ARYNews.tv | Urdu – Har Lamha Bakhabar

Tag: پی آئی اے

  • متحدہ عرب امارات میں پھنسے پاکستانی محنت کشوں کی وطن واپسی

    متحدہ عرب امارات میں پھنسے پاکستانی محنت کشوں کی وطن واپسی

    اسلام آباد: متحدہ عرب امارات میں پھنسے پاکستانی محنت کشوں کو لے کر پی آئی اے کی پہلی خصوصی پرواز ملتان پہنچ گئی۔

    تفصیلات کے مطابق پی آئی اے کی پہلی خصوصی پرواز یو اے ای سے پاکستانیوں کو لے کر ملتان پہنچ گئی، دوسری خصوصی پرواز رات 8 بجے اسلام آباد ایئر پورٹ پر لینڈ کرے گی۔

    وطن واپسی کے انتظامات یو اے ای کی کاروباری شخصیت سہیل گلداری نے کیے۔خلیج ٹائمز کے مالک سہیل گلداری نے 200 پاکستانیوں کو مفت ٹکٹس دیے تھے۔

    معاون خصوصی اوورسیز پاکستانیز زلفی بخاری نے سہیل گلداری سے اظہار تشکر کرتے ہوئے کہا کہ پاکستانیوں کی واپسی کا وعدہ پورا کرنے پر سہیل گلداری کے شکرگزار ہیں۔

    زلفی بخاری کا کہنا تھا کہ کرونا کے مشکل وقت پر پاکستانیوں کے ساتھ کھڑے ہونے پر خوشی ہے۔انہوں نے کہا کہ مزید ہم وطنوں کی واپسی کے لیے بھی اقدامات جاری ہیں۔

  • برطانیہ کے لیے فلائٹ آپریشن، پہلی پرواز کی بکنگ ابھی سے مکمل ہو گئی

    برطانیہ کے لیے فلائٹ آپریشن، پہلی پرواز کی بکنگ ابھی سے مکمل ہو گئی

    کراچی: برطانیہ کے لیے براہ راست پروازوں پر مبنی پی آئی اے کے فلائٹ آپریشن میں پہلی پرواز کی بکنگ ابھی سے مکمل ہو گئی ہے۔

    تفصیلات کے مطابق پی آئی اے کے ترجمان نے کہا ہے کہ برطانیہ کے لیے براہ راست پروازوں پر بکنگ کا آغاز ہو گیا ہے اور پہلی پرواز ابھی سے پُر ہوگئی ہے۔

    ترجمان عبداللہ خان نے بتایا کہ پی آئی اے کے پاس اعلیٰ سروس کے ساتھ محدود تعداد میں نشستیں موجود ہیں جن کی بکنگ جاری ہے، قومی ایئرلائن ان پروازوں پر 45 کلو فی مسافر بیگج کی سہولت بھی مہیا کر رہا ہے۔

    پی آئی اے کے مسافروں کو دوران پرواز ان فلائٹ انٹرٹینمنٹ کی سہولت بھی میسر ہوگی، ترجمان کا کہنا ہے کہ ایئر لائن کو درخواستیں موصول ہوئی ہیں کہ مانچسٹر سے زیادہ سے زیادہ پروازیں چلائی جائیں۔

    واضح رہے کہ پی آئی اے کی پروازوں کی معطلی کے بعد دیگر ایئر لائنز نے کرائے غیر معمولی طور پر بڑھا دیے تھے، ان پروازوں کے چلنے کے بعد کرائے واپس عام سطح پر آنا متوقع ہے۔

    یاد رہے کہ گزشتہ روز پی آئی اے نے بتایا تھا کہ برطانیہ کے لیے فلائٹ آپریشن بحال کر نے کے لیے متبادل اتنظامات کر لیے گئے ہیں، اس سلسلے میں قومی ایئر لائن اور پرتگالی فضائی کمپنی کے مابین معاہدہ کیا گیا ہے، جس کے تحت 300 سے زائد نشستوں والے جدید ایئر بس 330 A کے ذریعے پروازیں چلائی جا رہی ہیں، اس میں اکنامی اور بزنس کلاس میں جدید اور آرام دہ نشستیں ہیں۔

    ترجمان کے مطابق طیارے میں سماجی فاصلے کا خیال رکھا جائے گا، پی آئی اے 14 اگست کو برطانیہ سے آپریشن شروع کرے گی، پرواز پی کے 9702 PK مانچسٹر سے 250 سے زائد مسافروں کو لے کر اسلام آباد روانہ ہوگی، 15 اگست کو پرواز پی کے 9785 اسلام آباد سے لندن کے لیے روانہ ہوگی۔

