اسلام آباد : اگلے سال حج پروازوں کے حوالے سے بڑا معاہدہ طے پاگیا، جس کے تحت قومی ایئرلائن 35 ہزار سرکاری حجاج کو سفری سہولت مہیا کرے گی۔

تفصیلات کے مطابق حج پروازوں سے متعلق وزارت مذہبی امور اور پی آئی اے کے درمیان معاہدہ طے پاگیا، پی آئی اے کے CEO ایئر وائس مارشل عامر حیات اور ایڈیشنل سیکرٹری مذہبی امور ڈاکٹر سید عطاء الرحمن نے معاہدے پر دستخط گئے۔

ترجمان مذہبی امور نے بتایا کہ معاہدے پر دستخط گزشتہ روز وزارت مذہبی امور میں کیے گئے، قومی ایئرلائن 35 ہزار سرکاری حجاج کو سفری سہولت مہیا کرے گی۔

اس موقع پر پی آئی اے کے سی ای او ایئر وائس مارشل عامر حیات نے حجاج کو بہترین سہولیات کی فراہمی کے عزم کا اعادہ کرتے ہوئے کہا سعودی ایئرلائن اور دیگر مقامی ایئرلائنز کے ساتھ معاہدات بھی جلد مکمل کیے جائیں گے۔

یاد رہے 2 روز قبل وفاقی وزیر مذہبی امور چوہدری سالک حسین نے حج پالیسی 2025کا باضابطہ اعلان کیا تھا۔

چوہدری سالک حسین نے بتایا تھا کہ سرکاری اور نجی اسکیم کےتحت حج کوٹہ 50،50 فیصد ہے، 12 سال سےکم عمر بچوں کو حج کی اجازت نہیں دی جارہی۔

مزید پڑھیں : حج پالیسی 2025 کا باضابطہ اعلان

وفاقی وزیر مذہبی امور کا کہنا تھا کہ گزشتہ سال حج انتظامات بہت بہترین تھے، حج اتنظامات کے سلسلے میں تیاریاں پوری کررہےہیں،وفات کی صورت میں حاجی کے لواحقین کو 20لاکھ روپے امداد اور زخمی ہونیوالے حجاج کو بھی معاوضہ ادا کیا جائے گا۔

انھوں نے بتایا تھا کہ عازمین حج کیلئے حج رقم کی قسطوں کا نظام متعارف کرارہے ہیں، پہلی بار حج پر جانے والوں کو ترجیح دی جارہی ہے تاہم بیماراورمتعدی امراض میں مبتلاافراد رواں سال حج پر نہیں جاسکیں گے۔

چوہدری سالک کا کہنا تھا کہ ہماری بھرپور کوشش ہوگی کہ کوٹہ واپس نہ کیاجائے ، اسپانسرڈاسکیم کا رہ جانیوالا کوٹہ عام عازمین کو منتقل کیاجائےگا اور اوورسیز پاکستانیوں کیلئے حج کوٹہ 5ہزار مقرر کیاجارہاہے۔

کراچی : قومی ایئرلائن ( پی آئی اے) نے اہم طیاروں پردفاعی نمائش آئیڈیاز کا لوگو پینٹ کروادیا ، یہ طیارے ملکی و بین الاقوامی فضائی روٹس پر استعمال کیے جاتے ہیں۔

تفصیلات کے مطابق قومی ایئرلائن ( پی آئی اے) نے فضائی بیڑے میں شامل اہم طیاروں پردفاعی نمائش آئیڈیاز کا لوگو پینٹ کروادیا۔

بوئنگ777اور ائیر بس320کے4جہازوں پر لوگو پینٹ کروائے گئے ہیں ، نیروباڈی اوروائیڈبا ڈی طیارے ملکی و بین الاقوامی فضائی روٹس پر استعمال کیے جاتے ہیں۔

12ویں آئیڈیاز اسلحے کی نمائش 19 تا22 نومبر کے دوران ایکسپوسینٹر کراچی میں منعقدہوگی۔

مزید پڑھیں : پی آئی اے دفاعی نمائش آئیڈیاز 2024 کی آفیشل ایئرلائن بن گئی

یاد رہے قومی ایئر لائن کو دفاعی نمائش آئیڈیاز 2024 میں آفیشل ایئرلائن قرار دے دیا گیا تھا اور کہا تھا 4 طیاروں کے ذریعے آئیڈیاز 2024 کی تشہیری مہم چلائی جائے گی۔

خیال رہے پاکستان کی ڈیفنس انڈسٹری کو بین الاقوامی سطح پر فروغ دینے کیلئے وزارت دفاع اور دفاعی پیداوار کے تحت ڈیفنس ایکسپورٹ پروموشن آرگنائزیشن ڈی ای پی او ہر دو سال بعد آئیڈیاز کے نام سے بین الاقوامی دفاعی نمائش اور سیمینار کا انعقاد کرتا ہے

