریاں حتمی مراحل میں پہنچ چکی ہیں۔ بلاول بھٹو زرداری جلسہ گاہ پہنچنے کیلیے وہی ٹرک استعمال کرینگے جو انکی والدہ نے اپنی جلاوطنی کے بعدوطن واپسی پرکراچی ایئر پورٹ سےمزارقائد جانےکیلیےاستعمال کیا تھا۔
گذشتہ شب اسی ٹرک پر سوار نوجوان بلاول بھٹو زرداری کا کہنا تھا کہ وہ اپنا سیاسی سفر وہیں سے شروع کر رہے ہیں جہاں سے انکی والدہ چھوڑ گئیں تھیں۔
بلاول بھٹو زرادری آج کراچی میں اپنا جلسہ کریں گے اور مزار قائد کے قریب دو ہزار دس میں ہونے والے جلسے کے بعد دوسرا بڑا جلسہ ہو گا۔ اس جلسے میں سابق صدر پاکستان اور شریک چیئر مین پی پی پی آصف علی زرداری نے ویڈیو لنک کے ذریعے خطاب کیا تھا۔
کراچی: مزار قائد سے منسلک باغ جناح کراچی میں پیپلز پارٹی کے جلسے کی تیاریاں مکمل کر لیں گئی۔ ملک بھر سے پی پی کے جیالوں کے قافلے شہر میں داخل ہونا شروع ہو گئے ہے جبکہ مزید قافلے بسوں ،ٹرینوں اور دیگر ٹرانسپورٹ کے ذریعے شہر قائد کی جانب رواں دواں ہیں۔
سیاسی کھیلاڑیوں کا کہنا ہے کہ بلاول اپنے سیاسی کیرئیرکا آغاز اس اہم جلسے سے شروع کر نے والے ہیں اور ان کی جانب سے اس سلسلے میں اہم خطاب بھی متوقع ہے۔
دوسری جانب سانحہ کارسازکےشہداکی یادگار پر پی پی کے کارکنوں کی آمد کا سلسلہ بھی جاری ہےاور شہدا کی یاد میں یادگار پر پھولوں کی چادر کے ساتھ ساتھ چراغاں بھی کیا جارہا ہے۔
اطلاعات کے مطابق پیپلزپارٹی کے جلسے میں شرکت کیلئے ملک بھر سے قافلے روانہ ہو گئے ہے۔ لاہور میں خصوصی ٹرین کے ذریعے کارکنوں کی بڑی تعداد روانہ ہوچکی ہے۔ جبکہ ملتان اور دیگر شہروں سے بھی پیپلز پارٹی کے کارکنوں کی بڑی تعداد کراچی پہنچے گی۔
لاہور ریلوے اسٹیشن پر کارکنوں کو روانہ کرتے ہوئے پیپلزپارٹی پنجاب کے صدر میاں منظور وٹو کا کہنا تھا کہ اٹھارہ اکتوبر کا جلسہ قدامت پرست اور ترقی پسند قوتوں کے درمیان فرق واضح کرے گا، انہوں نے کہا کہ پیپلز پارٹی ترقی پسند سیاست پر یقین رکھتی ہے، پنجاب سے لاکھوں کارکن جلسے میں شرکت کرینگے۔
فیصل آباد سے بھی پیپلزپارٹی کے کارکن اکیس بسوں اور ٹرین کی آٹھ بوگیوں پر کراچی کے جلسے میں شرکت کیلئے روانہ ہوچکے ہے۔
گھوٹکی سے صوبائی وزیر سردار علی نواز مھر کی قیادت میں کارکنوں کا قافلہ شہر قائد کی جانب رواں دواں ہے۔ اس قافلے میں گھوٹکی کی مختلف تحصیلوں سے دو سو پچاس چھوٹی بڑی گاڑیوں میں سیکڑوں کارکنان سوار ہیں۔
دوسری جانب گلگت سے تین بسوں پر مشتمل پیپلزپارٹی کے کارکنوں کا قافلہ کراچی پہنچ چکا ہے ۔ سکرنڈ سے پیپلز پارٹی کا قافلہ پیدل سفر طے کرتے ہوئےکراچی میں سانحہ کارساز کے شہدا کی یادگار پر پہنچ گیا ہے۔
شہر کے بیشتر مقامات پر کارکنوں کیلیے استقبالیہ کیمپ بھی لگائے گئے ہے جو جلسہ گاہ کے حوالے سے جیالوں کی رہنمائی کر رہے ہیں۔
خبروں کے مطابق پیپلز پارٹی کی جانب سے باغ جناح کے جلسے میں میوزیکل کنسرٹ کا بھی انتظام کیا گیا۔
جبکہ گزشتہ رات بوٹ بیسن پر آتشبازی کا مظاہرہ بھی کیا گیا تھا۔