  • برطانیہ جانے والے مسافروں کے لیے اچھی خبر

    برطانیہ جانے والے مسافروں کے لیے اچھی خبر

    اسلام آباد: پاکستان انٹرنیشنل ایئرلائن (پی آئی اے) نے برطانیہ کے لیے فلائٹ آپریشن بحال کر نے کے لیے متبادل اتنظامات مکمل کر لیے۔

    تفصیلات کے مطابق برطانیہ جانے والے مسافروں کے لئے اچھی خبر ہے، پی آئی اے کا پرتگال کی فضائی کمپنی ہائی فلائی سے معاہدہ طے پاگیا۔

    ترجمان پی آئی اے کا کہنا ہے کہ پاکستان انٹرنیشنل ایئرلائن نے تمام قانونی تقاضے پورے کیے ہیں،تین سو نشتوں والا جدید طیارہ ائیر بس 330 A آپریٹ ہوگا۔

    ترجمان پی آئی اے عبداللہ خان کے مطابق بر طانیہ آپریشن میں پی آئی اے کے سلاٹ اور کال سائن استعمال ہوگا،ایئر بس 330 میں اکنا می کلاس میں آرام دہ نشستیں اور بزنس کلاس میں فلیت بیڈ نشستیں رکھی گئیں ہیں۔انہوں نے بتایا کہ طیارے میں سماجی فاصلے کا خیال رکھا جائے گا۔

    ترجمان کا کہنا تھا کہ پی آئی اے 14 اگست کو برطانیہ سے آپریشن شروع کرے گی،پرواز پی کے 9702 ..PK مانچسٹر سے 2500 سے زائد مسافروں کو لے کر اسلام آباد روانہ ہو گی، 15 اگست کو پرواز پی کے 9785 اسلام آباد سے مانچسٹر کے لیے روانہ ہو گی۔

    عبداللہ خان نے بتایا کہ پی آئی اے لاہور اور اسلام آباد سے لندن کے لیے بھی پروازیں آپریٹ ہوں گی،پی آئی اے کے مسافروں کو دوران پرواز ان فلائٹ انٹرٹینمنٹ کی سہولت میسر ہو گی۔

    خیال رہے کہ پی آئی اے نے اپنے مسافروں کو سہولیات فراہم کرنے کے لیے 14 اگست سے پروازوں چلانے کا فیصلہ کیا تھا۔

    پی آئی اے کی پروازوں کی معطلی کے بعد دیگر ائیر لائنز نے کرائے غیر معمولی طور پر بڑھا دیے تھے۔پی آئی اے کی پروازوں کے چلنے کے بعد کرائے واپس عام سطح پر آنا متوقع ہیں۔

  • فرانس سے مسافروں کی وطن واپسی، پی آئی اے کی جانب سے خوش خبری

    فرانس سے مسافروں کی وطن واپسی، پی آئی اے کی جانب سے خوش خبری

    کراچی: قومی ایئر لائن نے فرانس سے مسافروں کی وطن واپسی کے سلسلے میں خوش خبری دیتے ہوئے کہا ہے کہ مسافروں کے لیے متبادل انتظامات کر لیے گئے ہیں۔

    اے آر وائی نیوز کے مطابق یورپی سیفٹی ایجنسی کی جانب سے پی آئی اے کی پروازوں کی بندش کے معاملے کے بعد پی آئی اے نے فرانس سے مسافروں کو وطن لانے کے لیے متبادل انتظامات کر لیے۔

    پی آئی اے نے اپنے مسافروں کو سہولیات فراہم کرنے کے لیے 15 اگست سے پیرس سے پاکستان کے لیے پروازیں چلانے کا فیصلہ کیا ہے، پی آئی اے کے مسافر متبادل ذریعے سے پیرس سے براہ راست پاکستان کے لیے سفر کر سکیں گے۔

    ترجمان پی آئی اے نے کہا ہے کہ قومی ایئر لائن خصوصی چارٹر پروازوں کے ذریعے پیرس سے مسافروں کو وطن لائے گی، اس سلسلے میں 15 اگست کو پیرس سے اسلام آباد کے لیے پرواز آپریٹ کی جائے گی، 16 اگست کو اسلام آباد سے مسافر پیرس کے لیے روانہ ہوں گے، 29 اگست کو پیرس سے اسلام آباد کے لیے پرواز آپریٹ کی جائے گی جب کہ 30 اگست کو اسلام آباد سے پرواز پیرس روانہ ہوگی۔