اس نمائش میں پاکستان میں مقامی طور پر تیار کردہ دفاعی سازوسامان کی نمائش کے ساتھ ساتھ دنیا بھر کی بڑی اور اہم دفاعی کمپنیاں بھی اپنے سازوسامان کی نمائش کرتی ہیں۔

کراچی: ڈی جی سی اے اے نادرشفیع ڈار نے واضح کیا ہے کہ پی آئی اے کے تمام طیاروں کی مکمل جانچ پڑتال کی جائیگی۔

تفصیلات کے مطابق ڈائریکٹر جنرل سی اے اے کا کہنا تھا کہ یورپ میں پروازوں پر پابندی نومبر میں اٹھائے جانےکی قوی امید ہے، قومی ایئرلائن کے تمام طیاروں کی مکمل جانچ پڑتال کی جائیگی، بین الاقوامی ہوابازی تنظیم کی آڈٹ رپورٹ آگئی ہے۔

نادر شفیع نے کہا کہ پاکستان میں کمرشل پروازوں کی آمد آئندہ چند دنوں میں بڑھےگی، ایئر سیفٹی اقدامات بھی خطے میں پاکستان کے بہترہیں۔

ڈی جی سول ایوی ایشن اتھارٹی نادرشفیع ڈار نے بتایا کہ پاکستان سول ایوی ایشن کی کارکردگی بھارتی ایوی ایشن سے بہتر ہے۔

دریں اثنا سی اے اے نے پی این آر کے سلسلے میں ایک اہم قدم اٹھاتے ہوئے فیصلہ کیا ہے کہ اب کسی مسافر کی بورڈنگ سے نہیں روکا جائے گا۔

بورڈنگ کے سلسلے میں ایئر لائنوں سے متعلق مسافروں کی نئی شکایات سامنے آئی ہیں، جس پر سول ایوی ایشن نے نوٹس لے لیا ہے، اور تمام ایئر لائنوں کو نیا ہدایت نامہ جاری کیا گیا ہے۔

سی اے اے کے مطابق ٹکٹ بکنگ اور سفر کے وقت پی این آر مختلف ہونے پر مسافروں کو بورڈنگ نہ دیے جانے کی شکایات سامنے آئی تھیں، جس پر اب اتھارٹی نے ہدایت جاری کی ہے کہ مسافروں کو ٹکٹ میں پی این آر کے معاملے بورڈنگ سے نہ روکا جائے۔

کراچی : دبئی جانے والے پی آئی اے کی ایک اور پرواز میں اچانک خرابی کے باعث کپتان نے طیارے کو بحفاظت کراچی میں لینڈ کرادیا۔

تفصیلات کے مطابق پشاور سے دبئی جانے والی پی آئی اے کی پرواز میں اچانک تکنیکی خرابی پیدا ہوگئی، ذرائع نے بتایا کہ پی کے 283 پرواز کے طیارے کےکارگوکمپارٹمنٹ میں آگ کی انڈیکیشن آئی تھی تاہم کپتان نے طیارے کو بحفاظت کراچی میں لینڈکرایا، پرواز میں 170 سے زائد مسافر سوار تھے۔

ذرائع کا کہنا ہے کہ قومی ایئرلائن کے طیاروں میں پرزہ جات کی کمی کے باعث خرابیاں معمول بن چکی ہیں۔

قومی ایئرلائن کے ترجمان نے بتایا کہ دوران پرواز طیارے کے کپتان کو تکنیکی خرابی کی وارننگ موصول ہوئی تاہم وارننگ غلط ثابت ہوئی، ضروری چیکس کے بعد طیارہ دبئی روانہ ہوگیا۔

ترجمان کا کہنا تھا کہ مسافروں کی حفاظت اولین ترجیح ہے اور اس پر کوئی سمجھوتہ نہیں ہوگا۔

اس سے قبل قومی ایئرلائن کی دبئی سے ملتان آنے والی پرواز کے طیارے کے ٹائرپھٹ گئے تھے ، طیارے کے ٹائر پھٹنےکے باعث پرواز کے 172 مسافروں کو لاؤنج منتقل کردیا گیا۔

قومی ایئرلائن ترجمان نے بتایا تھا کہ دبئی سے اڑان بھرنے کے دوران رن وے پر انجن میں خرابی کی وارننگ ملی، کیپٹن نے ایمرجنسی بریک سسٹم استعمال کرکے طیارے کو بحفاظت روکا۔

خیال رہے ذرائع نے بتایا تھا کہ ایئرلائن کے 19 بوئنگ 777 طیاروں میں صرف 5 طیارے اڑان بھر رہے ہیں جبکہ طیاروں کی بروقت مینٹننس نہ ہونے کی وجہ سے گراوٴنڈ ہیں اور ایئر بس 320 کے 17 جہازوں میں سے صرف 9 طیارے آپریٹ ہورہے ہیں۔

کراچی: قومی ایئر لائن (پی آئی اے) نے سیاحت کو فروغ دینے پر ٹورازم 2024 ایوارڈ اپنے نام کر لیا۔

