Tag: پیکا ترمیمی ایکٹ

اسلام آباد : اسلام آباد ہائیکورٹ بار نے پیکا ترمیمی ایکٹ کو کالا قانون قرار دے دیا اور کہا ترامیم آزادی اظہار رائے اور بنیادی انسانی حقوق کے منافی ہیں۔

تفصیلات کے مطابق پیکا ایکٹ میں ترمیم کے خلاف اسلام آباد ہائیکورٹ بار میں مذمتی قرارداد منظور کرلی گئی ، جس میں اسلام آباد ہائیکورٹ بار نے پیکا ترمیمی ایکٹ کو کالا قانون قرار دے دیا۔

اسلام آباد ہائیکورٹ بار نے پی ای سی اے ایکٹ2016 کیخلاف اعلامیہ جاری کیا ، جس میں کہا کہ پیکا ایکٹ کالا قانون اور آزادی رائے کا گلہ گھونٹنے کے مترادف ہے اور ترامیم آزادی اظہار رائے اور بنیادی انسانی حقوق کے منافی ہیں۔

اعلامیے میں کہا گیا کہ پیکاایکٹ میں یہ ترامیم آئین کے آرٹیکل 8 اور 19 سے بھی متصادم ہے، ترمیم آزادی اظہار ،آرٹیکل 19 کے تحت ہر شہری کا بنیادی حق ہے، اس ترمیم سے آزادانہ رپورٹنگ اور تنقیدی آرا کے اظہار کو نقصان پہنچے گا۔

ہائیکورٹ بار کا کہنا تھا کہ قانون کا غلط استعمال ، پیکا ایکٹ کی سابقہ دفعات کا بھی غلط استعمال دیکھنےمیں آیا، عوامی مفاد کیخلاف یہ ترامیم بنیادی حقوق کے منافی ہے اور فوری واپس لیا جانا چاہیے۔

اعلامیے میں کہا ہے کہ اس قانون کو صحافی برادری کیسا تھ ملکر اسلام آباد ہائیکورٹ میں چیلنج کیا جائے گا۔

اسلام آباد : متنازع پیکا ترمیمی ایکٹ کیخلاف آزادی صحافت تحریک کا اعلان کردیا گیا، صدر پی ایف یوجے افضل بٹ نے کہا کہ پارلیمنٹ ہاؤس کے باہر دھرنا دیا جائے گا۔

تفصیلات کے مطابق صدر پی ایف یو جے افضل بٹ نے اے آر وائی نیوز کے باخبر سویرا میں گفتگو کرتے ہوئے کہا کہ موجودہ حکومت اپوزیشن میں تھی تو انھیں صحافیوں کی آزادی اچھی لگتی ہے، ماضی کی حکومتوں میں بھی ایسا ہوتا رہا ہے۔

صدر پی ایف یو جے کا کہنا تھا کہ آصف زرداری اور بلاول بھٹو سے ہمیں بہت امیدیں تھیں کیونکہ واحدبلاول بھٹو نے ماضی میں بھی صحافی کی آزادی کیلئے پارلیمنٹ میں بات کی۔

انھوں نے کہا کہ پیکا ترمیمی ایکٹ کےنتیجے میں پہلے پکڑدھکڑ کی جائیگی پھر سزا دی جائے گی ، پیکاترمیمی ایکٹ کے خلاف پریس فریڈم موومنٹ کا اعلان کردیا ہے، ایکٹ کیخلاف پی ایف یوجے کا صرف احتجاج نہیں بلکہ موومنٹ ہے۔

پی ایف یو جے صدر کا مزید کہنا تھا کہ آزادی صحافت کی تحریک کاآغاز ہوچکا اب اس کا اختتام پورے پاکستان سے لوگوں کے آنے کے بعد ہوگا،پارلیمنٹ ہاؤس کے باہر دھرنا دیا جائے گا ، جو پیکا ایکٹ کے خاتمے تک جاری رہے گا۔

افضل بٹ نے بتایا کہ پیکا ترمیمی ایکٹ کیخلاف عدالت بھی جارہے ہیں، جس پر قانونی ماہرین کام کررہےہیں اور مختلف شقوں کا جائزہ لیاجارہاہے، ایکٹ پر فوری عملدرآمد کاامکان نہیں کیونکہ ابھی اتھارٹی رولز بننے ہیں۔