    ترجمان کا کہنا تھا پی آئی اے کے فرانس کا جی ایس اے خصوصی پروازیں آپریٹ کر رہا ہے، اس سے پی آئی اے کے بکنگ کے حامل مسافروں کو سہولت میسر ہوگی، قومی ایئر لائن خصوصی چارٹر پروازوں کے ذریعے اٹلی اور دیگر یورپی ممالک کے مسافروں کو بھی ان کے وطن پہنچائے گی۔

  • پی آئی اے یورپی سیفٹی ایجنسی کے پابندی کے فیصلے کو بدلنے کیلئے متحرک ،اپیل تیار

    پی آئی اے یورپی سیفٹی ایجنسی کے پابندی کے فیصلے کو بدلنے کیلئے متحرک ،اپیل تیار

    کراچی : قومی ایئرلائن پی آئی اے یورپی سیفٹی ایجنسی کی جانب سے پابندی کے فیصلے کو بدلنے کیلئے سفارتی سطح پر رابطوں کے ساتھ بیک ڈور چینل کا بھی استعمال شروع کردیا ہے۔

    تفصیلات کے مطابق قومی ایئرلائن پی آئی اے یورپی سیفٹی ایجنسی کی جانب سے پابندی کے فیصلے کو بدلنے کیلئے متحرک ہیں ،اس سلسلے میں پی آئی اے نے سفارتی سطح پر رابطوں کے ساتھ بیک ڈور چینل کا بھی استعمال شروع کردیا ہے ۔

    پی آئی اے کے ترجمان عبداللہ خان کے مطابق پی آئی اے نے یورپی سیفٹی ایجنسی کے لئے اپیل تیار کرلی اور وکلا کی خدمات بھی حاصل کرلیں۔

    ترجمان کا کہنا ہے کہ سیفٹی مینجمنٹ سسٹم سافٹ ویئربھی تیار کر لیا گیا، فائنل ٹیسٹنگ کے مراحل میں ہے، بر طا نیہ اور یورپ میں پروازوں کی بحالی کیلئے یورپی سیفٹی ایجنسی کو ٹھوس موثراقدمات ذریعئے قائل کر یں گے۔

    پی آئی اے ترجمان کے مطابق امید ہے فول پروف انتظامات کے بعد یورپین یونین کے خدشات دور کرنے میں کامیاب ہوجائیں گے، پی آئی اے کو دو ماہ کے اندر فیصلے پر اپیل کا حق حاصل ہے۔

    عبداللہ خان کا کہنا تھا کہ پاکستان میں پائلٹس کے ایشوز کے بعد یورپی سیفٹی ایجنسی نے پی آئی اے کی پروازوں پر پابندی لگائی تھی ،اس وقت پی ائی اے آپنے تاریخ کے سب سے بہترین سیفٹی انڈیکس پر ہے ، جو کی 61۔0 ہے ، نظام کے ساتھ ساتھ سیفٹی کلچر کا فروغ انتظامیہ کے اہم اقدامات میں سے ہے۔

    ترجمان کے مطابق پی آئی اے کی موجودہ انتظامیہ کی اصلاحات کے عمل کی وجہ سے ایئر لائن میں بتدریج بہتری آئی۔

  • پی آئی اے کے لیے اچھی خبر

    پی آئی اے کے لیے اچھی خبر

    کراچی: ترکش ایئر لائن نے پی آئی اے کے ساتھ کوڈ شیئرنگ کے نئے معاہدے کے لیے حامی بھر لی۔

    تفصیلات کے مطابق پی آئی اے اور ترکش ایئر لائن کے درمیان کوڈ شیئرنگ سے متعلق نیا معاہدہ طے پاگیا جس کے تحت قومی ایئر لائن کے مسافر استنبول سے برطانیہ اور یورپ کے لیے سفر کر سکیں گے۔

    نئے معاہدے کی پیشکش چیف ایگزیکٹو ترکش ایئر نے پی آئی اے چیف ایگزیکٹو ایئر مارشل ارشد ملک کے مکتوب کے جواب میں کی ہے۔پیشکش کے مطابق ترکش ایئر اور پی آئی اے کے درمیان یکطرفہ کوڈ شیئرنگ معاہدے کو دوطرفہ کیا جائے گا۔

    پی آئی اے کے چیف ایگزیکٹو نے اپنے خط میں یورپی روٹس کے مسافروں کی سہولت کے لیے کوڈ شیئرنگ کی پیشکش کی تھی۔دونوں ایئر لائینز برمنگھم، لندن، میلان بارسلونا، کوپن ہیگن اور اوسلو کے لیے کوڈ شیئرنگ کریں گی۔

