Tag: پی آئی اے

کراچی: کینیڈا سے پاکستان آنے والے مسافروں کے لیے اچھی خبر آ گئی ہے، پی آئی اے نے ٹورنٹو سے پاکستان پروازوں کے کرایوں میں 15 فی صد کمی کا اعلان کر دیا۔

اے آر وائی نیوز کے مطابق قومی ایئرلائن نے کینیڈا سے پاکستان آنے والے مسافروں کے لیے کرایوں میں دو مہینے کے لیے کمی کر دی ہے، ترجمان پی آئی اے کا کہنا ہے کہ کرایوں میں کمی کی سہولت 15 نومبر تک میسر رہے گی۔

پاکستان انٹرنیشنل ایئر لائن نے فیصل آباد سے کراچی کے اندرون ملک پروازوں کے کرائے میں بھی کمی کا اعلان کر دیا ہے۔

ترجمان پی آئی اے کا کہنا ہے کہ فیصل آباد سے کراچی آنے اور جانے والی پروازوں کے کرائے میں 20 فی صد کمی کر دی گئی ہے، کرایوں میں کمی کا مقصد مسافروں کو سفری سہولیات فراہم کرنا ہے۔

پی آئی اے کا کرایوں میں زبردست کمی کااعلان

یاد رہے کہ 4 ستمبر کو بھی قومی ایئر لائن کرایوں میں زبردست کمی کا اعلان کیا تھا، پی آئی اے نے کراچی، لاہور اور اسلام آباد کے درمیان نیا پیکج متعارف کرایا، ترجمان کا کہنا تھا کہ 20 کلو سامان کے ساتھ یک طرفہ کرایہ 7400 روپے جب کہ دو طرفہ کرایہ 13500 کر دیا گیا ہے۔

35 کلو سامان کے ساتھ یک طرفہ کرایہ 8400 روپے اور دو طرفہ کرایہ 15000 روپے کیا گیا تھا۔ ترجمان کا کہنا تھا کہ پر کشش کرایوں سے لوگ سیر و تفریح کا موقع حاصل کر سکیں گے۔

کراچی: قومی ایئر لائن نے برطانیہ میں پروازوں کی بندش کے معاملے کی وجہ سے غیر ضروری اخراجات میں کمی کا فیصلہ کر لیا۔

اے آر وائی نیوز کے مطابق پی آئی اے نے یورپ کے بعد برطانیہ میں تعینات عملہ اور افسران کو واپس بلانے پر غور شروع کر دیا، ذرایع کا کہنا ہے کہ پابندی کے باعث لندن، برمنگھم، مانچسٹر، بریڈ فورڈ سے ایئرلائن عملے کو واپس بلایا جا سکتا ہے۔

مجموعی طور پر برطانیہ میں پی آئی اے کا 19 کے قریب عملہ و افسران تعینات ہیں، اس عملے میں 7 سے زائد پاکستان سے پوسٹنگ پر گئے ہیں جب کہ دیگر 12 مقامی عملے ہیں، عملے کی واپسی سے پی آئی اے کو لاکھوں پاؤنڈز کی بچت ہوگی۔

ترجمان پی آئی اے کا کہنا ہے کہ لندن سے ایک انجینئر اور ایک پسنجر سیلز منیجر کے واپسی کے احکامات جاری کر دیے گئے ہیں۔

یورپ کیلئے پروازوں پر پابندی، پی آئی اے کا فیصلے کیخلاف اپیل نہ کرنے کا فیصلہ

ترجمان کے مطابق برطانیہ اسٹیشن سے عملے و افسران کی واپسی سے پی آئی اے کے اخراجات میں کمی واقع ہوگی، برطانیہ کی جانب سے عائد پابندی کے باعث پی آئی اے متبادل ذرایع سے آپریشن جاری رکھے ہوئے ہے۔

واضح رہے کہ گزشتہ روز پی آئی اے نے یورپی ایوی ایشن سیفٹی ایجنسی کی جانب سے پروازوں پر 6 ماہ پابندی کے فیصلے کے خلاف اپیل نہ کرنے کا فیصلہ کیا ہے، ترجمان کا کہنا تھا کہ پی آئی اے یورپی ایوی ایشن سیفٹی ایجنسی کے لیے اپیل مناسب وقت پر دائر کرے گی، قومی ایئر لائن کی جانب سے اپیل سے متعلق تیاری مکمل کی جا چکی ہے۔

کراچی: قومی ایئر لائن نے مسافروں کی سہولت کے لیے اہم اقدام اٹھاتے ہوئے پروازوں میں ناشتے اور اسنیکس کی سروس بحال کر دی۔

تفصیلات کے مطابق پی آئی اے کی پروازوں میں ناشتے اور اسنیکس سروس بحال کر دی گئی ہے، سروس کی بحالی سے متعلق شعبہ فلائٹ سروس نے نوٹیفکیشن بھی جاری کر دیا۔

نوٹیفکیشن کے مطابق پی آئی اے کی تمام ڈومیسٹک اور مشرق وسطیٰ جانے والی پروازوں میں ناشتہ اور اسنیکس فراہم کیے جائیں گے۔

پی آئی اے نے کرونا وائرس کی وجہ سے اپنی پروازوں میں ریفریشمنٹ معطل کر دی تھی، تاہم اب مسافروں کی حفاظت کے پیش نظر ناشتہ اور اسنیکس پیک حالت میں فراہم کیے جائیں گے۔

یاد رہے کہ گزشتہ برس پی آئی اے نے ایگزیکٹو اکانومی کلاس کے اپنے مسافروں کے لیے نئی پلیٹر متعارف کرائی تھی، پلیٹر میل میں سلائس کے ساتھ چیز آملیٹ، میٹھا جب کہ کھانے میں فرائڈ رائس چکن تکہ، کباب، سلاد مکس، سالن سمیت میٹھے میں پیسٹری شامل تھی۔

مسافروں کی دوران سفر صحت کا خیال رکھنے کے لیے پی آئی اے میں تازہ کھانے اور ناشتے میں پیاز ٹماٹر، ہرا دھنیا پودینہ مکھن چیز سے بنا آملیٹ فراہم کیا جا رہا تھا۔