ان کا کہنا تھا کہ جس اسپیڈ سے حکومت نے قانون منظورکرایا ہوسکتاہے ان کی تیاری بھی مکمل ہو، ایکٹ پر عملدرآمد کی رفتار چند روز میں واضح ہوجائے گی اور ایکٹ سے متاثرہ صحافیوں کو قانونی اور انسانی بنیاد پر بھی تعاون فراہم کریں گے۔

پاکستان یونین آف جرنلسٹس (پی ایف یو جے) کے صدر افضل بٹ کا کہنا ہے کہ صدر زرداری سے درخواست ہے جب پیکا بل آئے تو اعتراض لگادیں۔

اے آر وائی نیوز کے مطابق صدر پی ایف جے افضل بٹ کا کہنا ہے کہ صدر زرداری متنازع ایکٹ واپس کردیں تو شاید حکومت کو سمجھ آجائے، 25 کروڑ پاکستانیوں سے اظہار رائے، انفارمیشن کا حق چھینا جارہا ہے۔

انہوں نے کہا کہ عوام کو پتہ ہونا چاہیے ان کے ٹیکس سے چلنے والی پارلیمنٹ کیا کررہی ہے۔

افضل بٹ نے کہا کہ ہم پیکا ترمیمی ایکٹ کے خلاف عدالتوں کا بھی رخ کریں گے اور سڑکوں پر بھی احتجاج کریں گے۔

واضح رہے کہ پیکا ایکٹ متنازع ترمیم کیخلاف پاکستان فیڈرل یونین آف جرنسلٹس (پی ایف یو جے) نے کل ملک گیراحتجاج کی کال دے دی۔

سیکریٹری جنرل پی ایف یوجے ارشدانصاری نے کہا کہ پیکا ایکٹ ڈریکونین قانون ہے ، ملک بھر میں کل پریس کلبز کے باہر احتجاج کیا جائے گا۔

ان کا کہنا تھا کہ آئین کی روح کے منافی قانون کو تسلیم نہیں کیا جائے گا، حکومت سے کہاتھا پیکاایکٹ ترمیم سے پہلے اسٹیک ہولڈرز سے مشاورت کی جائے۔

پی ایف یوجے نے مزید کہا کہ ہماری اپیل کو نظرانداز کرکے ایوان سے پیکاایکٹ میں متنازع ترمیم منظور کرائی گئی۔

یاد رہے صحافتی تنظیموں نے متنازع پیکا ایکٹ ترمیمی بل کو مسترد کرتے ہوئے اس کے خلاف ملک گیر احتجاج اور عدالت سے رجوع کرنے کا اعلان کیا تھا۔

پشاور: خیبرپختونخوا اسمبلی میں پیکا ترمیمی ایکٹ کے خلاف مذمتی قرارداد منظور کرلی گئی۔

اے آر وائی نیوز کے مطابق پیکا ترمیمی ایکٹ کے خلاف قرارداد پی ٹی آئی رہنما شفیع اللہ جان نے پیش کی جس میں کہا گیا  کہ پیکا ترمیمی ایکٹ آزادی صحافت پر قدغن ہے، کے پی اسمبلی آزادی صحافت اور اظہار رائے کی آزادی پر قدغن مسترد کرتی ہے۔

قرارداد کے متن کے مطابق صحافی برادری کے ساتھ مل کر یکجہتی کا اظہار کرتے ہوئے ایکٹ کی مذمت کرتے ہیں۔

قرارداد میں مطالبہ کیا گیا کہ وفاق پیکا ایکٹ سے غیرجمہوری اور متنازع ترامیم واپس لے، قراداد کی منظوری کے بعد کے پی اسمبلی کا اجلاس پیر تک ملتوی کردیا گیا۔

واضح رہے کہ قومی اسمبلی نے پیکا ایکٹ میں ترمیم کا متنازع بل کثرتِ رائے سے منظور کرلیا، صحافیوں نے احتجاج کرتے ہوئے پریس گیلری سے واک آؤٹ کیا، متنازع ترمیمی بل رانا تنویرنے پیش کیا۔ فیک نیوز پھیلانے پر تین سال قید یا بیس لاکھ جرمانہ ہوگا۔