    پی آئی اے کے مسافر ترکش ایئر لائن کے استنبول ایئر پورٹ سے یورپی روٹس کے ٹکٹ بک کرا سکیں گے۔

    کوڈ شیئرنگ کا معاہدہ پائلٹس کے مشتبہ لائسنسز کے باعث برطانیہ، یورپ اور امریکہ کی جانب سے پی آئی اے پروازوں پر پابندی کے تناظر میں کیا جائے گا۔

  • پی آئی اے نے ترکی میں فضائی آپریشن کے لیے پاکستانی سفیر سے مدد مانگ لی

    پی آئی اے نے ترکی میں فضائی آپریشن کے لیے پاکستانی سفیر سے مدد مانگ لی

    کراچی: پی آئی اے کے چیف ایگزیکٹو ارشد ملک نے ترکی میں فضائی آپریشن کے لیے پاکستانی سفیر سے مدد مانگ لی۔

    تفصیلات کے مطابق سی ای او پی آئی اے ارشدملک نے انقرہ میں پاکستانی سفیر کو خط لکھا ہے جس میں انہوں نے کہا ہے کہ پی آئی اے اگست میں ترکی کے لیے پروازوں کا آغاز کرنے جا رہی ہے۔

    ارشد ملک نے کہا کہ فضائی رابطوں کی بحالی ترک ائروناٹیکل اتھارٹی کی منظوری سے مشروط ہے،پی آئی اے نے صبیحہ گوکن انتظامیہ کو شیڈول کی کلیئرنس کے لیے خط لکھا ہے۔

    سی ای او پی آئی اے کی جانب سے لکھے گئے خط میں کہا گیا ہے کہ سفارت خانہ پروازوں کی شیڈول کلیئرنس میں منظوری کے لیے مدد کرے۔

    خط کے متن میں کہا گیا ہے کہ پی آئی اے نے ترک ائیر لائن پیگاسس سے معاہدہ کیا، جو کمرشل پروازوں کے کوڈ شیئرنگ سے متعلق ہے، کرونا کی وجہ سے کوڈ شیئرنگ معاہدے پرعملدرآمد نہ ہوسکا۔

  • پی آئی اے میں کل 34 طیارے، 31 کو مرمت کی ضرورت

    پی آئی اے میں کل 34 طیارے، 31 کو مرمت کی ضرورت

    اسلام آباد: وزیر برائے ہوا بازی غلام سرور خان کا کہنا ہے کہ پی آئی اے میں طیاروں کی تعداد 34 ہے جن میں سے قابل مرمت طیاروں کی تعداد 31 اور 3 ناقابل مرمت ہیں۔

    تفصیلات کے مطابق وزیر برائے ہوا بازی غلام سرور خان نے قومی ایئر لائن (پی آئی اے) کے جہازوں کی تفصیلات سے متعلق تحریری جواب قومی اسمبلی میں جمع کروا دیا۔

    اپنے جواب میں وزیر ہوا بازی نے بتایا کہ پی آئی اے میں طیاروں کی تعداد 34 ہے، اس وقت قابل مرمت طیاروں کی تعداد 31 اور 3 ناقابل مرمت ہیں۔

    وزیر ہوا بازی کے مطابق بی 777 کی تعداد 12 اور اے 320 طیاروں کی تعداد بھی 12 ہے، اے ٹی آر 72 کی تعداد 5 اور اے ٹی آر 42 کی تعداد 5 ہے۔

    ان کے مطابق قابل مرمت طیاروں میں بی 777 کی تعداد 12، اے 320 کی تعداد 12، اے ٹی آر 72 کی تعداد 4، اور اے ٹی آر 42 کی تعداد 3 ہے۔

    اسی طرح ناقابل مرمت طیاروں میں بی 777 اور اے 320 شامل نہیں جبکہ ایک اے ٹی آر 72 اور 2 اے ٹی آر 42 ناقابل مرمت ہیں۔

    خیال رہے کہ کرونا وائرس اور برطانیہ، یورپی یونین اور امریکا کے لیے آپریشن کی بندش سے قومی ایئر لائن کو رواں سال 100 ارب روپے سے زائد کے نقصان کا اندیشہ ہے۔

    پی آئی اے کو امریکا میں آپریشن کی بندش کی وجہ سے 5 پروازوں پر 28 کروڑ روپے سے زائد کے نقصان کا سامنا ہے۔