ترجمان پی آئی اے نے بتایا کہ سیاحت کو فروغ دینے کیلیے قومی ایئر لائن کو ایوارڈ دیا گیا، وفاقی وزیر احسن اقبال نے سی ای او پی آئی اے عامر حیات کو ایوارڈ حوالے کیا۔

ترجمان کے مطابق ملکی سیاحت کے فروغ کیلیے قومی ایئر لائن کا اہم کردار ہے، ایوارڈ ایئر لائن کیلیے اعزاز ہے۔

پی آئی اے کی نجکاری

دوسری جانب قومی ایئر لائن کی نجکاری کیلیے بولی کی تیاریاں جاری ہیں۔ نجکاری کمیشن نے بولی کی تاریخ میں ایک ماہ کی توسیع کا اعلان کر رکھا ہے۔

بولی یکم اکتوبر کے بجائے 31 اکتوبر کو ہوگی جبکہ معاہدے کے مسودے پر دستخط کی نئی تاریخ 25 اکتوبر مقرر کی گئی، بولی کیلیے پیشگی رقم 28 اکتوبر تک جمع کروائی جا سکتی ہے۔

ذرائع ایوی ایشن کے مطابق تاریخ میں توسیع سے پی آئی اے کی نجکاری کو دھچکا لگے گا۔

چند روز قبل قومی اسمبلی کی قائمہ کمیٹی برائے نجکاری کے چیئرمین فاروق ستار کی زیر صدارت اجلاس ہوا تھا جس میں ان کا کہنا تھا کہ تمام اداروں میں سے پی آئی اے کی نجکاری سب سے پہلے ہو رہی ہے۔

فاروق ستار نے کہا تھا کہ یکم اکتوبر کو پی آئی اے کی نجکاری کی بولی ہونے جا رہی ہے، ہم کوشش کریں گے کہ قومی ایئر لائن کی بولی کو لائیو دیکھ سکیں، علیم خان سے گزارش کریں گے بولی دیکھنے کے انتظامات کریں۔

انہوں نے کہا تھا کہ آج کی میٹنگ قومی ایئرلائن کو الوداع کہنے کی آخری میٹنگ ہوگی، 6 کمپنیاں یکم اکتوبر کو بولی لگائیں گی، اس کے بعد ملازمین کے حقوق کا معاملہ ہماری نظر میں رہے گا، ملازمین کی تنخواہوں اور الاونسز پر کوئی سودا نہیں ہونا چاہئے۔

رکن کمیٹی سحر کامران نے سوال کیا تھا کہ کیا آپ کی تمام شرائط کمپنیوں نے قبول کر لی ہیں؟ سیکریٹری نجکاری کمیشن نے بتایا تھا کہ کمپنیوں نے ہماری تمام شرائط مانی ہیں، کمپنیوں کی طرف سے شرائط ماننے کے بعد ہی فائنل ڈرافٹ بنایا گیا۔

جس پر رکن کمیٹی سحر کامران نے کہا تھا کہ وہ فائنل ڈرافٹ کمیٹی کے ساتھ شیئر کیا جائے۔ رکن صبا صادق کا بھی کہنا تھا کہ اگر ڈرافٹ سیکرٹ ہے تو اس پر ان کیمرہ اجلاس میں بحث کر لیتے ہیں تو سیکریٹری نجکاری کمیشن نے بتایا کہ ابھی فائنل ڈرافٹ کمپنیوں کے ساتھ شیئر کیا گیا ہے۔

چیئرمین کمیٹی نے کہا تھا کہ پی آئی اے میں اس وقت 7360 ملازمین ہیں۔

سیکریٹری نجکاری کمیشن کا کہنا تھا کہ موجودہ ملازمین کی 35 ارب روپے پنشن قومی ایئرلائن کے ساتھ جائیں گی اور ریٹائرڈ 17 ہزار ملازمین کی پنشن حکومت ہی دیتی رہے گی۔

جس پر فاروق ستار کا کہنا تھا کہ میرے تحفظات موجودہ ملازمین کی جاب گارنٹی کے حوالے سے ہیں۔

اجلاس میں رکن کمیٹی نعمان اسلام نے کہا تھا کہ فائنل ڈرافٹ ان کیمرہ اجلاس میں دکھانے میں کیا ایشو ہے جس پر سیکریٹری نے بتایا تھا کہ کابینہ کی منظوری کے بعد ہی ہم ڈرافٹ کا فائنل ڈاکومنٹ کہہ سکتے ہیں۔

چیئرمین کمیٹی نے کہا تھا کہ نجکاری کے حوالے سے وفاقی حکومت کی ایک بڑی کمیٹی ہے، اسحاق ڈار نائب وزیر اعظم ہیں ان سے اجازت لے لیں، ایسا بھی ہو سکتا ہے کہ آپ ڈرافٹ شیئر نہ کریں صرف ریڈ کرتے جائیں۔