کراچی : جکارتہ سے لایا گیا دوسرا طیارہ بھی پی آئی اے فلیٹ میں شامل ہوگیا، جس کے بعد پی آئی اے کے فعال ایئر بس اے 321 طیاروں کی تعداد 17 ہوگئی۔
تفصیلات کے مطابق جکارتا سے لایا گیا دوسرا طیارہ بھی پی آئی اے فلیٹ میں شامل ہوگیا، لیزنگ کمپنی سے تنازعہ کا شکار طیارہ 7 فروری کو پاکستان لایا گیا تھا۔
طیارے نے آج صبح 7بجکر15منٹ پرکراچی سے لاہور کیلئے اڑان بھری ، لیزنگ کمپنی سے تنازعہ کا شکار ایک طیارہ دسمبر میں پاکستان پہنچا تھا۔
پی آئی اے کے فعال ایئر بس اے 321 طیاروں کی تعداد 17 ہوگئی ہے۔
یاد رہے ترجمان پی آئی اے نے بتایا تھا کہ سیکریٹری ایوی ایشن کی سربراہی میں پی آئی اے کا اعلیٰ سطح کا وفد ملائیشیا گیا تھا، جس نے لیزنگ کمپنی ایئر ایشیا کے ساتھ طیاروں کا معاملہ حل کرنے کے لیے مذاکرات کیے۔ یہ دونوں طیارے لیزنگ کمپنی سے تنازعے کے سبب ستمبر 2021 سے جکارتہ میں کھڑے تھے۔
ترجمان کا کہنا تھا کہ ری ڈلیوری چارجز بچا کر ان طیاروں کو 26 ملین ڈالر کے عوض ہم نے خرید لیا ہے، وفد نے طیاروں کی ری ڈیلیوری کے لیے لیزنگ کمپنی سے مذاکرات کیے۔ ترجمان نے طیاروں پر 15 ملین ڈالر پارکنگ چارج ادا کیے جانے سے متعلق چھپنے والی خبر بھی غلط اور بے بنیاد قرار دی۔