    یورپی یونین کی جانب سے پابندی کی وجہ سے پی آئی اے کو برطانیہ اور یورپ سے 33 ارب روپے سے زائد ریونیو کے نقصان کا خدشہ ہے جبکہ حج آپریشن نہ ہونے کے باعث بھی قومی ایئر لائن کو 12 ارب روپے کے نقصان کا سامنا ہے۔

  • مجموعی طور پر 28 پائلٹس کے لائسنس منسوخ ہو گئے

    مجموعی طور پر 28 پائلٹس کے لائسنس منسوخ ہو گئے

    کراچی: سول ایوی ایشن اتھارٹی (سی اے اے) نے مجموعی طور پر 28 پائلٹس کے لائسنس منسوخ کر دیے ہیں۔

    اے آر وائی نیوز کے مطابق پائلٹس کے مشکوک لائسنس کے معاملے میں سی اے اے نے مجموعی طور پر 28 پائلٹس کے لائسنس منسوخ کر دیے ہیں، حکومت کی منظوری کے بعد ڈی جی سی اے اے نے لائسنس منسوخی کے باضابطہ نوٹیفکیشن بھی جاری کر دیے۔

    سینئر جوائنٹ سیکریٹری ایوی ایشن ڈویژن عبدالستار کھوکھر نے اے آر وائی نیوز کو بتایا کہ لائسنس منسوخ ہونے والوں میں پی آئی ا ے کے 7 پائلٹس اور 1 فضائی میزبان شامل ہیں۔

    انھوں نے بتایا کہ سول ایوی ایشن نے مجموعی طور پر 93 پائلٹس کے لائسنس معطل کیے ہیں، بقیہ پائلٹس کی فرانزک آڈٹ کے ذریعے مکمل چھان بین کی جا رہی ہے، لائسنس کے معاملے پر چھان بین کا مقصد کسی بے قصور کو سزا سے بچانا ہے، جو قصور وار ہیں ان کے لائسنس منسوخ کیے جا رہے ہیں۔

    قومی ایئرلائن کے 17 پائلٹس کے لائسنس منسوخ

    چند دن قبل ترجمان پی آئی اے نے نے کہا تھا کہ جن پائلٹس کے لائسنس منسوخ کیے گئے ہیں ان کپتانوں کو ملازمت سے برخاست کر دیا جائے گا۔

    واضح رہے کہ گزشتہ ماہ مشتبہ پائلٹس کے لائسنس کے معاملے پر وزارت ہوا بازی کی جانب سے 262 پائلٹس کی فہرست جاری کی گئی تھی، جس میں پی آئی اے کے 141، ائیر بلیو کے 9 اور سرین ائیر کے 10 پائلٹس کے لائسنس مشتبہ قرار دیے گئے تھے۔

  • ایئرپورٹس پر طیاروں سے پرندے ٹکرانے کے واقعات میں اضافہ

    ایئرپورٹس پر طیاروں سے پرندے ٹکرانے کے واقعات میں اضافہ

    کراچی: ملک کے مختلف ایئرپورٹس پر طیاروں سے پرندے ٹکرانے کے واقعات میں اضافہ ہوا ہے سب سے زیادہ پی آئی اے کے طیارے متاثر ہوئے۔

    تفصیلات کے مطابق کراچی اور لاہور میں جہازوں سے پرندوں کے ٹکرانے کے سب سے زیادہ واقعات رونما ہوئے ہیں۔7ماہ کے دوران پی آئی اے کے 22 سے زائد طیاروں سے پرندے ٹکرائے۔ ایئرپورٹس کے اطراف ناقص صفائی سے پرندے جہازوں سے ٹکرانے کی وجہ بنے۔

    رپورٹ کے مطابق جنوری سےجون 2020 میں طیارے سے پرندے ٹکرانے کے 12 جبکہ جولائی میں 19 دنوں میں جہازوں سے پرندے ٹکرانے کے 10 واقعات رونما ہوئے۔

    ترجمان پی آئی اے نے بتایا پرندے ٹکرانے سے پی آئی اے کے 1سال میں 18 طیارے بری طرح متاثر ہوئے جن میں بوئنگ777 اور ایئر بس 320 شامل ہیں۔

    ترجمان کا کہنا تھا کہ پی آئی اے کو طیارے سے پرندے ٹکرانے کے واقعات میں اضافی اخراجات آئے،طیاروں سے پرندے ٹکرانے کے واقعات سے شیڈول بھی متاثر ہوا۔

    انہوں نے مزید کہا کہ سی اے اے نے کسی ایئرپورٹ پر پرندوں کو بھگانے کے لیے جدید آلات نہیں لگائے، پرندے ٹکرانے کے واقعات پر تشویش،خدشات سے مسلسل آگاہ کیا۔